Калык крезьгурлэсь мӧзме

— Кӧня ке кыл вераме потэ 22 оштолэзе Сизнер гуртын ортчем концерт сярысь. Умой вал! Туж умой! Кӧня ке ар ини буш сылӥсь клубмес шулдыртыса, Балтась каргуртысь, Ӟаныысь, Ципья черкогуртысь самодеятельной коллективъёсысь артистъёс гурт калыклы шуныт пумиськон, шутэтскон дыр кузьмазы. Асьсэлэн жингырес куараосынызы, капчи эктонъёсынызы, быгатыса мызганэн шудэменызы учкисьёслэсь мылкыдзэс ӝутӥзы. Соос бадӟым сцена вылысь артистъёслэсь чик но ӧз висъяське.

Трос пӧртэм номеръёс дасяллям. Удмурт, ӟуч, бигер кырӟанъёс чузъяськизы. Озьы ик пӧлазы Быдӟым Вормонлы, ож темалы сӥзем номеръёс но пыртэмын вал. 

Пусъеме потэ Ирина Евгеньевна Жуковалэсь лыдӟем кылбурзэ. Сокем со сюлме пыӵамон, мугорез юзыр-кезьыр карымон быгатыса лыдӟиз. Малпасько, вань люкаськем калык синвуаськиз, дыр, шуыса.
Огъя вераса, огшокчемен ортчиз та ӝыт. Быдэс зал тыр люкаськем калык артистъёсты шуныт пумитаз, кужмо кичабонъёссэ ӧз жаля, — концертэз учкыны лыктэмъёслэсь таукарон мылкыдзэс вуттӥз Сизнер гуртысь Ольга Матвеева.