Ивашовъёс нош ик пумиськизы

Газет лыдзисьёсмы, малпасько, тодазы ваёзы, кинъёс со сыӵе — Ивашовъёс. Малы ке шуоно 1930-тӥ арын Сырья гуртысь раскулачить карем Ивашовъёслэн семьязы сярысь «Азьлане» газетын кылем арын материал потэм вал ини. Соку Ивашов Егорлэн ӵыжы-выжыосыз Сырья гуртысь клубын люкаськиллям вал, пумиськонлэн мугез луиз гуртысь уллямзы дырысен 90 ар ортчыса Егор Алексеевичлэн семьяезлы сӥзем мемориальной пулэз усьтон. Табере 7-тӥ гудырикошконэ Сырьяын ортчиз кыкетӥез пумиськон. Таяз учыре пумиськон бадӟымгес луиз — куноос но тросгес луизы, ужрадлэн программаез но узыргес луиз.

Та нуналэ Сырья гуртэ Ижкарысь, Йошкар-Олаысь, Обнинскысь, Боровскысь, Карлыганысь Ивашовъёслэн ӵыжы-выжыоссы вуизы. Пусйыны кулэ, озьы ик пумиськонэ, Сырья гуртын улӥсьёс сяна, кӧня ке мукет гуртъёсысь адямиос но вуизы. Соос пӧлын вал Ципьяысь гажано адями Пётр Григорьевич Чернов но Балтась ёросысь удмуртъёслэн «Кенеш» огазеяськонзылэн тӧроез Пчельникова Ольга Мироновна. Нялтас вераса, Пётр Григорьевич но Ольга Мироновна Сырья гуртын вордскемын но будэмын.

Куноослэн пыриськеменызы Ивашовъёслэн корка бордазы юнматэм мемориальной пул, озьы ик «Ивашов Егор Алексеевичлэн родословноез» шуыса нимаськиз стенд усьтӥськиз. Ӝытаз Сырья гурт клубын «Родословная династии Ивашова Егора Алексеевича: неизвестные страницы истории деревни Сырья» конференция ортчиз, «Сырья зоутъёс» ансамбль концерт номеръёсыныз шумпоттӥз. Конференцилэн рамкаосаз Леонид Сапожников, Сырья клублэн заведующиез, кыл вераз, тунсыко докладъёсын но кылъёсын выступать каризы лыктэм куноос но.  

— Клубын мемориальной пул усьтыкум, ӧй но малпа, татын но, Ивашовъёслэн юртазы, синпелет пул усьтомы шуыса. Сергей Иванович Фомин толалтэ пумиськонамы но пыриськиз, куное бертӥз. Солэсь верамъёссэ кылзӥськыса, мон малпай, таӵе бадӟым пумиськон но луыны кулэ шуыса. Социальной вотэсын ог-огенымы гожъяськыса, ӵыжы-выжыосты люкаса, та пумиськонэз интернет пыр радъямы шуыны луэ. Жаляса верано, ваньзы ӵыжы-выжыоссы люкаськыны ӧз быгатэ. Мынам тау шуэме потэ Ивашовъёслы. Тӥледлы, Евдокия Дмитриевна, Анастасия Ивановна, вань ӵыжы-выжыостылы но ваньзылы, кин туннэ татын. Ӵыжы-выжыосмес простить карыны куриськомы, соку, 1930 арын, матысьёстылы дурбасьтыны быгатымтэзы понна, — шуиз Леонид Дмитриевич.

Пумиськон шулдыр но шуныт ортчиз. Конференция йылпумъяськем бере, ужрадэ пыриськем котькуд муртэ ӝок сьӧрын куно каризы, кырӟазы, нош куноос куспазы вераськизы но шулдыръяськизы, та пумиськонын кылдэм мылкыдъёсынызы вошъяськизы.