Чакара - 2014

Татын витетӥ ползэ ини вашкала гуръёслы сӥзем «Чакара» фестиваль ортчиз. Пусйыны кулэ, та ужрадлы кичӧлтӥсь луиз Камсьӧр удмуртъёслэн Огазеяськонзы. Башкириысь Пичи Качак гурт вӧзысь кужым сётӥсь «Чакара» гурезьзылэсь нимзэ фестивальлы сётӥллям. Озьы со, удмуртъёсты огазеяса, вашкала легендазылэсь пуштроссэ азинтэ - удмуртъёсты огазея но лул кужым сётэ.

Кылем арын та фестивале асьме районысь коллективъёслы пыриськыны ӧз кылды - Г. Тукайлы сӥзем ужрадъёсын сэрен луонлыкъёсмы ӧвӧл шуизы. Кылем арынэз понна Удмурт Элькунысь Йӧскалык политикая министерствоысен ог-кык толэзь азьвыл ини лӧпкатыса улӥзы, таяз аре лыктытэк эн кыле ни шуыса. Туэ но мугъёс шедизы: Выль арысен али дырозь но районамы финансовой операциос «кынтэмын» - нокытчы уксё уг кӧчыриськы (нимысьтыз Минфин пыр сяна). «Тӥледыз Иже лэзьыны луонлыкъёсмы ӧвӧл», - шуыса валэктӥзы. Тау Удмуртилэн культурая министрезлэн воштӥсезлы, асьме улосчимылы - Пётр Павлович Даниловлы. Со райисполкоме жингыртэмен, луонлыкъёс кылдӥзы. Озьы асьме районысь удмуртъёслэсь лул узырлыксэс - фольклорзэс учкисьёслы возьматӥз Ӟаны Культура юртысь «Шулдыр ӝыт» калык ансамбль но.

Кыкетӥ нуналаз Калыкъёслэн Эшъяськон юртазы семинаръёс, котырес ӝӧкъёс, фото-, видеосессиос ортчытӥськизы, но удмурт кылын поттэм «Пузкар» нимо художественной фильмлы презентация радъяськиз.

Планъя куинь час интые ньыль но ӝыны час кыстӥськем концертэз учкисьёс кужмо кичабонъёсын дунъязы, телефонъёсазы но видеокамераосазы уськытъязы - интернете но интыяллям ини. Озьыен, гажано лыдӟисьёс, «Чакара» фестивальысь куд-ог номеръёссэ учкыны быгатӥськоды тӥ но!

Фестивале пыриськемъёслэн нимынызы тау кариськомы Камсьӧр удмуртъёслы, Удмуртиысь Йӧскалык политикая министерстволы, Данилов Пётр Павловичлы, районысьтымы Культурая отделлы но тӧроослы: Р.Р. Нутфуллинлы но Р.И. Шакировлы.

Калык фольклормес туж быгатыса, мур пуштросъемо карыса возьматэмзы понна НКА-мылэн нимыныз тау кылме верасько Ӟаны культура юртысь «Шулдыр ӝыт» ансамбльлы но кивалтӥсезлы Ольга Николаевна Кунаевалы. Котькытчы вутско, котьку но дась соос - визь дыр-а войдыр-а паймыса уг пуко, калыклэсь мылкыдзэ жуто. Азьланяз пумитады кечъёс, коньыос гинэ азьдэс медаз басьтылэ ни таяз кадь!