Инмар вӧсь кылъёсмес мед кылоз! (2 люкет)

Валтӥсь ужрад бере лыктэмъёс понна йӧскалык сиён-юонъёсын ӝӧкъёс но адӟытонъёс ӵектэмын вал. Котькуд калык аслэсьтыз самой ческыт но кӧттыро сиёнъёссэ ваем.

Ас лулчеберетсылы но куно пумитанлы бадӟым саклык висъямзы понна тау шуыны кулэ Сизнер, Ципья, Ӟаны, Улисьял, Дурга но Сырья гуртъёсысь калыклы. Соос туж усто тыршизы куноосты утялтыны. Площадка котырын вӧлмем ческыт зынъёс адямиосты бордаз кыскизы. 
Радъям площадкаосты учкемзы бере, куноосты концертной программаен паймытӥзы. Татын калык кырӟанъёс чузъяськизы, эктонъёс быдэстӥськизы. Шумпотымон, концертын арлыдозэ но, пичизэ но адӟыны луиз. Нимысьтыз татын Ципья нылпи садысь нылпиосты пусйыны кулэ. Макем мусо но чебер эктонзы соослэн! Жадизы ке но, пиналъёс зэмос артистъёс кадь пальышась ымнырын эктӥзы. 

Лыктэм куноослэн берпуметӥ точказы «Калыкъёслэн эшъяськонзы» музей луиз. Татын соосты ёрослэн историеныз, сӥё-дано адямиосыныз, калыкъёслэн юнматскеменызы тодматӥзы. Учкисьёс асьсэос но тунсыко юанъёсты сётъязы, экскурсилэн пумаз митрополит Кирилл сӥзёнъёс гожтыса но кельтӥз. 

Балтась ёрослэн главаезлэн воштӥсез Наиль Сабирзянов куноосты ёросын лэсьтӥськись ужъёсын но тодматыса вуиз, сиён-юонэн дасям тыр ӝӧкен но кунояз. Йӧскалык пӧртэмлыкъёсты лыдэ басьтытэк шунытэн калык сярысь но вазиськиз, черке но пырыса чеберлыксэ синйылтӥз.

Вань ужрадъёс бӧрсьы Казанской но Татарстанской митрополит Кирилл быдэс ёросын улӥсьёслы сюлме пыӵась кылъёсын вазиськиз:

— Одӥг паласен ми туннэ храмез вӧсяны вуим, мукет паласен мон туж шумпотӥ но пайми, туннэ вӧсяськон ужрад бадӟым праздник луиз шуыса. Татчы люкаськизы вань калыкъёс: крашинэз но, удмуртэз но, порез но, ӟучез но. Туннэ зэмзэ но калык праздник радъяськиз. Та ик вань асьмелэн ваньбурмы, куке асьмеос огкылысь ӵошен улӥськом Котырысьтымы ваньмыз асьмелы туж дуно но матын. Йӧскалыкъя яке мукет ласянь пӧртэмлыкъёсмы вань ке но, Атаймузъем ваньзэсты огазея. Вордскем шаердэс яратыны сӥзисько, кытын тӥ вордӥськиды, кытын ветлыны кутскиды. Атаймузъемез, Быдӟым Россиез, яратыны ӵектӥсько, кытын Инмар асьмелы улыны луонлык сётӥз. Туннэ асьмеос таукарыса вераськом: дунне вылысь самой дуноез со — вордскем музъем. Ципья гурт — бадӟым весь пушкысь одӥгез сыӵе марӟан, кудӥз чебертэ асьмелэсь музъеммес... Асьмелэн пиосмы сӧл-таза мед бертозы но тынӥсь улон мед вуоз асьме понна. 

Быдэс православной дунне понна та нунал аспӧртэмлыко яркыт тодмет луыса кылиз. Троицкой храмлэн чылкытлыкез, югытэз, шунытэз азьланяз но котькуд нунал калыклы оскон мед кузьмалоз. Со ик вань самой бадӟым данъет, куке тынӥсь улон понна калык огазеяське но огкылысь вӧсяське. 

Инмарлы эшшо но матынгес луэм Троицкой храм вань оскисьёсты возьма. Лулдэс сьӧсь малпанъёслэсь но мылкыдъёслэсь мозмытыны храмлэсь ӧсъёссэ усьтыны дыртэлэ. Юн осконды вань пуш висёнъёстэс, шугъяськонъёстэс мед капчиятоз но мур яраостэс мед бурмытоз!