Дано ним

4-тӥ коньывуонэ Муса Джалиль нимо Бигер академической операя но балетъя кун театрын Калык огазеяськон нуналлы сӥзем сӥё-дано ужрад ортчиз. Отчы Татарстанлэн Раисэз Рустам Нургалиевич Минниханов но пыриськиз. 

Сӥё-дано ужрадын трос йӧслыко Татарстанлэн этнокультурной азинсконаз бадӟым люкет пыртэм муртъёслы но творчествоя коллективъёслы кун данъетъёсты сётӥзы. 

Шумпотымон, данъямъёс пӧлын вал Покчи Лӧзя шоръёзо школаысь удмурт кылъя но литературая дышетӥсь, ёросысь удмурт кылэз но литератураез дышетӥсь педагогъёслэн методической огазеяськонзылэн кивалтӥсез Антонова Наталия Львовна. Наталия Львовналы вылӥ кун данъет — «Татарстан Республикаысь дано дышетӥсь» ним — сётӥзы. Сюлмысь ӟечкыласьком но ужез ӟеч емышъёсын, выль вормонъёсын азьланяз но мед шумпоттоз шуыса сӥзиськом.

— Огъя тыршемен басьтэм дано ним, — дунъет сётэ Наталия Антонова басьтэм данъетэзлы. — Дышетӥсьлэн, нылпилэн но анай-атайлэн валче ужамзылэн емышез. Соин но бадӟым тау кылъёсты верасько удмурт семьяослы, анай-атайёслы. Угось йӧскалык визьнодан ӵапак семьяысен кутске.

Туспуктэм: https://rais.tatarstan.ru/