Гурт почтальонъёс калыкез котырысь дуннеен герӟало

Гуртысь почтальон... Ӵем-а тодамы вайиськомы, макем секыт солэн ужез? Кыӵе шуг-секытъёсын пумисько та удысысь адямиос? Та но мукет тунсыкъяськытӥсь юанъёслы валэктон утчаса, Ӟаны почта герӟетлэн ёзаз вуи. 

Нялтас вераса, Ӟаны гуртысь почта герӟетлэн ёзэз выльдэм лулчеберетъя юртлэн кыкетӥ этажаз, одӥг сэрегаз интыяськемын. Нырысь ик, мар мынам синмам йӧтӥз — со чылкытлык. Со нырысетӥ этажысен ик, ӧс выжыысен ик шӧдӥськиз, тубат лёгетъёс дорысь ӝикыт гинэ «ас кузёоссэс» — пырись муртъёсты — витись тапочкиосты адӟем бере ик... 

Пумитаз монэ почта герӟетлэн кивалтӥсез — Татьяна Клеймёнова.

— Ньыль ар ужасько ни почта ёзлэн кивалтӥсез луыса, — мытӥз веранзэ Татьяна Михайловна. — Нырысь одӥг арзэ Трофимова Нина апаен (почтальонка — ред.) кыкнамы Тюнтерысь почтае ветлыса ужамы. Со вал Ӟаныысь лулчеберетъя юртын тупатъян-выльдон ужъёс нуиськыку. Нош 2023-тӥ арын, лулчеберетъя юртэз вуттэмзы но уже сётэмзы бере, татчы выжимы. Ужаны трослы каньылгес луиз.

Почта ёзлэн кивалтӥсез луэм сяна, Татьяна Клеймёнова почтальонлэсь ужзэ но быдэсъя на вылэм.

— Туннэ нуналэ отделенилэн начальникез но луисько, почта но нуллӥсько. Ужасько ӝыны ставкаен отделенилэн начальникез но ӝыны ставкаен почтальон луыса.
Почтальонкаын ужамелэн 16 арез огъя ужан стажам ӧз пыры, малы ке шуоно почта со дыре ватсаса, совместить карыса ужано уже вал. Валтӥсь ужан интые школа вал: нырысь нылпи садын завхозын ужай, со должностез быдтэмзы бере, школа столовое интыяськи, — валэктон сётӥз Татьяна Михайловна. 

— Милям участокамы ньыль гурт пыре: Ӟаны, Кисаль, Кутеш но Кушкет. Ужаськомы куинь ӵошен. Кутешын но Ӟаныын Петрова Надежда Ивановна ужа, Кисальын — Трофимова Нина Юрьевна, нош Кушкетын — ачим, — азьланьтӥз веранзэ почта ёзлэн кивалтӥсез. — Мукет почта ёзъёс сямен ик, ми но арняяз куинь нунал ужаськом: понедельнике, средае но пятницае. 
Ужан нуналмы калыкен ужан бордысен кутске. Адямиос тӧляськыны, товар басьтыны лыкто, лотерей басьто. Яратыса басьтэм вузъёс пӧлын — чай но вӧй. Вузкаронъя но планмы вань, страховкая но. Ми машина но страховать кариськом, эмъюмъя страхование но лэсьтӥськом...

Паймемме адӟыса, вылды, Татьяна валэктӥз:

— Эмъюм басьтыны кутэм коньдонэз но берыктыны луэ. Но рецепт печатен но государственной больницаен сётэмын луыны кулэ. Со рецептъя государственной аптекаысь эмъюм басьтӥськод ке, кыӵе ке люкетэз берыктӥське. Услугалэн дуныз — куинь толэзьлы 600 манет. 

— Вераськонмес азьланьтыса, юасько, кызьы со та профессие вуиз шуыса. Ваньмыз туж огшоры вылэм.

— Ачим мон Вылын Ушма гуртысь. Дышетски КЭТС-ын, почта герӟетъя техниклэсь ӧнерзэ басьтӥ. Дышетскон дыръя практикае бертӥ асьме поселениысь почтае — Покчи Лӧзяе. Отын соку ужа вал ӵош школаын дышетскем ныллэн анаез, Сергеева Галина Михайловна. Со лад-лад ваньзэ валэктӥз. Техникумез йылпумъяме бере отын ик кутски ужаны. Ужын шуг-секытъёс кылдыку, Галина Михайловна котьку юрттэ вал.
Мыным тужгес но кельше вал газетъёсты, журналъёсты, гожтэтъёсты сётъяны.
2001 арын монэ лэзизы Ӟаны гуртэ ужаны. Соку мынам та пала одӥг пол гинэ вуылэме вань вал: школаын дышетскыку, Ципья школае мынӥмы.
Ӟаны почтаын но каньыл гинэ ужась кивалтӥсь вал: Гришкина Вероника Ивановна. Шумпотӥсько, мыным умой наставникъёс сюризы шуыса, — ужан сюресэзлэсь кутсконзэ тодаз вайиз кышномурт.

Нялтас вераса, аслэсьтыз шудзэ но Татьяна та палан ик шедьтэ: 2001 арын Кушкет гуртэ бызе, Виталий Клеймёновен семья кылдытэ.

— Шумпотон вае-а тӥледлы ужды? Кыӵе шуг-секытъёсын пумиськоно луэ? — сётӥсько черодысь юанъёсме. 

— Валтӥсез — уждэ яратоно. Уждэ яратӥд ке, ваньмыз но кельше. Адямиен кусып возьыны но мыным кельше. Эшшо котькуд ужын тужгес кулэез — со тазалык. Таза луид ке, котьма но шумпотон вае. 
Нош шуг-секытъёс сярысь верано ке, соос котькыӵе ужын вань, дыр, тужгес но таӵе кылкутоно ужын. Сыӵе шуг-секытъёс дыръя, кема ужась коллегаосмылы вазиськиськом, — рос-прос малпаськемез бере вераз собеседницае. 

— Нош кыӵе тӥ дорын югдур газет-журналъёслы гожтӥськон ласянь? Периодикаысь мае лыдӟыны яратэ гурт калык? — юан сётӥсько почта ёзлэн кивалтӥсезлы. 

— Газетлы гожтӥсько, но дуно шуо. Пенсионеръёс мыло-кыдо гожтӥсько. Ньыль гуртлы 123 «Азьлане» басьто милям участокамы. «Непоседа» нылпи журналлы гожтӥсько, «Ӟечбур!» газетлы, — та дырозь солы тросгес гожтӥсько вал, табере кӧня ке гинэ кылиз. «Казанские ведомости» газетэз лыдӟо, сое но четверге потӥсьсэ гинэ ни, азьло ваньзэ басьто вал али. «Удмурт дунне» газетэз юасьёс вань, но сое табере асьме дорын почта пыр басьтыны уг луы ини (интернет пыр электрон амалэн гинэ басьтон амал вань — ред.). Дышетӥсьёс «Вордскем кыл» журналэз басьто. «Кенеш» басьто. Огъя вераса, кин азьло лыдӟиз, со али но та шумпотонлэсь уг куштӥськы, ваньмон дыръяз типография буёлэн пыӵам ческыт зыно газет бамъёсты лыдӟе, — лачмытак вераз Татьяна Михайловна.

Тазьы вераськыса пуконъямы, почтальонъёс но вуизы: Нина Трофимова но Надежда Петрова. Тодматскем бере, тодӥ, соос кыкназы но гуртоос, Кутеш гуртысь кенъёс шуыса.

Нина Юрьевнаен вераськыны кутскем бере ик валай, та кышномурт тупал удмурт шуыса: кылъёсты верамезъя, интонациезъя со шӧдӥськиз.

— Мон ачим Удмуртиысь Кизнер районысь. Туж яратӥсько вал удмурт кылэз школаын дышетскыкум ик, малпасько вал педагогической университетэ пырыны, но, йырвисет уж шуыса, монэ атае отчы пырыны ӧз лэзьы. Угось вордскеме дырысен йыры туж висьыса улӥз мынам.

Тунсыкъяськон мылкыдме вормыны быгатытэк, юалляськонме азьланьтӥсько:

— Нош кызьы тӥ ми пала вуиды?

— Мон дышетски Можгаысь ветколледжын. Отын ик вуоно картэ но дышетскиз. Отысен со мыным синмаськыса та пала вайиз. 1989-тӥ арын кузпалъяськимы. Выжыме пыдло кари ни: куинь нылпие, вить внучкае вань.

— Вераськон кылъёсмы туж висъясько. Секыт вал-а дышыны шошма удмуртъёслэн вераськетсылы?

— Туж секыт вал. Мон бигер кылэз туннэ нуналэ но уг валаськы. Али дышемын ини, конечно. Одӥг кылзэ валасько но мукетъёсыз ласянь валатскисько ини. Собере удмурт кылэз но уг валаськы вал. Анайзые, Самаева Елизавета, туж шаплы кышномурт вал. Солэсь вераськемзэ ваньзэ уг валаськы вал. Нош атайзые — Удмуртиын ветлэм маке, со мыным валэктылӥз. Кудзэ уг валаськы, ӟуч сямен вера вал. Али дыши ини, конечно. Табере мыным Кутеш самой матысь гурт потэ ини. 

— Нош почтае кызьы вуиды?

— Мон почтаын ужасько 2021-тӥ арысен гинэ али. Азьло колхозын ужай. Сӧсырмеме бере отчы берытскыны ӧз луы ини. Почтаын ужаны кутскеме бере кышкытгес вал уксёен сюрес вылын ветлыны, недостача но карыны. Нырысь ужай Кутеш но Ӟаны гуртъёсын, али дыре Кисальын ужасько.

— Кельше-а ужды? Уждылэсь кыӵе шуг-секытъёссэ пусйысалды?

— Та ужез туж яратӥсько шуыса вераме уг луы, но кытын ке но ужано. Тужгес секытэз, мон малпасько, товарен вузкарыса ветлон шуыса. Аслад ужед сяна, сумкаен-сумкаен ныпъяськыса арбери ветлытоно, гурт кутсконысен гурт пуме вуытозь. Вузкарисьлы кадь план пукто. Со сяна, милемлы лотерей но вузано, подписка но кароно, озьы ик тыриськон квитанциослы уксё лыдъяса басьтӥськомы. 
Шуггес сюрес вылын ветлыны, ачид машинаен ӧвӧл ке. Мыныку куинь-ньыль иськем вамышъяно, собере доре бертыны но кулэ ук. Эшшо ӝожтӥськонме но вераме потэ: клубез выльдӥзы ке но, почтальонъёслэн одӥг сэрегаз кимиськон инты но ӧз радъялэ. Интернет но туж ляб.

— Кыӵе газет-журналъёсты яратэ лыдӟыны калык? Вань-а участокады трос изданиослы гожтӥськисьёс?

— Туала арын газетлы уно уг гожтӥсько ини, тросэз «Азьлане» газетэз гинэ басьтэ. Кисальын турлы газетъёслы 6-7 семья гинэ гожтӥське ини. Дуно, шуо.

— Калыкен вераськон — уждылэн бадӟым люкетэз. Луэ-а котькинэн огъя кыл шедьтыны?

— Участокысьтыд котькуд пенсионерлэсь кыӵезэ тодоно, валано, кинлы кызьы вазиськоно. Мыным Инмар кыл сётэм, соин ик котькудӥныз но вераськыны быгатӥсько кадь потӥсько. 

Зэмос почтальон ӵапак сыӵе ик луыны кулэ: калыкен лякыт вераськись, мылкыдзэ ӝутӥсь но кӧтӝожъёссэ буйгатыны быгатӥсь.

Ӟаныын но Кутешын ужась Надежда Петроваез но небыт кылыз, каньыл мылкыдыз понна гажало но котькуд коркан возьмало. Ачиз но со туж шуныт мылкыдын вера калыкез сярысь: 

— Мынам татын калык ӟеч мылкыдо, валась. Монэ туж витё пенсионеръёс, шумпото лыктэмелы.

Надежда коллективаз тужгес егитэз. Вордскемын но быдэ вуэмын со Ярак-Чурма гуртын. Нина апай кадь ик Кутеше быземын.

— Нырысь ик, мон кык муспотон нылпиослэн анайзы. Талы мон туж шумпотӥсько. Пие 2-тӥ классын дышетске, нылы садике ветлэ. Тросэз тодо, кыӵе секыт али милям улон югдурмы. Нош нылпиосмы — со милям тылсиосмы. Соос юртто ӝожомытэк, мылкыдэз куашкатытэк улыны, чыры-пырыослы шумпотыны. Ужасько мон почтальон луыса. Туж каньыл график, тужгес но нылпиос висё ке. Декретэз лыдэ басьтыса, мон 2019-тӥ арысен ужасько. Мынам участокъёсы — Ӟаны но Кутеш гуртъёс. Со гуртъёсын пенсия, газет, гожтэт, квитанция сётъясько, пӧртэм вузъёсты но лоторей билетъёсты вузасько. Мыным кельше аслам уже. Котькуд ӧнерын сямен ик минусъёс но, плюсъёс но вань. Секыт луэ трос пенсия сётъян вакытэ но эшшо мон сьӧры квитанция тырыны келяло. Бадӟым кышканэ — со пуныос. Куддыръя, газет-пенсия сётъяку, туж шугъяськыса ортчоно луэ урамъёстӥ. Тани та мон понна тужгес секытэз профессиям. Та кышканэз кызьы ке но вормыны тыршоно. 

— Почтальон шуыкузы, одно ик газет-журналъёсын тырмем бадӟым сумка син азе пуксе. Туала дырлы но тупа-а та суред яке уг-а? Трос-а периодической изданиослы гожтӥсько гуртын? 

— Мынам почтальон сярысь валанэ «Простоквашино» мультфильмысь персонажен, Игорь Иванович Печкинэн, герӟаськемын. Но сямы сыӵе урод ӧвӧл солэн кадь (серекъя). Ма, конечно бадӟым сумкаосын ветлӥськом. Газетъёс но, кызьы мон верай вал ини, пӧртэм вузъёс. Милям гуртъёсын «Азьлане» газетлы гожтӥськон умой. Тросэз солы гожтӥсько. Тунсыко нылпи журналъёсты, нылкышно журналъёсты басьто. 

— Кызьы тӥ малпаськоды, кыӵе сямъёс кулэ почтальон луыса ужан понна? 

— Почтальон лякыт, ӟеч мылкыдо, вазиськись луыны кулэ. Оскисько, мон та куронъёслы тупасько шуыса. 

Вераськонмес йылпумъяса почта ёзын ужасьёслэсь ваньмон дырзы кызьы ортче шуыса юай.

— Ваньмон дырме юрт котырын ортчытӥсько, — шуиз Нина апай. — Пудо-живот вордӥськомы, соосты сюдӥсько. Семьяме ческыт пӧзьтыса-пӧраса сюдӥсько. Озьы ик муспотон внучкаосын пукисько, соос мон доры куное ветлыло.

— Ваньмон дыр шедьыку, книга лыдӟыны яратӥсько. Эшшо мыным кельше ас киыным пӧртэм композициос кылдытыны. Али тани мамыклэсь шудон лэсьтыны оскалтоно кариськи, — пальпотыса вераз Надежда. 

— Нош мон толалтэ куасэн ветлыны яратӥсько, — шуиз кивалтӥсьсы, Татьяна.

Тӥни озьы туннэ тодматскимы ёросысь одӥг гинэ «удмурт» почта ёзын ужасьёсын. Котькудӥз соос пӧлысь нимаз личность, но соосты огазея одӥг ужпум: гурт почтальонъёс, калыкез котырысь дуннеен герӟаса, бадӟым уж быдэсъяло. 

Озьыен, гуртысь почтальонъёс — соос почтаын ужасьёс гинэ ӧвӧл, соос мерлыко улонлэсь аспӧртэм атмосферазэ утисьёс но. 

Почтальон — котькуд коркан возьмам адями. Соин кенешо, иворъёссэс верало, нош кин ке кӧтӝожъёссэ вераса бӧрдэ но. Почта нуллӥсь кылзэ, дырыз ӧвӧл ке но. Со уг быгаты озьы гинэ берытскыса кошкыны. Ӟеч иворъёс вайыса, со тӥ понна шумпотоз, ӝож ивор дыръя — буйгатоз.
Котырысьтыз адямиосын вераськемзэ, кылӥсьтэм песянайлы лякыт вазьылэмзэ яке ляб адӟись песятайлы каньыл валэктыса лыдӟемзэ, соос понна квитанциосты гожъямзэ но, пересьёслы секыт шуыса, тыро сумкаосын сиён-юон кыскамзэ адӟыса, валаськод, ӵапак сыӵе со — зэмос гурт почтальон.