«Эктон дыр» – удмуртъёслэн огазеяськон интызы

Калык эктонъя «Эктон дыр» улоскуспо конкурс самобытной талантэн адямиосты шараян, удмурт калык эктон мерасэз (наследиез) вӧлмытон, пӧртэм интыосысь лулчеберет учреждениос пӧлын творческой кусыпъёсты паськытатон ужпумен радъяське. 
Удмурт калыклэн лулчеберет удысын пӧртэм пумо чебересь но тунсыко эктон-кырӟан сямъёссы туннэ нуналэ нокинэ но уг паймыто кадь ини.

Нуналысь нуналэ выль но выль амалъёсты шедьтыса, гуртысь калык тырше вашкала йылолъёсты егитъёслэн улоназы пыртыны. 

Шумпотымон, асьме ёросамы но пӧртэм йӧскалыко вожвылъяськонъёс ортчо. Соос пиналъёсты но, егитъёсты но, мӧйыосты но палэнэ уг кельто, ваньзылы инты висъямын, ваньзы огкадь луонлыкъёсын. Озьы ик ӵошен огкылысь тыршо вордскем анай кылэз дано карыны. Мукет калыкъёс но асьме лулчеберетэнымы тунсыкъясько, синмасько узыр чеберманъёсмылы, задоресь эктонъёсмылы но сюлмысь кырӟанъёсмылы. Удмурт калыкысь потэм дано артистъёсмы, тодосчиосмы, политической удысын тыршисьёсмы, азьветлӥсьёсмы но трос.

Бускель Кукмор городысь лулчеберетъя юртын кылемаз арнянуналэ (пятницае) котырысь удмуртъёс люкаськизы аспӧртэмлыко эктонъёсынызы паймытыны. Кукмор ёросысь, Балтась ёросысь, Набережной Челны городысь, Марий-Элысь Карлыган гуртысь коллективъёс та ӝытэз чебертӥзы но удмурт калык лулчеберетэз синмаськымон возьматӥзы. Эшлыко пумиськонэ люкаськем коллективъёслэн сюлэм шунытсы но ӟеч мылкыдзы ужрадлэн кутсконаз ик шӧдӥськиз.

Кукмор – удмуртъёслэн аспӧртэмлыко люкаськон интыез. Татын удмуртъёс пӧлын вожвылъяськон мылкыд ӧз шӧдӥськы, котькуд коллектив шумпотыса асьсэ дорысь иворъёсын тодматӥз, сюлэмшугъяськонъёссэ но шараяз. 

Нырысь ик, Кукмор улос аслаз узыр но паймымон инфрасӧзнэтэныз висъяське. Лыктэмъёсты пумитало, котькуд ёрослы нимысьтыз бӧлет висъямын, ваньзэ валэкто. Сыӵе шуныт пумитамзы сюлмын таукарон мылкыдъёс гинэ кылдытэ.

Сцена вылын 19 аспӧртэмлыко эктонъёс мылкыдэз ӝутӥзы. Концертной номеръёс трос ӧй вал ке но, ваньмыз каньыл но капчи ортчиз. Котькудӥз аслэсьтыз аспӧртэмлыко луэмзэ но эктон устолыксэ возьматӥз. Сцена вылын адӟыны луиз пиналзэ но, мӧйызэ но. Ӝутскем мылкыдъёссы висъяськыны ӧз лэзе.

Вань эктонъёсты адӟыса, жюри йылпумъянъёс лэсьтыны вис басьтӥз. Со дыре ик артистъёс но учкисьёс лулчеберетъя юртлэн холлаз шулдыръяськыны кутскизы, куд-ог артистъёс синпельлы туспуктэмъёс лэсьтӥзы, пиналъёс шудӥзы, арлыдоос гуртазы. Со дыре ик мызган гуръёслэн задорлыкез быдэс Кукмор ёросэ кылӥськиз кадь! Котькуд улосын эктонъёс висъясько ке но, та ӝытэ шулдыръяськон вис ваньзэсты огазеяз. Нокыӵе репетициос лэсьтытэк но, ваньзы огкылысь эктӥзы но, кырӟазы.

Асьме ёросысь та конкурсэ туж узыр программаен номеръёс ваемын вал. Рос-прос дасям стилизованной калык эктонъёс аспӧртэмлыко калык дӥськутъёсын чебертӥськизы. Пиналъёс пӧлын Вуж Кушкет гуртысь «Веснушки» коллектив (кивалтӥсез – Рустам Хасанов) но Ципья лулчеберетъя юртысь «Азвесь гырлы» коллектив (кивалтӥсьёсыз – Елена Демеева, Евгения Михайлова) I-тӥ степенё лауреатлэн дипломеныз пусйиськизы. Асьсэлэн задор эктонъёсынызы но пальышась ымныръёсынызы егитъёсмы жюриослэн сюлэмъёсазы сюрес шедьтыны быгатӥзы.

«Веснушки» коллективын, удмурт нылпиос сяна, бускель Янгул гуртысь кык бигер нылашъёс но экто. Удмурт эктонъёсты вань сюлмысь яратыса, котькуд вожвылъяськонъёсы пырисько. Та понна тау шуыны кулэ анай-атайёссылы, кудъёсыз зэмзэ но калык эшъяськонлэсь инъетсэ пичи дырысен ик пыӵато. Кивалтӥсьсы но бигер, озьы ке но, егит хореограф Рустам Мидхатович вань калыкъёслэн лулчеберетэнызы данъяське, синмаськымон эктонъёс пуктэ. Нялтас вераса, Вуж Кушкетысь «Чибори» ансамбльлэсь эктонзэ дасясь но со ик.

Бадӟымъёс пӧлын но эктонъёс ӟырдыт тыпыртонъёсын кыстӥськизы. Жюриослэн йылпумъянъёссыя, Сырья гуртысь «Сырья зоутъёс» фольклор ансамбль (эктон пуктӥсез – Ираида Чернова), вашкала сямъёсын пачылмем крезьгуро но тӥрлыко «Кубочукен эктонэнызы» III степенё лауреатъёс луизы. Ӟаны лулчеберетъя юртысь «Шулдыр ӝыт» (кивалтӥсез – Алефтина Иванова, эктонэз дасясь – Татьяна Михайлова) калык фольклор ансамбль капчи эктонэныз вань учкисьёслэсь сюлэмзэс басьтӥз но III степенё лауреатлэсь дипломзэ утӥз. Вуж Кушкет гуртысь нылъёслэн «Чибори» ансамбльзы (кивалтӥсез – Светлана Щербакова) «Тыпыртон» эктонэнызы шулдыр мылкыд пыӵатӥзы но II степенё лауреатлэсь дипломзэ басьтӥзы.

Озьы ик нимаз эктӥсьёс пӧлын Дина Михайлова, бубыли кадь лопыръяса, I степенё лауреат луиз. Сцена вылэ потыса, Динамы пальышась ымнырын учкисьёслы но жюрилы капчи эктон кузьмаз. Университетын дышетсконэз но солэн калык лулчеберетэн но эктонъёсын герӟаськемын, малпаськом, Диналэн калык эктонъёслы яратон мылкыдэз ноку уз кысы шуыса!

Котькудӥз та коллектив асьме ёросысь калык понна туж тодмо ини. Соос тыршо вордскем кыллэсь но лулчеберетлэсь дунлыксэ утьыны, вашкалазэ улӟытыны но азьланяз пайдаё ужъёс лэсьтыны.

Вунонтэм ӝыт капчи мылкыдъёс гинэ кельтӥз. Конкурсэз радъямез понна но бадӟым люкет пыртэмез понна тау кареммы потэ Геннадий Ахметовлы но вань юрттэт сётӥсьёслы! Малпасько, азьпалан но кусыпъёсмы юн луозы. Вордскем кылмес вунэтытэк, гажаса но яратыса, ог-огмылы юн пыкет луыса, вормонъёсмылы шумпотыса, азьлань капчи вамышъёсын шонер сюрестӥ огазе вамыштомы!