«Газет кулэ, сотэк уг луы»

Зоя Васильевна 1939-тӥ арын вордске. Егит  ныл (ужаны кутскыкуз солы 19 арес гинэ луэ) район газетын кема ужамтэ ке но (огъя куинь ар гинэ луэ), ужам аръёсыз солэн али но син азяз кадь. «Туж умой, шулдыр ужамы ми», — шуэ со.

Зоя Васильевна наборщица луыса ужам. 1958-тӥ арын февраль толэзьын Ципьяын ужаны кутскем ке, со арын ик июль толэзе районэз Балтасе выжто, озьы ик газетэз но. 1961-тӥ арозь Зоя Васильевна Балтасьын ужам ини.

— Мон ужаку «Азьлане» газетын валтӥсь редакторлэн воштӥсез луыса Самсонова Агафия ужаз. Соин валче тыршизы Давлекова Елизавета, Гришкина Зинаида. Мон бигер газетын огнам ужаны кутски, собере ини кык ныл басьтӥзы. Текстъёсты бичаку вань чиньыос краскалэсь вӧйесь луо вал. Кыӵе тупаса ужамы ми куспамы. Ма, али ке но ог-огмылы звонить карыса вераськиськом, — шумпотэмзэ ватытэк вера Зоя Васильевна.

— Малы бен газетын куинь ар гинэ ужады? — юасько.

— Бен, юлтош нылы городэ улыны кошкомы шуыса ӧтиз но, мон соглаш луи. Ципьяысен Балтасе вуытозь пыдын ветлыса но жадиськем вал, дыр... Нуналлы быдэ ӧй ветлы ке но (гужемзэ арнялы огпол, толалтэзэ — кык арнялы огпол, сюрес кузь — ми Барышникова Аляен ӵукна час сизьымен потыса нышырлы матэ мыныса вуиськомы вал), собыдӟа сюрес вылын ветлыны кулэ вал ук али. Но городэ кошкыны ӧз кылды — монэ Вукогуртэ лушказы. Тани «городын» 57 ар улӥсько ни...

Вукогуртын улыны кутскемез бере Зоя Васильевна гуртысьтыз магазинэ ужаны интыяськем. Отын 17 ар ужам. Ужам со кӧня ке ар Ципьяысь мех фабрикаын но, сельсоветын счетовод луыса но. Собере выльысь Вукогуртын магазинын ужаны кутскем. Трос интыын ужаны тупам ке но Зоя Васильевналы, со котькытын адямиосын умой кусып возьыса, огъя кыл шедьтыны быгатыса ужам. Сомында интыын, пӧртэм ӧрын ассэ утьыса вуэм ке но, редакциын ужам куинь арзэ нылкышно шунытэн гинэ тодаз вае.

— Текстсэ но бигерен набирать кари, куспамы но бигер кылын вераськимы. Туж каньыл нылъёсын валче ужамы. Ужан интыямы уксёзэ но ӧз жалялэ, дыраз сётылӥзы. Мон, кылсярысь, 70 манет басьтӥ, азьло дыре со ӧжыт уксё ӧй вал, — валэктэ мыным Зоя Васильевна, вераськонмы куспын дораз лыктэм коӵышъёсты маялляса. — Коӵышъёс но, пуны но мон дорысь кошкыса но уг вуо, ярато монэ, — пальпотыса вера мусо песяй, — мон соосты сюдӥсько, вешаса гинэ возисько — кызьы уз яратэ бен.

Газетъёсты но, пе, яратыса лыдӟисько со: «Газет кулэ, сотэк уг луы. Ми ведь, пересьёс, телефон яке компьютер пыр сое лыдӟыны ум быгатӥське». Черсӥсько, керттӥсько но, пе.

— Тэк пукеме уг поты, тазалык вань дыръя ужаны кулэ. Толалтэ тани лымы но куяны яратӥсько али. Сюлэм ужаны куре, но мугор куддыръя оскон уг сёты... Но таизлы но Инмарлы тау. Дуннеез но адӟи, улыны но туж умой улӥмы но улӥськом. Покчи пиеным, кенэным, соослэн нылпиосынызы ӵош бадӟым семьяен улӥськомы, — шуэ Зоя Васильевна. — Пересьми шуыса уг пукиськы, али котькыӵе гуртын ортчись шулдыръяськонъёсы но пыриськисько. Удмурт кырӟанъёсты, такмакъёсты тодӥсько, балалайкаен но шудӥсько али. Пинал дыръя мызганэн шудыны дышетскыны малпанэ вань вал, но картлы кошкыса вуи. Улонэ юнме ӧз ортчы шуэме луэ. Тазалык гинэ мед луоз, — шуэ Зоя Васильевна.