Балтась музъем – кубызо шаер

Туэ Ципья черкогуртын ортчем «Гырон быдтон» яркыт буёлъёсын историе пыриз, трос йӧслыко Татарстанлэн лулчеберет улоназ тодэ кыльымон ужрад луиз.
Татын нимысьтыз пусйыны кулэ «Айкай» театрлэсь театрализованной прологез, праздникез сӥё-дано усьтон ужрадэз радъянъя но ортчытонъя бадӟым уж быдэстэмзэ.

Художественно-постановочной группа, артистъёс шошма удмуртъёслэн историзыя, этнографизыя, крезьгуро фольклорзыя «Кубызо шаер» шуыса нимам чебер спектакль кылдытӥзы, кудӥз праздниклэн зэмос тодметэз луиз. Прологлэн валтӥсь темаезлы но 2025-тӥ арын ортчем «Гырон быдтонлэн» пусэзлы кубызэз бырйизы — удмурт крезьгуро инструментэз, кудӥз шошма удмуртъёслэн туннэ нуналозь но утиськемын. 

Праздник ортчем бере газетмылэн одӥгез матысь эшез — Карек-Серма гуртысь Василий Никитин — вазиськиз вал таӵе куронэн:

«Гырон быдтонын Захаров кубызчиез туж ушъязы. Кин меда со? Газетады уд гожтэ меда? Кылэме вань Шишкин Семён, Ӟаны починкаын улэм Киськем пи Петров, Сырьяысь Картамышев Кузьма, Сизнерысь Сергеев Анатолий, Ӟаныысь Тувалов Михаил, Ушмаысь Романов Михаил, Ципьяын улэм Кушкет пи Кузнецов Василий (тодмо аспалмылэн Геннадий Кузнецовлэн атаез), милям (Карек-Серма гуртысь — ред.) Копаров Александр но Михайлов Пётр, Бибатлаысь Туктаров Туктагул кубызчиос сярысь...»

Та вазиськонэн валче кубыз, кубызэн шудӥсьёс сярысь пӧртэм источникъёсысь ивортодэт утчано кариськи. Та ужын бадӟым юрттэт луизы Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая удмурт институтысь ӧнерчиослэн Ирина Муртазовна Нуриевалэн но Ирина Вячеславовна Пчеловодовалэн тодослыко ужъёссы. 

Удмурт кубыз сярысь тужгес вазь веранъёс XVIII даурлэн пумысьтыз этнографи заметкаосын пумиськыло. Озьы Н. П. Рычков сюрес вылысь заметкаосаз Уфа провинциысь удмуртъёслэсь сюан гуръёссэс волынкаен но крезен ӵош шудӥсь скрипкалы кельшись крезьгуро инструментэз возьматон понна «гудок» терминэз кутэм. Кубызлэн мукет йылолъёсын инты басьтэмез сярысь иворъёсты XIX даурысь ужъёсысь но шедьто. Та сярысь гожтэ Пчеловодова И. В. аслаз «Конструкция удмуртского традиционного инструмента кубыз в терминологическом аспекте» шуыса нимам ужаз. Со ик ужаз Ирина Вячеславовна ивортэ, «кубыз» нимо кык гумыё смычковой инструмент сярысь озьы ик музыковед В. М. Беляев но пусъе шуыса. Тодосчи пусъем солэсь вашкала ӟуч «гудок» но пор «ия-ковыж» шуыса нимаськем скрипкаосын огкадь луэмзэ. 

Нош быдэс дуннелы кубызэз усьтэ венгер тодосчи, эскерись Ласло Викар. Кылем даурлэн 50-тӥ аръёсызлэн пумаз со ӵош ужась эшеныз — лингвистэн Габор Берецкиен Татарстанысь, Башкортостанысь, Марий Элысь удмурт гуртъёсты эскере. Ӵапак соку фольклорист кубызэн шудӥсьёсты шедьтэ но магнитофонэ материал гожъя. Со бере но Ватка тупалась удмуртъёс доры кӧня ке пол экспедициосын вуылӥзы.

Кубыз сярысь шӧдскымон трос тодыны луиз 2004-тӥ арын, этномузыковедлэн И. М. Нуриевалэн «Ватка Кам тупалась удмуртъёслэн крезьгуръёссы» бичетэз потэм бере. Татын тодосчи инструментлэсь описанизэ гинэ уг сёты, сое лэсьтон ужез, люкетъёсызлэсь нимзэс, паськытгес усьтэ улонын кутӥськемзэ но быдэстоно крезьгуръёслэсь репертуарзэс, бичетын печатласько кубызэн шудоно крезьгуръёслэн нотаосын образецъёссы но. 

Экспедиционной практикаослы луыса, туннэ Балтась ёросысь но Мари-Турек ёросысь куд-ог кубызчиослэсь нимъёссэс вераны быгатӥськом. Одӥгез тодмо кубызчи — Сырья гуртысь 1930-тӥ арын вордскем Картамышев Кузьма Григорьевич. Со куинь сиё кубызэн туж быгатыса шудэм. Инструментсэ Германиысь армиын служить карыса бертыкуз ваем. Солэн атаез выжыезъя крашин бигер луэм, со но кубызэн шудэм.

Мукетыз кубызчи — Ӟаныысь 1934-тӥ арын вордскем Тувалов Михаил Владимирович. Со но куинь сиё кубызэн шудэм. Нырысетӥ кубызэз ас киын лэсьтэмын луэм, сое лэсьтэм Улын Ушма гуртысь ӵыжы-выжыез. Сюанын берлозэ шудэм 1963-тӥ арын. 1968-тӥ арын солэсь шудэмзэ Ласло Викар гожтэм.
Кема аръёс ӵоже аслаз лэсьтэм кубызэныз Карек-Серма гуртын 1927-тӥ арын вордскем Копаров Александр Николаевич шудэм.

Тагашур гуртысь Быдӟым ожысь ветеран но — 1918-тӥ арын вордскем Туктаров Туктагул Туктарович — кубызчи луэм. Со фабрикаын лэсьтэм куинь сиё инструментэн шудэм. Сиоссэ ачиз векчи ыж сюллэсь лэсьтэм. Атаез но солэн кубызчи луэм, дорын лэсьтэм кубызэн шудэм. 

Балтась ёросын эшшо тодмо луэм Захаров Никита Григорьевич кубызчи. Со 1917-тӥ арын Вуж Кушкет гуртын вордскем, 1950-тӥ арысен Семёновка гуртын улэм. Солэн кыкетӥ нимыз — Микта кубызчи. Луэм на 1926-тӥ арын Сизнер гуртын вордскем Эшмаков Роман Петрович (1940-тӥ арысен Карлыган черкогуртын улэм).
Мари-Турек ёросысь кубызчиос пӧлысь 1927-тӥ арын Ӟаны Починка гуртын вордскем Андреев Кузьма Демьянович но Сизнер Починкаысь 1930-тӥ арын вордскем Кузнецов Валентин Трофимович сярысь тодмо. Кузьма Демьянович ньыль сиё кубызэн шудэм.

Шумпотымон, кубыз туннэ но улэп шуыса. Нимысьтыз пусйыса вераны кулэ, кубызчи Романов Михаил Ефимович сярысь. Со шошма удмуртъёслэн кубызчиоссылэн традиционной школаысьтызы берпуметӥез скрипач, шуыны кулэ. Вордскемын Михаил Ефимович 1941-тӥ арын Улын Ушма гуртын. Улэ Казань карын. Со ньыль сиё кубызэн шудэ. Шудыны дышетске атаезлэн куинь сиё инструментэныз. Нырысьсэ кубызэз со кияз кутэм куать арес дыръяз. Нош тямыс аресэн ини шудыны кутскем.

Туннэ нуналэ кубызэз вӧлмытӥсьёс пӧлысь эшшо одӥгез — Румыниысь Трансильваниын улӥсь мадьяр фольклорист, мадьяр кылъя дышетӥсь, крезьгуро инструментъёсты лэсьтонъя усточи Миклош Дэметер. Со но экспедициосын Марий Элысь, Татарстанысь удмурт гуртъёсы вуылӥз, кубызэн шудонлэсь вашкала сям-йылолзэ эскериз. 

Туала кубызчиос пӧлысь эшшо висъяны луоз Удмуртиысь Алексей Кузнецовез но Евгений Бикузинэз (Чудья Жени). Шудэм сяна, соос асьсэос ик соосты лэсьто но. Асьме ёросын кубызэн шудонэз азинтэ Сырья гуртысь Плотников Николай Иванович.

Редакцилэсь: туж шумпотомы, Василий Петровичлэн вазиськонэзъя кин ке кыӵе ке но ивор сётыны быгатӥз ке. Ойдолэ ӵошен кубызчиосмылэсь нимъёссэс улӟытыны тыршомы.

Материалэз дасян понна уже кутэм источникъёс:
1. Нуриева И. М. Песни завятских удмуртов. Ижевск: УИИЯЛ УрО РАН, 2004. В. 2. 
2. Пчеловодова И. В. Конструкция удмуртского традиционного инструмента кубыз в терминологическом аспекте // Вестник угроведения. 2015. № 1(20).
3. https://meras. info.