Юрттон уж сюлмысен потэ

Малпан кылдэ: таӵе кышкыт вакыт дыръя ӵапак та нуналэз ик вылӥе пуктоно, ёрос масштабен кыӵе ке ужрад радъяно, дыр, шуыса, но йырын кылдэм юанъёс озьы ик валэктонтэм кылё. Кыӵе гинэ шулдыръяськонъёс уг ортчо, кыӵе гинэ ӧнер праздникъёсты ум пусйиське, нош зэмзэ но калыкез визьманы юрттӥсь праздникъёс огшоры календарьысь дата луыса кылё. 

Нимысьтыз ожгар операци кутскем бере «гуманитарной юрттэт», «волонтёр», «гуманитарной груз» кылъёс ӵемгес но ӵемгес кылӥськыны кутскизы. Мазэ веранэз, нырысь-валысь вань калык воргоронъёслы юрттыны басьтӥськиз вал. Дыр ортчыса, ваньзы, оло, жадизы, оло, кышкытлыклы оскытэк улыны кутскизы. Озьы ке но пӧламы вань адямиос, кудъёсыз уен-нуналэн тыршо азьпалан нюръяськись воргоронъёслэсь улонзэс умойгес карыны, кӧня пиналъёс пичиысен ик валаса будо, кин со сыӵе ожгарчи, Атаймузъемез утись. Но та нунал нимысьтыз ожгар операциен гинэ герӟаськемын ӧвӧл. Ӟеч уж — со пушкысен потэм ӟеч малпанъёс но нуналлы быдэ лэсьтӥськись пичи ужъёс.

Справка понна: та нунал аслэсьтыз инъетсэ басьтэ 2003 арысен, Иракысен. Соку ООН-лэн штаб-квартираез пуштыку, 22 адямилэн улонэз куспетӥ луэ. Соин та нуналлэн валтӥсь ужпумез — юрттон понна асьсэлэсь улонзэс жалятэк сётэм адямиосты буре ваён но улӥсьёслы эшшо одӥг пол вераны, кыӵе куддыр секытэн йӧтэ ӟеч уж. 

Бен, ӝытъёсты каньыл ортчытон интые мерлыко ужъёсы пыриськыны капчиен уг сётӥськы. Кыллем но потэ, тросгес телефонын но пукем потэ, йырез шугомытӥсь малпанъёслэсь куштӥськем но потэ... Таӵе ӝог бергась дуннеын дыр но ву кадь ӝог бызе. Озьы ке но, туала вакыт адямилэсь туж трос кужымзэ кулэ каре. Ӟеч ужъёсты лэсьтон — нуналлы быдэ нырысетӥ интыын сылӥсь ужпум. 

Ӟеч ужъёс калыклы адскон понна уг лэсьтӥсько, сюлмысь юрттон — со тынэсьтыд адямилыктэ но сюлэмо луэмдэ возьматэ, вылысьтыд вань сьӧлыко малпанъёстэ куштэ но капчи улонэ сюрес вӧлдэ. Адямилы умой ке лэсьтӥськод, пушкад но ваньмыз югытгес, шунытгес луэ кадь. 
Тани, кылсярысь, та удысын туж бадӟым уж лэсьто Ципья палась пиналъёс но бадӟымъёс. Школаын али ке но уг дугдо юрттэмысь. Паймымон кадь, кыӵе юн басьтӥськизы пичиос но гуманитарной юрттэт люканэ. Гужем каникулъёс ке но, анай-атайёсынызы валче коньдон люкало, фронтэ кулэ луись арбериосты басьтон понна тыршо. Адӟиське: школаын патриотической визьнодан ӧр умой азинтӥське. Пиналъёс школаысен ик юрттыны дышетско. Та понна школаысь дышетӥсьёслы, анай-атайёслы бадӟым тау. Ӟеч ужъёсты кулэен мед дунъяськозы! Тӥ но, эшъёс, дыртэлэ ӟеч ужъёсты лэсьтыны!

Туспуктэм: Ципья шоръёзо школалэн архивез