Дышетӥсьёслы пумтэм тау!

Дышетӥсь шуид ке, син азе тросэзлэн чылк-чылк дӥсяськем, тӧдьы блузкаен, шонер юбкаен, люкам йырсиен, чыльк-вальк туфлиосын нылкышно яке таза мугоро костюмен воргорон пуксе. Солэн одӥг кияз книгаос но тетрадьёс, мукетаз — указка. Со пальышась ымнырын гинэ классэ пыре, нылпиосызлэсь ужъёссэ юалляське но выль дышетскон нуналэз усьтэ. Озьы вал, малпасько, тросэзлэн. 

Мон понна туала но азьло дышетӥсьёслэн пӧртэмлыксы одӥг гинэ — туала дышетӥсь со анай но, атай но, эш но, гожъяськись но, лыдӟиськись но, психолог но, программист но. Ӧвӧл, дыр, дунне вылын удыс, кытын дышетӥсь ассэ ӧз эскеры.

Азьло вакытысь дышетӥсьёс зэмзэ но ДЫШЕТӤЗЫ, соин но трос луизы научной открытиос, кылдытонъёс, огъя вераса, трос вал визьмо адямиос. Туннэ нуналэз учкиськом ке, котыр блогеръёс. Нош соос пиналлы кулэ луись тодон-валанъёсты сёто меда?

Арысен аре дыше-тӥсьлы секытгес йӧтэ нылпиосты дышетыны. Куронъёс вылӥесь, уждунэз уг тупа, эшшо ке нылпиос но анай-атайёс дышетӥсьлэсь вылӥ пуктэмын. Азьло дыре дышетӥсь шоры кепыраса учконо вал, дышетӥсьёс туж визьмо, вылӥын адӟисько вал, нош али та ваньмыз кытчы ке ышемын.

Мыным кык школаын дышетскыны шуд усиз. Самой «ческыт» но шуныт тодэ ваёнъёсы котьку ик самой нырысетӥ пичи школаеным герӟаськемын. 11 ар ӵоже трос гинэ ды-шетӥсьёсы вал. Ваньзы пӧртэмесь, котькудӥзлэн аслаз сямыз. Котьку кинлэн ке урокъёсаз шумпотыса мынӥсько вал, кинлэн ке урокъёсыз туж кема кыстӥсько вал. Соин но, дыр, шуныт малпанъёсам кылизы сыӵе дышетӥсьёс, кудъёсызлэсь улонын кулэ луись тодон-валанъёсты басьтӥ.

Мон понна вань ды-шетӥсьёс улонам трос умойзэ лэсьтӥзы. Куддыр, куатаськон вакытъёс но луылӥзы, но шумпотонъёс тросгес тодэ лыкто. 

Покчиёзо школаын дышетскон сюресмы туж каньыл ортчиз. Татын дышетӥзы куинь дышетӥсьёс — Светлана Карабаева, Светлана Щербакова, Наталья Уськеева. Соослэн небыт луэмзы ик нылпиослэн пушказы юн оскон кылдытӥзы, дыр. Ми ӧм кышкалэ янгышаны, ӧм кепыралэ асьмеды пӧртэм удысъёсын эскерыны, ӧм палэнске сценалэсь, малы ке шуоно милям вал юн пыкетъёсмы, кудъёсыз котьку мылкыдэз ӝутӥзы, ушъязы. Соос шоры учкыса, асьмеос но дышетӥсь луыса шудӥськом вал. Нош шуныт атмосфераын тетрадьёсты эскерон — со нимысьтыз йылол луиз. Дышетӥсь котыре люкаськыса, огъя вань янгышъёсты учкылӥм, ог-огмылэсь гожъямъёсмес чакламы. Школаысь бертон мылкыдъёсмы ик ӧй вал. Со луиз самой шулдыр вакытъёсмы. Троссэ покчи классъёсысен ик тодыса будӥм. Со понна дышетӥсьёслы бадӟым тау шуэме потэ!
Кыкетӥез школаын ини «территория выживания» луиз. Тӥ понна валамонгес карон понна: пичи гинэ гуртысь нылпиосты бадӟым кык этажъем школае куштӥзы. Бадӟым класс, трос нылпи, тодмотэм дышетӥсьёс, котькудӥзлэн аслаз предметэз, гон пушкысь потэм чипыослы кадь шимес потӥз. 

Татын соку ик тодэ лыктэ нырысетӥ директормы — Иван Васильевич Ермаков. Соку со мыным туж кышкыт потэ вал: бадӟым куараё, йыгмыт вамышъясь, куронъёс пуктӥсь пиосмурт. Дышетӥсьёс но дышетскисьёс котьку шыпыт луо вал солэн вуэменыз. Со котьку школаез эскерыса коридоръёс кузя ветлӥз. Сӥё-дано луэмез школаын гинэ уг адӟиськы вал, ёросысь кивалтэт но сое туж вылӥ дунъяз. Солэн кивалтэмез улсын котькуд нылмурт школаысь аслаз «узырлыкеныз» потӥз. Сыӵе директоръёс туннэ нуналэ луысалзы ке, котькуд школаын ваньмыз лад-лад мынысал, дыр. Но улон аслэсьтыз кылзэ пыртэ. Туннэ директоръёс асьсэлэсь кылзэс веразы ке но, кивалтэт азьын соос соку ик дугдытӥсько. Та улонлэн реалиосыз!

Дышетӥсьёс но туж трос вошъяськизы. Классэн кивалтӥсьмы — Светлана Николаевна Павлова — котьку чебер дӥсяськыса лыктэ вал. Ӵужапаелэн верамъёсызъя, егит дыръяз дышетскись нылъёс котьку со шоры синмаськыса учко вылэм, сокем чебер адӟиськем солэн дӥсяськемез но йырси радъямез. Ми понна со 7 арлы матысь эш луиз. 23 кузя пиналъёсын котьку шумпотон гинэ ӧз луы, дыр. Бадӟым классын котьку кыӵе ке споръяськонъёс кылдӥзы, но классэз одӥг ужась атмосфераын будэтыны быгатӥз.

Дышетӥсь-предмет-никъёс но котьку милемыз улонысь учыръёслы тупаса улыны дышетӥзы. Соку гинэ лыктэм егит веськрес мугоро дышетӥсь — Надежда Александровна Спиридонова (соку Трокова — ред.) — история но обществознание предметъёсты улонэн герӟаса валэктылӥз. Сыӵе шумпотыса возьмасько вал солэсь урокъёссэ! Предметъёсты но туж яратӥ, пӧртэм олимпиадаосы но пыриськи, экзамен но сётӥ. Солэн урокъёсыз мон понна туж тунсыко пото вал. Мӧзмыт лекци амалэн урокъёс ӧй вал со, пӧртэм брейн-рингъёс, кенешонъёс, шудонъёс пыр тодэм датаос али но йырын уло на. 

Спортэн но эшъяськыны татын юрттӥзы. Руслан Эрнстович Михайлов — мон понна одӥгез тужгес усто но данъяськымон дышетӥсь. Со доры котьку нылпиос кыстӥсько. Ми но азьвыл туж кышкамы, собере каллен дышыны кутскимы. Кызьы гинэ эн вера, со пиослэсь зэмос воргоронъёс кариз, нош нылъёсты котьку ас тазалыксэс эскерыса улыны дышетӥз. 

6 ар талэсь азьло мон нош ик вуи аслам дышетскем школаям, табере ини дышетӥсь статусэн. Асме дышетэм дышетӥсьёс табере нимтулъя вазьыны кутскизы. Школаысь коридоръёс, кабинетъёс воксё мурт пото ини, но дышетӥсьёслэн сюлмысь сётэм тодон-валанъёссы дышетоно нылпиослы выжо. Бен, школаын дышетӥсь луыса кема ӧй ву — мукет ӧнере выжоно луи, но али ужам но соослэсь веранъёссэс ӵемысь тодам вайылӥсько на.

Гажано дышетӥсьёсы! Сюлмысь тау карисько тӥледлы бадӟым но дано ужды понна! Тӥледлы луыса мынам йырам самой ӟеч малпанъёс гинэ каръяськизы. Ас примереныды тӥ трос гинэ адямиослы дуннее сюрес усьтӥды. Данъяськисько тӥледын, пумтэм тау карисько вань верамъёстылы! Азьланяз но сюресъёсты котьку вольыт мед луозы, улонады яркыт буёлъёс гинэ мед пумиськозы, нош сюлэм шунытты тӥледыз ӟырт кезьытэ но мед шунтоз!