Бусы ужъёс бере кылемез уг ярато

Кылем арняе «Борнаклэн» бусыосаз ужан визитэн вуылыкумы (со вал нуназе дас час котырын), бусыын тыршисьёс ужаса жадиллям вал ини. Пӧсь, тӧлтэм куазь ужасьёсты эшшо но жадьытэ ук.

— Пӧсь-а луэ, кезьыт-а — котькыӵе куазен ужаны дышемын ини ми ваньмы но, — пумита бригадир Вазих Хакимуллин. — Бусыосын нуналаз но часаз гинэ ӧвӧл, минутаз но секундаз ваньзэ ужаны вутсконо.

Кызь вить арлэсь тросгес та удысын ужась бригадир умой тодэ: бусы ужъёс бере кылемез уг ярато. Бригадирен соглаш луэмзэ вераз валтӥсь агроном Раниль Ахмадуллин но.

— Шумпотыса вераны быгатӥсько, милям али дыре вань ужъёс планъя мыно, бере ум кылиське. Кизёндырез ӵуказе йылпумъяломы шуыса малпасько (вераськонмы 12 куартолэзе луиз — Н. Ж. ), огъя кизён ужъёслы дас ньыль нунал кулэ луиз. Али тани кукурузаез, люцернаез, тысё юосты кизиськомы, — вера Раниль Наилевич. — Тулыс кизён площадьмы 1236 гектар. Солэн 250 гектарез кукурузалы, 652 гектарез тысё культураослы, 163 гектарез люцерналы чакламын, со сяна, 334 гектар кормосмесьлы.

Тямысэтӥ арзэ агроном луыса ужась воргорон Казаньысь Аграрной университетэз йылпумъям, соин аслэсьтыз ужзэ со тодыса, кулэезъя быдэстэ. Татын тыршисьёсын ужаны (нялтас вераса, «Борнак» обществоын тросэз ужасьёс удмуртъёс — Починка но Турья гуртын улӥсьёс — Н.Ж. ) но кельше вылэм солы. Кызьы пусйиз Раниль Наилевич, ужасьёсыз ӧжыт верасько, но трос ужало. «Соосын огъя кыл но шедьтыны капчи, ужзэс но соос ӟеч тодо, тросэз опытэн ужасьёс. Асьтэос соосын вераськыса, тае умой валалоды», — шуиз но агроном, ужасьёс доры келяз.

Нырысь ик Турья гуртысь Вадим Антоновен тодматски.

Вадим татын нырысетӥ арзэ гинэ ужа вылэм али. Казаньысь лэсьтӥськонъя колледжын дышетскем егит пияшлэн гуртэ улыны но ужаны бертэмез потэм, соин со аслэсьтыз малпанзэ улонэ пыӵатэм, «Борнаке» водитель луыса ужаны интыяськем. 

— Кылем арын гуртэ бертӥ ини, городын улэме ӧз поты. Тани татчы ужаны интыяськи. Аслэсьтым ужме кельшытӥсько. Ӵукна лыктыса, “КамАЗме” учкисько, утялтӥсько. Кизён ужъёсын но выри мон, тани мыным ваньмыз ласянь татын ужась воргоронъёс юртто. Татын тросэз ужасьёс удмуртъёс, Турья но Починка гуртысь воргоронъёс. Соин ваньзы тодмоосы шуыны луэ, — маде Вадим. — Тани, ваньзы татын ужало.

Милемыз синйылтыса, ужзэс кельтыса, кык воргоронъёс матэктыны кутскизы. Матэгес лыктэмзы бере, одӥгзэ соос пӧлысь соку ик тодмай: со вал Николай Асаков. Николай агай татын куамын ар ужа ини. 6-тӥ классэ йылпумъямез дырысен гужемъёсы комбайнёрлэн юрттӥсез луыса ужам Николай туннэ нуналэ ас ужзэ вить чиньызэ кадь тодэ. Ӧжытак вераськеммы бере, со, серекъяса, ассэ «коренной колхозник» шуиз, колхозэ выжы но, пе, лэзи ини, порыны но, пе, уз луы.

— 10 классэз йылпумъяме бере ини комбайнэ пукси, собере кык ар армиын служить кари, бертыса кык ар ӵоже Ципьяын ужай. Нош отысен ини «Борнаке» интыяськи, — шуэ Николай агай.

Та дырозь техникаен ужам воргорон туннэ нуналэ ассэ бусыын юн-юн возе. Тулыс кизён ужъёсы пыриське, гужемзэ комбайнэн ортчытэ. Толалтэ кивалтӥсь мар ужаны косэ, сое быдэстэ вылэм. Али ВТГ гусеничной тракторен ужа. 

— Ми татын ваньмы но кемалась ужаськомы ини, соин ужлэсь радзэ умой тодӥськомы. Мар карыны косӥзы, сое быдэстӥськомы, — вераськонамы итӥське вӧзамы сылӥсь воргорон. — Веранэз ӧвӧл, толалтэ сокем трос уж ӧвӧл ке но, тэк ум пукиське. Фермаын, гаражын котьку уж вань.

Та воргорон Турья гуртысь Кузнецов Виталий вылэм. Виталий агай ньыльдон ар сеялкаен кизён ужъёсы пыриське вылэм ини. «Борнакын» самой трос ужасьёслэн одӥгез шуыса гожтӥ ке, уг янгыша. «Гуртлэн улонэз понна сюлмаськиськомы ми, гуртэз быдтоно ӧвӧл. Соин туж шумпотӥськомы, егитъёс татчы ужаны бертӥзы ке. Мед ужалозы, мед тыршозы шуиськомы, быгатэммыя юрттыны тыршиськомы. Каньыллыкъёс но туала дыре трос. Тани «Борнак» обществоез гинэ басьтомы. Турынзэ но, курозэ но, кормосмесьсэ но сёто. Али сёто гинэ но ӧвӧл, колхоз тракторъёсын доре вайыса радъяса но кельто. Та понна обществомылэн кивалтӥсезлы Назипов Рафкат Накиповичлы бадӟым тау шуыны кулэ, — шуо кыкназы ик пиосмуртъёс. — Соин егитъёс тросгес ужаны лыктысалзы ке, ми шум гинэ потысалмы».

Та кылъёсын соглаш луиз мукетыз механизатор, Турья гуртысь Герман Коняев но.

— Зэм, егитъёслы оскыны кулэ. Туала дыре соос но милемыз дышето, ми гинэ соосты ӧвӧл. Егитъёсын но, опытэн механизаторъёсын валче ужаса, умой кужым кылдыто шуыны луэ, — маде воргорон.

Герман Михайлович но «Борнакын» кема аръёс ӵоже тырше ини — 1986-тӥ арысен. Бусые вуон нуналэ со кормосмесь кизёнэн выре вал. Востэм механизатор, милемын вераськонлэсь пегӟон понна, ГАЗ-53 машинаяз пуксем вал, нош дораз мынэм бере, туж шуныт но ӟеч мылкыдын вераськиз. Солэн колхозын ужамтэ ужез кыльымтэ ини. Трос аръёс ӵоже со «Борнак» обществоысь азьмынӥсьёслэн одӥгез, сое агрономзы но ушъяса вераз. Солэн верамезъя, Герман агай ужзэ рос-прос быдэсъясь пиосмурт.

Та дыре ик обществолэн мукет бусыяз Турья гуртысь Анатолий Филиппов культивировать карон ужен выре вал. Тямыс ар ӵоже Беларус (МТЗ-1221) тракторен ужам механизаторлы 2019-тӥ арын выль Кировец К-742 тракторез оскиллям.

— Тыршыса ужало шуыса сётӥллям, дыр, — вера та пумысен ачиз воргорон. — Али тани шумпотыса выль тракторен культивировать карисько, со дырозь усыяса ветлӥ. Лумбыт нуналмы татын ортче шуыны луэ ини. Ӵукна куать часысен ӝыт сизьым часозь татын луиськомы. Толалтэзэ пӧртэм ужъёсты ужасько. Мынам кузпалэ но, Ирина, «Борнакын» ик ужа, со зоотехник-селекционер.

Ужезлэсь куспетӥ каронтэм понна, Анатолий Александровичен кема ӧй вераськы. Агрономен Раниль Ахмадуллинэн сюрес кутӥмы куинетӥ бусые. Отын куинь ужасьёсын пумиськыны быгатӥмы. Турьяысь Иван Зайцев колхозын куатетӥ арзэ гинэ ужа ке но, ас ужезлэн усточиез луыны вутскем вылэм ини. Туэ со бусыосын культивировать но карем, усыям но, катковать но карем. Соин артэ Починка гуртысь егит пи Алексей Иванов сылэ вал. Алёша сярысь газетэ гожтӥськем вал ини. Казаньын дышетске ке но, со арлы быдэ гуртэ бертыса кизён ужъёсы мыло-кыдо пыриське. Гужемзэ но татын ортчытэ. Куинетӥез воргорон — Починкаысь Николай Константинов. Со доры лыктыкумы ик, агроном Николай агай сярысь ушъяса вераз: «Тӥни, МТЗ-82 Белорус тракторез дорын сылэ. Самой кылкутымон ужъёсты солы оскиськомы. Туж тыршись, туж быгатӥсь воргорон со». Нош Николай агай киыныз шонтыса, шуиз: «Ужаны сётэм ужез быдэстоно ини со». Со нуналэ Коля агай люцерна кизён ужъёсын выре вал. Толалтэзэ со но, мукет механизаторъёс кадь ик, фермаын яке гаражын ужа, нокыӵе ужлэсь уг палэнскы.

— Асьтэос адӟиды, бусыын механизаторъёслэн трос вераськыны дырзы но ӧвӧл — ужзы трос. Планлэсь кылеммы уг поты ке, одӥг минутэз но тэк пукыны уг яра. Вылаз ик ужасьёсмы но тыршисесь, урод кылэн вераме уг луы, ваньзылы тыршемзы понна тау кариськомы, — йылпумъян лэсьтӥз агроном.