Элькунамы удмурт лулчеберетлэн нуналъёсыз кыкетӥзэ ортчизы

Та выллем ужрад удмуртъёс понна выль ӧвӧл ини. Кылем арын таӵе форум ортчиз асьме ёросамы. Со сяна, удмурт кыллы но лулчеберетлы сӥзем нуналъёс радъясько Пермь шаерын, Киров улосын, Марий Элын но Башкортстанын.

Та тунсыко но «егит» ужрад бадӟым пуштросэн тырмемын: Россилэн пӧртэм сэрегъёсаз улӥсь удмуртъёсты огазеян но удмурт кылдытос ужез вӧлмытон. Огпаласен, удмурт кылмы но лулчеберетмы понна «нюръяськисьёс» нуналлы быдэ выль амалъёс шедьтыса мукет калыкъёсты бордазы кыскыны тыршо. Мукет паласен, пиналъёслэн вордскем кылзылэсь палэнскемзы малпаськытэ но выль юанэ вуттэ: «Малы удмурт семьяын вордскем нылпиос ӟуч кылын верасько?». Малпасько вал, та юан ноку но гуртъёсын уз кылды шуыса. Но туала тенденциос секыт реалиосы вутто: пиналъёс копак ӟуч кылэ выжо но анай кылзэс уг ни тодо. Та но мукет шугъяськытӥсь юанъёс ик эскериськизы форумын но.

Лулчеберетъя юртлэн холлаз ик нимысьтыз адӟытон радъяськиз. Татын лыктэмъёс синпельлы кузьымъёс но вузъёс басьтыны быгатӥзы. Йӧскалык пужыосын чебермам арбериос котькудӥзлэн сюлмаз нимысьтыз мылкыдъёс кельтӥзы, луоз. 

Ужрадэ пыриськизы дышетон учреждениослэн кивалтӥсьёссы, ТР-ысь удмурт этнокультурной компонентэн школаосысь удмурт кылъя но литературая дышетӥсьёс, удмурт коллективъёслэн но ансамбльёслэн ёзчиоссы. Пленарной заседаниын ТР-ысь удмуртъёслэн национально-культурной автономизылэн но интыысь удмуртъёслэн организацизылэн мерлык понна пайдаё проектъёссы но бервыло ужан амалъёссы возьматэмын вал. Вань ӵектэм проектъёс но ужъёс азьланяз ӧнерчиослы ужан удысъёсазы но юрттозы. 

Удмурт литературной творчествоез вӧлмытонын но проект ужъёсты азинтонын лэсьтэм ужъёсынызы Удмурт Элькунысь ӧнерчиос но тодматӥзы. Ёросъёсысь лыктэм делегациос вераськонэ но мылысь-кыдысь пырськизы. Вань ӵектэм юанъёслы валэктон сётыны тыршизы. 

Форумлэн одӥг люкетэз кивалтӥсьёсын пумиськон форматэн ортчиз. Пленарной заседание пыриськизы ТР-ысь йӧскалык политикая управленилэн кивалтӥсезлэн воштӥсез Евгений Ефимов, Удмурт Элькунысь йӧскалык политикая министр Эдуард Петров, ТР-ысь Кун Кенешлэн депутатэз Ренат Валиуллин, ТР-ысь Дышетонъя но наукая министерстволэн йӧскалык дышетонъя управлениеныз кивалтӥсь Алсу Шарипова, «Удмурт Кенеш» огазеяськонлэн тӧроез Андрей Ураськин. Соос лэсьтэм ужъёссэс возьматӥзы но азязы пуктэм выль ужпумъёсынызы тодматӥзы.

Удмурт лулчеберетъя нунал аслэсьтыз ужзэ ньыль секциосын но семинаръёсын нуиз: куноос этнокультурной дышетон ӵектосъёсты кылдытон; фольклор материалъёсты дышетон, утён но уже кутон; этнокультурной ужрадъёсты ортчытыку-радъяку медиаресурсъёсын пайдаяськон сярысь вераськизы, со сяна удмурт калык кырӟанъёсъя но эктонъёсъя мастер-классъёс ортчизы. Татын котькуд ӧнерчи ас мылкыдызъя быръем вераськонэ пыриськиз. Эктонъя но кырӟанъя мастер-классъёс калыклы кельшымон луизы. Соосты «Айкай» кун театрысь артистъёс радъязы. 

— Дышетӥсьёс нырысетӥ секцилэн ужаз пыриськизы. Татын Удмурт Кун университетысь литертауровед Любовь Фёдорова спикер луиз. Со студентъёсыныз дышетӥсьёслы компьютер пыр ужан амалъёсты возьматӥз, — ивортӥз Балтась ёросысь удмуртъёслэн НКА-зылэн тӧроез Ольга Пчельникова.

Вань официальной ужрадъёс бере, куноосты «Айкай» театрлэн яркыт но чебер концертэз возьмаз. Сюлме пыӵась калык крезьгуръёс но эктонъёс лыктэмъёслы капчи мылкыд кузьмазы. 

Таӵе ужрадъёс тросгес мед луысалзы. Удмурт кыллэсь но лулчеберетлэсь вань чеберзэ шараясь интыосын яркыт кизилиос ӝуатскыса, калыкмылэн данэз эшшо но паськыт мед вӧлмоз!