«Бельгы ортчытон но быриз ни…»

— Карек-Серма гуртын жугиськон бере гинэ шай усьтӥське, со дырозь кулэмъёсты Ципья шае ватыло, Черк вань дыръя, черкын вӧсяса ватылӥллям. Кулэмъёсты буре вайыны али гуртысь шае ветло: тулыс но сӥзьыл кисьтонэ но Семык празднике. Шай усьтэм бере, шумотэ Ципья шае, нош гуртэ ӟучарняе ветлӥзы. Табере Ципья шайысь кулэм ӵыжы-выжыосты тодӥсьёс ӧвӧл ни, соин ик гуртэ гинэ ветло на. Шайвылын кулэмъёсты буре вайылӥзы, собере нюлэскысь одӥг возе потыса, кыре кулэм-быремъёсты вӧсяллязы. Кыре кулэмъёсты буре ваёнэз Бельгы шуо вал. Бельгы — бигер кылысь «Пус» шуэм луэ. Бельгыын вӧсяськемзы бере, шулдыръясько вал: экто, кырӟало, Жадёнэз ик ӧз тодылэ. Укыр чебер кылӥське вал кык полэс бадӟым котырскыса, 2-3 куараен «веник» кырӟан! Бельгы ортчытон но быриз ни. Малы, пе, кулэмъёсты буре ваем бере шулдыръяськод шуыса, устояськисьёс луизы. Но озьы ке но, ӝыт клуб дорын шулдыръяськон ортчыто. Но со мукетгес ни. Бен, улонын ваньмыз вошъяськылэ ук.., — тодаз вае азьло аръёсы Семык праздниклэсь ортчемзэ Карек-Серма гуртысь Василий Никитин.