Бадӟым ужлэн чурыт куронъёсыз

Туннэ нуналэ гурт возёсъёсын но пӧртэм производствоосын тыршись ӧнерчиос быдэс шаерысь калык понна туж кулэ уж нуо — пӧртэм вузъёсты поттыса, калыкез сюдо но ванё каро. Одӥг минутлы но дугдӥсьтэм удысъёс кылкутыса учкемез кулэ каре. Ведь тон ачид понна гинэ уд тыршиськы, быдэс шаерлэн азинлыкез понна кыл кутӥськод.

Сыӵе кылкутӥсь производствоос но обществоос пӧлы пыртыны быгатӥськом сюбегатэм кылкутонэн «Арча» обществолэсь Балтасьысь йӧл-вӧй комбинатсэ но. Татын 300 пала адями ужа. Ёросмылэн но быдэс элькунмылэн улоназ бадӟым люкет пыртӥсь комбинат ялан выльдӥськонъёс но воштӥськонъёс пыр потэ. Продукци поттонлы чурытэсь куронъёс пуктэмын, соин интыын ужасьёслы но кылкутыса ужаны кулэ.

Ужлэн аспӧртэмлыкъёсыз сярысь вераськимы комбинатын ужась Людмила Тихоноваен.

— Кызьы тодӥськом, тон азьло калыклы дурбасьтонъя ёзэтын ужад, арлыдоосты утид, табере чылкак мукет ӧнере выжид. Кызьы озьы луиз?

— Улонын ваньмыз одӥг гинэ ӧрын уг мыны ук, астэ пӧртэм удысын но эскерыса вуттоно. Мон но 2021 арын ужме воштоно кари, вӧй-йӧл поттӥсь комбинатэ интыяськи. Туннэ нуналлы уже кельше, ог-огмылы юрттыса, валаса ужаськомы. Татысь коллективез калыккуспо шуысал, татын бигерез но, удмуртэз но, ӟучез но ужа. Котькин аслэсьтыз ужзэ валаса, тодыса ужа. Ваньзэс ушъяны быгатӥсько. Эшшо Арча, Кукмор бускель ёросъёсысь но ужаны ветло татчы. Комбинатын мон формаосысь сырез поттӥсько, пӧртэм шекъёсты дыраз адӟыса вуттоно. Адямиос доры чылкыт, вольыт но чебер сыр вуыны кулэ. Ӵошен ужасьёсы но монэ ушъяло, чырткемен лыдъяло. Сыӵе кылъёсты кылыса, эшшо но ужан мылкыды ӝутске.
Куронъёс но туж вылӥесь пукто. Проверкаос, куноос ӵемысь вуыло, соин ужан интыез но котьку чылкыт возёно. Мултэс ужъёсын выроно ӧвӧл, котьку сак луоно.

— Нош ужан графикты тӥляд кызьы радъяське?

— Пӧртэм графикъёс вань, со котькуд ужасьлэн аслаз. Нырысь ик со уж спецификаен герӟаське. Одӥг точкаын ми укмыс кузя ужаськом. Одӥг нунал ужаськом, кык нунал шутэтскиськом. Ужмы ӵукна 8 часэн кутске, йылпумъяськыны пӧртэм вакытэ но быгатэ, куддыр ӵукнаозь но кыльыны тупа, ужмы трос. Нунал куспатыса но ужаны тупа.

— Трос уж вань бере, уждунэз но умой луыны кулэ, дыр?

— Бен, уж трос бере, солэн дуныз но умой. Со возьматэ: вузмес кулэ карисьёс трос. Ӝожтӥськон палъёсмы ӧвӧл. Ужан понна вань условиос кылдытэмын, нимысьтыз сиськон понна интымы но вань. Секыт уж шуыса кошкисьёсыз но вань ини, сотэк уг луы, но мыным уже тупась шуисько. Кезьыт ӧвӧл, ужмы дорамы уг берты, соиз туж умой, сменамес ужаськом но собере тон ас тупамедъя дырдэ ортчытыны быгатӥськод. Инмарлы тау! Мултэсэз кулэ ӧвӧл. Уж, кужым, тазалык гинэ мед луозы!

— Ёросамы улӥсьёс тӥ дорысь кыӵе сыръёсын кунояськыны быгато?

— Ми мраморной, голландской, российской, деревенской, масдам, тильтизер, пармезан сыръёсты поттӥськом. Котькуд сырлэн аслаз процессэз но рецептэз. Йӧлэз сӧронтэм та ужын туж сак луоно. Суткалы быдэ татын 2 тонна мында сыр лэсьтӥське.

Сыр сяна ми дорын арнялы куинь пол кузятэм потэ, озьы ик вӧй но шуккиське. Нуналлы быдэ комбинатэ 340 тонна йӧл бертэ. Со йӧлэз ини быгатыса котькуд продукци понна радъяно но интыяно. Вань ужасьёслэн тыршеменызы ужъёс уг ӝегатско.

— Ужед капчи ӧвӧл шӧдиське. Со сяна, тон кык нылпиосты будэтӥськод на, суткаен ужаськод, со дыре кин соосты учке?

— Нылпиосты песянай-песятайзы утё. Соослы та понна туж бадӟым тау шуисько. Нылпиосме соослы оскыны быгатӥсько, таин шумпотӥсько. Нылпиосы котьку чылкыт дӥсяськемын меда, сюдэмын меда шуыса сюлмаськонъёсы уг кылдо.

— Тау вераськемед понна! Азьланяз но азинлыкъёс сӥзиськом, секыт ужед капчиен мед сётӥськоз!

Гурт удыс но перерабатывающей промышленность — улонмылэн одӥгез кулэ луись люкетэз. Гурт удыс котьку адямиез сюдоз, нош промышленность — гурт возёсысь вузъёсты уже кутэ. Ог-огенызы вераськыса ужамзы но тыршемзы калыклэсь улонзэс каньылгес но капчигес каре. 

Вераськиз Юлия Щербакова