Дышетӥсьлэсь нимзэ данэн нуллӥсьёс

Сизнерысь одӥг семьяысь ньыль нылкышноос — Зоя Ермолаева, Ольга Трокова, Таисия но Наталья Ермолаеваос — покчи классъёсын ужась дышетӥсьёс.

Статьяме гожтыны кутскытозям ик вуоно геройёсы кыӵе ке семья праздникъёсы валче люкаськыкузы но, огшоры пумиськыкузы но одно ик вераськоназы дышетон удысэн герӟаськем темаосты йӧтытэк уг кельто, дыр, шуыса малпай. Малы ке шуоно соос ваньзы но дышетӥсьёс. Вылаз ик ньыльназы но покчи классъёсын ужасьёс.

Малпанъёсам чик но янгышаськымтэ. Туала нылпиос, дышетон система, анай-атайёсын юн герӟет возён, дышетӥсьёслы сӥзем пӧртэм конкурсъёсы пыриськон — та но мукет темаос соослы ваньзылы туж матын, малы ке шуоно та котькуд дышетӥсез сюлмаськытӥсь юанъёс. Шонергес вераса, котькуд зэмос дышетӥсез, аслэсьтыз ужзэ яратӥсь дышетӥсез сюлмаськытӥсь юанъёс. Юнме гинэ уг верало, дыр, дышетӥсь — ӧнер ӧвӧл, со призвание шуыса.

Зоя Мироновна Ермолаева — вань улонзэ Сизнер гуртысь покчиёзо школалы сӥзем дышетӥсь. Гуртысь кӧня нылпилы со тодон-валан сётэм, кӧня пиналъёсты визьнодам, Сизнер гурт школа понна кӧня ӟеч ужъёсты лэсьтэм  — тае ваньзэ лыдъяса но уд быдты.

…Турья гуртын вордскем Максимова Зоя пинал дыръяз дышетӥсь луыны воксё малпамтэ — солэн эмчи луэмез потэм. Озьы, гуртысьтыз покчиёзо школа бере 8-тӥ классэз Ӟаны школаын йылпумъяса, нош собере 10-тӥ классозь дышетсконзэ Ципья школаын азьланьтыса, нылмурт Елабугаысь медициная дышетскон юртэ дышетскыны пырыны малпа. Но отчы дышетскыны пырыны солы кылдымтэ.  Одӥг арскын, 1972-тӥ арын, Глазовысь педагогической институтэ дышетскыны пыре егит Зоя. Тӥни озьы малпамтэ шорысь со дышетон удысэ вуэ. Озьы кылдэмезлы со шумпотэ гинэ — Зоя Мироновналэн верамезъя, дышетӥсь луэмез сярысь со огпол но жалямтэ, шумпотэм гинэ. 

— Дышетскыны мыным туж кельшиз. Вуоно ӧнере но аслым тупа вал. Соин мынам мукет удысын ужаны малпанъёсы но ӧй вал ини. 1972-тӥ арын дышетсконме йылпумъяме бере, вордскем гуртам бертыса, Гондыргуртысь школае ужаны интыяськи. Гуртысь пичи школаын монэ шуныт пумитазы, мынам нырысетӥ ужан, нырысетӥ опыт басьтэм интые со. Котьку ӟеч кылъёсын гинэ со дыръёсты тодам вайисько мон, — шуэ дышетӥсь.

Гондыргуртын егит дышетӥсь кемалы уг ӝегатскы — Сизнер гуртысь школаын инты луэмысь, 1973-тӥ арын отчы ужаны выже. Со дырысен 2010-тӥ арын дано шутэтсконэ потытозяз Зоя Мироновна Сизнер школаын тырше. Со гуртэ ик картлы кошке, улонзэ отын азьланьтэ.

— Ужаны котьку шумпотыса ветлӥ, малы ке шуоно нылпиосме туж яратӥсько вал. Котькудзэ матын кари, одӥгзэ но ӧй люкы. Нылпиосы асьсэос но визьмоесь вал — огпол но возьытэ ӧз уськытэ, котьку тыршыса дышетскизы, асьсэды умой возизы, «4»-лы но «5»-лы гинэ дышетскыны тыршизы. Соос школаысь доразы бертыны но уг дырто вал, гидкуазьын валче люкаськыса шудыны, вераськыса пукыны яратӥзы. Урокъёс йылпумъяськем бере мон дорын но пуксьыса пукыны яратылӥзы — мон тетрадьёсты эскерисько, нош соос — вӧзам, — Сизнер гуртысь школаын ужан аръёссэ пальпотыса тодаез вае дышетӥсь.

Зоя Мироновна дышетскисьёсызлы, кулэ дыръя, небыт кылъёссэ но жалямтэ, соослэн мылкыдъёсынызы тунсыкъяськем, но со дыре ик дышетӥсьлэсь чурыт кылзэ но вераны быгатэм. Но зэмзэ вераны кулэ: тышкаськыкуз но, аслаз карыса тышкаськем со нылпиосты.

— Тани тыныд но аслад лыдӟисьёсыд матын, тон соос азьын кыӵе ке кылкутон шӧдӥськод, дыр, — валэктэ мылкыдъёссэ Зоя Мироновна, — мон но озьы ик аслам дышетэм нылпиосы азьын бадӟым кылкутонме шӧдӥ, соосты дышетыны, визьноданы тырши. Кинлы ке та уж секыт уз поты, дыр, малпалод — мар секытэз? Сизнерысь школа — со пичи гурт школа, дышетскисьёс трос ӧвӧл… Но со дышетскисьёс ведь садике ветлымтэ нылпиос вал — букваосты, лыдпусъёсты соос уг тодо на — дышетыса утьы соосты… Урок бере кыльыса дышетэм учыръёс но туж трос луылӥзы. Со сяна, дышетӥсьлэн кагаз ужъёсыз но котьку трос вал. Но нылпиос котьку мынэсьтым сюлэмме буйгатыны быгатӥзы.

Яратоно ужаз мыло-кыдо тыршыса, Зоя Мироновна валаса но уг вутты, кызьы Сизнер гуртысь школаын ужанлы со 38 ар улонзэ сӥзе. Дано шутэтсконэ потыны вуон дыраз, 55 аресэз тырмем бере, Зоя Мироновналэн Анатолий кузпалыз кулэ. Со секыт дыръёсы но дышетӥсьлы выль кужым шедьтыса улонзэ азьланьтыны ужез, нылпиос юртто. Та понна Зоя Мироновна соослы котьку тау кароз.

— Пенсие потэм бере кыӵе мӧзмыт кылиз мыным, ачим гинэ тодӥсько, — азьланьтэ веранзэ дышетӥсь. — Улонлэн кыӵе ке валтӥсь люкетэз йылпумъяськиз, быриз кадь потэ вал. Ма, мон али но мӧзмисько, тае уг но ватӥськы. Но жалян мылкыдъёсы воксё ӧвӧл. Трос нылпиослы тодон-валан сётӥ, табере мынам дышетэм нылпиослэн нылпиоссы, внукъёссы но дышетскисьёс ини… Улон интыяз уг сылы, ваньмыз воштӥське, аръёс ортчо, милемыз егит дышетӥсьёс вошто — та улон. Солэсь нокытчы уд пегӟы.

Зоя Мироновна аслэсьтыз куинь нылпиоссэ но ачиз дышетэм, мукет нылпиос пӧлысь соосты ноку но висъямтэ. Нош кыӵе со шумпотэ, Ольга нылыз дышетӥсьлэсь ӧнерзэ бырйиз шуыса...

P.S.: Зоя Мироновна арлы быдэ 25 куартолэзе кык полэс праздниксэ пусъе — берпуметӥ гырлы нуналэ солэн вордскем нуналэз. Туэез праздник со понна тужгес вунэтонтэмез луоз — дышетӥсьлы 70 арес тырмоз.

(Азьланьтонэз вань)