«Гырон быдтон» – выльысь вордскем праздник

Кылем даурлэн 90-тӥ аръёсызлэн кутсконаз «Дружба» колхозысь удмурт гуртъёс выль «Искра» колхозэ огазеяськемзы бере, татын «Сабантуй» интые «Гырон быдтон» ортчытъяно кариськизы. Кутсконэз тазьы вал. Ӟаны шоръёзо школалэн директорез И. В. Ермаков ас «мунчояз» (кабинетаз) куартолэзьлэн (майлэн) пумаз В. П. Камаевез, А. П. Павловаез но монэ ӧтиз. Мугез — «Гырон быдтон» праздник, тодоно, кызьы со ортчытылӥськем, дасяно сценарий. Та уж борды лулысь-сюлмысь кутскыса, вакчи дыр куспын ваньмыз дась вал. Вераны кулэ, та ужез быдэстон понна ваньмыз сямен школа коллектив ужаз. Праздник ортчытон сярысь материалъёс пырыен-пырыен люкаськылӥзы: мӧйыослэн тодэ ваёнъёссы, соослэн ӵыжы-выжыоссылы верамъёссы, азьвыл гожъяса кельтэмъёс. 

Нырысетӥез ик «Гырон быдтон» праздник тросэзлы кельшиз. Карек-Серма нюкысь возь вылэ тросак калык люкаськиз, «Искра» колхозысь гинэ ӧвӧл, палэнысь удмурт гуртъёсысен но. Учкыны ёрос администрациысен но ветлӥзы. Пумен та колхоз праздникмы, районысь Удмурт культурая обществолэн тыршеменыз, ёрос, республиканской интернациональной праздниклы пӧрмиз ни. Туж умой, шекъёстэк шуымон радъяны дышизы ни асьмелэнъёс та яратоно ужрадэз.

2016-тӥ арын «Гырон быдтон» выльысь вордскем дораз, Ӟаные, бертӥз кадь, кыӵе вылӥ дасьлыкен со ортчытэмын вал! Ваньмыз вӧй вылтӥ кадь ортчиз! Но со озьы адске празднике лыктэмъёслы гинэ. Праздникез дасян трос тодон-валанэз, устолыкез, оскем уждэ пумозяз вуттонэз куре: ӟечкыланъёс, концерт номеръёс, шудонъёс, ӝук но чай дасян, лыктэм дуно куноосты пумитан но келян, кузьымъёс дасян, праздниклы висъям коньдонэз кулэезъя кутон — ваньзэ огез сьӧры мукетсэ валаса радъяно...

Но кудӥз-огез али но малпа на «Гырон быдтон» Ӟаны школалэн бигер «Сабантуй» праздникысь малпаса поттэмын но удмуртъёслэн сыӵе праздниксы луымтэ шуыса. Сыӵе малпанъёсты тӧлӟытон понна 1938-тӥ арын 11 июне «Азьлане» газетэ (N36 (374) потэм материалэн тодматэме потэ. 

«Гырон быдтон» праздникез азинскемъёсын пумиталозы.
Малые Лызи сельсоветысь ньыль колхоз огинын народной «Гырон быдтон» праздникез ортчытозы. Колхозъёс производствоын стахановской амалэн ужанэз но социалистической соревнованиез паськыт вӧлмытыса, РСФСР-лэн но ТАССР-лэн Верховной Советъёсазы быръёнъёслы умой дасяськыса пумиталозы.
Колхозъёс пар гыронэз, кыед поттонэз, юос пӧлысь жаг турынэз урыса быдтонэн ӵош ик турнанлы но октон-калтонлы дасяськыса пумиталозы. «Гырон быдтон» праздникын колхозъёс стахановецъёсты премировать карозы. Премировать карем бере коллективной хор, шудонъёс, танцыос, валэн ӵошатскон но мукетъёс луозы. Татын ик вузкарон лавка но усьтэмын луоз.
В. Кириллов

Кызьы адӟиськом, «Гырон быдтон» азьвыл но ортчытъяськылэм. Вералом, Удмуртиын та праздникез «Гербер» (геры бере) нимало. Москваын но «Гербер» кӧня ке ар радъяськиз ни.

В. П. Никитин, Карек-Серма гурт