Балтасьлэн эктонъя королез

Туннэ нуналэ кужмо темпен репетициос мыно. Та нуналъёсы хореографъёсын ӵош «Восторг» эктон коллективен «Узбек» эктонэз репетировать каремзэс адӟыны кылдӥз. Шутэтскон висказы пичияк дыр шедьтыса, Эрик Васинкинэн туэ фестивальлы дасяськон но йылпумъянъёс сярысь вераськыны быгатӥм.

— Та фестивале 2009 арысен пыриськиськом. Дыр ортчемъя опыт но, луонлыкъёс но йыло. Та сезон эктӥсьёс понна нимысьтыз шумпотымон шуыса вераме потэ. «Восторг», «ЭРА» эктон коллективъёс вормисе потыса, Казаньын ортчись финал ӵошатсконъёсы мынозы, — шуэ хореограф.

Вормонъёс капчиен уг сётӥсько. Соос доры котыр сюресъёс нуо. Эктон коллективъёс трос, соос ваньзы но устолыксэс будэтон бордын ужало. Хореографиен тунсыкъяськон тросгес луэ. Нуналлы быдэ репетициос, тыршыса ужан но тужгес умоез луон мылкыд гинэ вормон вае.

Азьло аръёсы районамы эктон искусство ляб вал шуыса, нокин понна секрет ӧвӧл. Балтасе Эрик Васинкин хореограф лыктэм бере, ваньмыз воштӥськиз. 2001 арын со дырысь культура отделэн кивалтӥсь Радик Михайлов Марий Эл Республикаысь Мари Турек районысь егит хореографез Эрик Генндиевичез ӧтиз. Туннэ нуналэ со Балтасьмылэн зэмос эктонъя королезлы пӧрмиз.

«Со дырысен 17 ар ортчем. Паймод, ваньмыз али кадь вал», — шуэ хореограф. Туннэ солэн дышетскисьёсыз районысь сценае уг тэро ини. Эктонъя коллективъёсызлэн республика но район сценаосын выступлениос лэсьтыса, секыт эктонъёсты но вылӥ уровенен возьматэмзы усточилэн ассэ жалятэк, вань сюлмысь ужамез сярысь верало. …жыт вераськись, каньыл но ас ужзэ кылкутымон быдэстӥсь, нылпиосты но искусствоез сюлмысь яратӥсь Эрик Геннадиевичен ӵош Наиля Хабибуллина, Лариса Давлетшина, Алия Юсупова но туж кельшыса ужало. Ог-огзэс валаса ужась усточиос вылӥ сценаосын, вылӥ уровенё конкурсъёсын но асьсэды умой паласен возьмато, Балтасьлэсь данзэ ӝутонэ бадӟым люкет пырто.

Туннэ нуналэ «Виво» эктон коллективе 37 покчи эктӥсьёс пырисько, «ЭРА» группае 28 нылпиос ветло, тросэз Балтась школаысь дышетскисьёс луо, тужгес бадӟым «Восторг» эктон коллективе 45 нылпи пыре.

— Эрик Геннадьевич ас ужезлы сётскеменыз, тыршыса ужаменыз, каньыллыкеныз троссэ синмаськытэ. Соин но сое вань анай-атайёс, нылпиос, дышетӥсьёс гажало. Выль вормонъёсы вутскыса, тыршемезлэсь бервылъёссэ кема аръёс ӵоже шӧдыса ужаны мед кылдоз солы. Нылпиослы сётэм ужез аслыз умоен мед берытскоз, — шуэ Балтась шоръёзо школаысь визьнодан ужъёсъя директорлэн воштӥсез Руфия Закирова.

P.S. Кемалась ӧвӧл Эрик Васинкинлы кема аръёс ӵоже тыршыса ужамез понна «Татарстанысь культура удысысь сӥё-дано ужась» ушъямон ним сётӥськиз.