Форумлэн модераторъёсыз (кураторъёсыз) пӧлын куинез асьме районысьтымы егитъёс

Соос куиньназы ик Казаньысь Калыкъёслэн Эшъяськон юртазы ужало, удмуртъёслэн лулчеберетсы понна сюлмасько, егитъёслы удмурт кыллы но культуралы яратон мылкыд пыӵатыны тыршо. Кылем арын, форум нырысетӥзэ ортчыку но, улосчиосмы мылысь-кыдысь пыриськизы та ужрадэ.

— Калыкъёслэн Эшъяськон юртазы ужамелэн но озьы ик та форуме пыриськемелэн нырысетӥ мугез — выль адямиосын тодматскон. Казаньын тросэз егитъёс, озьы ик удмуртъёс но, ӟуч кылын верасько. Соин но вордскем кыл вунэ. Та бадӟым проблема шуыса нокинлы секрет ӧвӧл, дыр. Соин ик ми, Калыкъёслэн Эшъяськон юртазы тыршисьёс, та форумез ортчытыны малпамы. Кылем арын мон «этноквест» направленилэн кураторез вал. Туэ тани «дизайн» направление кылдӥз, мон отын модератор вал. Зэмзэ ке верано, тросгес адями луоз шуыса малпай, пиос но вуозы, дыр, кадь потӥз. Но... Ма, котьма ке но, форум умой ортчиз шуыса малпасько но оскисько, ужрадэ пыриськем егитъёслэн ӟеч мылкыдъёссы гинэ кылиллям, дыр. Милям валтӥсь ужпуммы — удмурт кыллы, удмурт культуралы саклык висъян борды егитъёсты кыскон, — шуиз Татьяна Константинова.