Габдулла Тукай удмурт кылын но чузъяське

Тукайлэсь кылбуръёссэ удмурт кылэ нырысьсэ Татарстанысь Кукмор ёросысь Выль Канисар гуртын вордскем тодмо удмурт кылбурчи Гай Сабитов берыктӥз.

Пичи дырысеныз бигер кылэз тодыса, со бигер кылбурчиослэсь кылбуръёссэс оригиналысен удмурт кылэ капчиен берыктылӥз. Нялтас вераса, Тукайлэн малпанъёсыз Россиысь калыкъёслэн тросэзлэн кылбурчиоссылэн учконъёссылы тупало. Кылсярысь, солэн одӥгез тужгес но тодмо кылбурез «Вордскем кылы» котьку актуальной кыльылӥз но литературалэн азинскон этапъёсаз сое пӧртэм кылбурчиос берыктылӥзы. 

Гай Сабитовлэн берыктон ужез Г. Тукайлэн творчествоезлэсь пичи люкетсэ гинэ басьтӥз, озьы ке но, солы луыса, удмурт литература нырысьсэ бигер литературалэн дуннееныз герӟаськиз. 

Туала кылбурчиос азьланьто Г. Сабитовлэсь кутскем ужзэ. Бигер классиклэсь кылбуръёссэ берыкто Вячеслав Ар-Серги, Сергей Матвеев, Юлия Разина но мукетъёс. Удмуртиысь калык писательлэн В. Ар-Сергилэн 2011-тӥ арын поттэм кык кылъем «Габдулла Тукай. Шигырьлэр. Кылбуръёс» книгаез та ласянь нимысьтыз пусйымон. Та ужлэн потэмез Тукайлэн вордскемез дырысен 125 ар тырмонэз пусъёнлы тупаз. 

Бадӟым саклык висъя Габдулла Тукайлэсь кылбуръёссэ удмурт кылэ берыктонлы асьме улосчимы, Карек-Серма гуртысь Василий Никитин но.

Ку но кызьы кутскем Василий Петрович дано бигер кылбурчилэсь кылбуръёссэ берыкъяны? Малы? Кыӵе вал солэн нырысетӥ берыктэм кылбурез? Кыӵеесь соос — Тукайлэн кылбуръёсыз? Вань-а кыӵе ке аспӧртэмлыкъёсыз? Секыт-а соосты берыкъяны? Та но мукет юанъёслы со ачиз валэктон сётӥз.

— Берыктылыны кутски 2000-тӥ аръёслэсь азьлогес. Соку школаын бигер кылэз дышетӥ. (Быгатӥд-а, ӧд-а, дышетыны косӥзы). Тӥни со бордысен кутски. Ӟуч кылысь азьлогес ик берыктылыны тупаз, малы ке шуоно удмурт кылбуръёс но кырӟанъёс, сценарийёс шуг вал шедьтылыны. Нырысь бигер, ӟуч нылпи кылбурчиосыз берыктылӥ. Сооос пӧлын ик Г. С. Мухамметшинлэн кылбуръёсыз но вал. Берлогес Г. Тукай но М. Джалиль борды но басьтӥськи.

Тукайлэн кылбуръёсыз секытэсь, соос трос слогъемесь, уноез дас витен. Собере кылбуръёсаз со араб кылъёс пыртылэ, кудъёссэ кыллюкамысь но уд шедьты. 

Тукай гожъя ас улонысьтыз трос курадӟемзэ, адӟылэмзэ, кылбуръёсыз визьнод сётӥсесь.

Нырысетӥ берыктэмъёсы пӧлын «Фатима но Уӵы», «Вордскем кыл», «Вордскем гуртэ», «Арлэн вакытъёсыз». Выль берыктэмъёсы «Удмуртский каждый день» огинын потыло.

Берыктыку учкисько оригиналзэ но, ӟуч кылын потэмзэ но. Оригиналлы матын карыны тыршисько, — шуэ Василий Никитин. 

Нялтас вераса, ар кутсконысен Василий Петрович Габдулла Тукайлэн 140 ар тырмонэзлы сӥзьыса ялэм «Тукайны бергәләп укыйбыз. Читаем Тукая вместе» шуыса нимаськем республиканской литературно-просветительной акцие но мыло-кыдо пыриське, арнялы быдэ сямен Карек-Серма гурт библиотекаын Тукайлэсь кылбуръёссэ лыдӟе.

Ӵектӥськом тодматскыны Василий Никитинлэн Г. Тукайлэсь берыктэм кылбуръёсыныз, кудъёсыз «Удмуртский каждый день» огинын потӥзы. 

ТЫЛОБУРДООСЛЫ

Тӥ эн кышкалэ вал, бурдоос, шорады учкемысь,
Мон уг йӧт тӥледыз, кылзӥсько гинэ мон чирдэмдэс.

Инмарен сётылэм гуръёсты мыным туж мылкыдъям;
Нальык но, пыӵал но ӧвӧл тыбырам но киям.

Кышкатэк кырӟалэ, мон уг йӧт, чик уг йӧт тӥледыз;
Мон уг тодӥськы шат эрикын улонлэсь кадырзэ?!

Эн кышкалэ — умой тодӥсько, мон уг кут тӥледыз;
Кырӟалэ, мон сыло кылзыса, тӥлесьтыд кырӟамдэс.
(1909)

КНИГА

Куке сюлмы жадёз нюръяськемен,
Куке асме ачим уз поты адӟеме,
Куке дунне вылын уг шедьты интыме,
Ас эзельлы каргон ысто мон жадемен.

Куке куректонэ сьӧрын куректонэ,
Югыт нунал но пеймытгес пильмо куазьлэсь,
Куке синкылиен югыт дунне но лек,
Куке мынам сюлмам уз кыльы ни кале, —

Сыӵе дыръя киям книга мон кутӥсько,
Отысь чылкыт дун бамъёссэ берыкъясько.
Шумпотыса кошке соку мугор, сюлэм,
Отысь гинэ кужым мон шедьтӥсько аслым.

Котькуд лыдӟем чуре, котькуд лыдӟем кылы
Луэ мынам сюресчие-кизилие.
Акыльтылэ та дуннеысь чыры-пыры,
Усьтӥське кадь мылкыды, пиштылэ дыры.

Капчиясько, вераськисько сыӵе дыре,
«Тау!» шуисько книгаелы лыдӟем бере.
Аслам аслым будэ бадӟым юн осконэ,
Со осконэн учкылӥсько мон азьлане.

КЫЛБУРЧИ

Аръёс ортчо, кошко бере, мӧйымисько,
Губырскыса быри ке но, вань на кужмы.
Мылкыд егит кылёз, со чик уз пересьмы,
Лулы зӥбыт улоз, уз лябӟы со мынам.

Гадям али на ӝуало кылбур тылъёс!?
Ӝуто, пересь ке но, секыт гурезьёсыз.
Сюлмам ялан сэзь нуналъёс, ялан тулыс:
Кылбурчилэн ӧвӧл толъёс но лымыос.

Уг улы мон, пересь ке но, пересь сямен,
Уг пукы тэк, весь ужаны косэ сюлэм.
Уг тубы мон, Инмар понна, пӧсь гур вылам,
Кылбуръёсысь кулэ шуныт лыктоз мыным.

Кулыкум но кырӟаса-кырӟаса мон куло,
Адӟыса но, уг вазь лыктэм Газраильлы.
" Ми кошкомы, тӥ кылёды!«, — мон кырӟало,
Мугорме музъем пушкы согыкузы но.

ВЕТТАН ГУР

Ӧ-ӧ, ӧ-ӧ со кароз,
Медресэе со мыноз.
Тыршыса ӟеч дышетскоз,
Тодосчиозь со вуоз.

Изьы, пие, синдэ кынь,
Кынь синдэ, кизилие;
Ӝыт изёнэд кыле но,
Бӧрдыса ортче нунал.

Ӧ-ӧ, ӧ-ӧ кырӟасько,
Выжыкылъёс верасько.
Мынам тыныд сӥзёнэ,
Шудо луы, шуонэ.

Яратонэ, мусое,
Сюлэмелы туж дуно,
Шумпотонэ но шудэ,
Бен мынам тон, тон гинэ.

КАЛЫК ГУРЪЁС

Кылӥ вал мон толон — кин ке кырӟаз,
Чынзэ асьме сямен калык кырӟан.
Йырам лыктӥз турлы-турлы малпан,—
Лулысь-сюлмысь потэм ӝожмыт гуръёс.

Лад-лад гинэ со вераса сётэ,
Бигер луллэсь уно тэльмыремзэ.
Куинь сю аръёс мискинь зӥбет улын,
Асьме вылэ усиз сыӵе улон.

Калык кӧня курадӟонъёс адӟиз,
Курыт синву кӧня кисьтылӥськиз,
Ас калыксэ кужмо яратэмез
Трос аръёс пыр вайиз эркын гурез.

Мон паймыса кылзӥ, палэнскыса,
Улонысьтым ужме вунэтыса.
Син азьысьтым адӟи кадь мон потӥ
Болгар но Агидель возьвылъёсты.

Ӧй чида ни, кырӟась доры мынӥ,
Юай пальпотыса, кияз йӧтски:
«Кыӵе кырӟан тон кырӟаськод, выны?»
«Та гур луэ, — шуиз со, — «Эллюки».

АНАЕЛЭН ВӦСЕЗ

Тани ӝыт. Тыр толэзь ни ӝужаз, югдыса гурт вадьсы,
Кыдёкын бусыос чиляло, азвесен вань юртъёс.

Гуртын ӝыт. Ӟеч калык ӵукысен ик ӝытозь ужаса,
Мур-мур кӧлэ ческыт умъёсын, жадемзы ортчыса.

Урамын уг уто пуныос, гурт кулэм, шып котыр,
Гуртлэн пумаз одӥг коркан кысытэк улэ на тыл.

Ӝыт вӧсь бере тӥни одӥг пересь со корка шорын,
Сьӧлыкъёслэсь чылкытатскыса, пуке ковёр вылын.

Вӧсяськыны кизэ ӝутэм, тодаз усиз пиез:
«Инмаре, шудо медло, мынам дуно, мусо пие».

Мискиньлэн синмысьтыз шапыкен пызьырске синвуэз,
Учкелэ, ма со вӧсь-а уз вУы Инмар кылчинозь.

ВОРДСКЕМ МУЗЪЕМЕЛЫ 

Пиналысен кошки палэнэ, эзельлэсь пегӟыса.
О Казаньсьӧр, выльысь адӟиськод, берытски мӧзмыса.
Кыдёкысен тодмо возьвылъёс ӝутказы мылкыдме,
Курадӟытӥсь тодэ ваёнъёс кысказы сюлэмме.

Шудтэм ке но будӥ мон татын анайтэк-атайтэк,
Егит дырме курыт ултӥян сӥсъялляз ке но тэк, —
Пумен ортчо секыт аръёсы, бурдоос лобӟем кадь,
Тодам лыкто со нуналъёсы, ӝыт адӟем вӧтъёс кадь.

Шуккыллязы пыжме тулкымъёс — ӧй выйы ву пыдсы,
Ӝуатъялляз тынад лек тылыд — монэ ӧз суты со.
Со дырысен шӧдӥ, валай кадь, вордӥськем музъеме,
Зол тулкымед, ӟырдыт тылыд но сюлэмлы ярамон.

Тодӥ, ваньмыз тынад дун-чылкыт: ошмесъёс, шуръёсыд,
Бусы вамен лёгем сюресъёс, итымед, гуртъёсыд;
Арлэн котькуд дырыз: сӥзьылэд, тол, тулыс, пӧсь гужем;
Котьма, котьма: ыштыр, чабата, тӧдь носки, шортдэрем!

Ыжъёс, ошъёс, утӥсь пуныос, бӧксылӥсь скалъёсыд,
Узыр ӧвӧл ке но, мусо ук вордӥськем палъёсы.

ГӦП

Тэк гинэ пукыкум, кытысь ке тӧдь ӵынкыт вӧлдӥськиз,
Выль лымы зӥр поръя, визьтэмме, пазяське: гӧпаське.

Ымныре шуккылэ жалятэк, синъёсыз усьтонтэм,
Лымыын лушкаськись я маяк, я кион-а выдэм.

Лымыез вормыса музъеме, толэзь юг кисьтӥське,
Тыр толэзь но, лэся, кышкатскем: ӵуж-кӧсыт адӟиське.

Кулэм кый кадь кыллиз вырытэк тол сюрес нуналбыт.
Кытысь ке но потӥз йырвизьтэм кужмо гӧп — туж кышкыт.

Оло Каф гурезьысь ишанъёс васькизы мозмыса,
Я Инмар Кузёлэн миндэрез-а пӧсьтӥз вужмыса?

Тӧдь лымы луыса мамык гон, дыр, вия миндэрысь,
Гон сьӧры уйисько, дыр, чёртъёс Каф гурезь сьӧръёсысь.

Ӟурисько, нош вадьсын ик монэ тыр толэзь серекъя,
Кызьы бай укнотӥз курадӟись ляльчизэ серекъя.

БУБЫЛИ 
(Мар чиля, со ваньмыз зарни ӧвӧл)

Сяська вылысь сяська вылэ лобалляз льӧль Бубыли.
Ӝытлань адӟиз со бусыысь чилясь, вырись арбери.

Макем яркыт со чиля, уй кизили кадь ворекъя,
Вуюись выллем пиштэ, каллен выре, дырекъя.

Та чеберлы со верантэм, пумтэм-йылтэм синмаськиз,
Шуак лобӟиз чилясь вылэ, пуксиз но копак сутӥськиз.

Сюрес вылын ветлӥсьёслэн тылзы кысытэк кылем,
Отчы быриз пуксьыса — ӝуаз чебер льӧль Бубыли.

ТОЛЛЫ ОДӤГ КЫЛ

Тон кошкы ни, тушо тӧдь тол! Уть, меӵак тӥнь гурезьысь
Нискылтэ чебер нылаш — зарни уробоен тулыс.

Ышы ӝоггес, эй, Тол бабай, чаляк ну пересь йырдэ,
Котьма ке но, адӟиськод, тулыс, сяська эксэй, дыртэ.

Со эксэйлэн чик ӧвӧл меч-пыӵалэз, алмазъёсыз,
Котькуд палан турлы тусо бубылиос — ожчиос.
(1909)