Калыклэсь лулчеберетсэ, сям-йылолъёссэ утись книга

Книга — со ортчем дуннее укно, поколениос вамен выж но вашкалаослэн визьлыкенызы тырмем шыкыс. Ӧжыт лыдъем калыкъёслэн лулчеберетсы сярысь вераськыку, книгаослэн кулэлыксы тужгес но юн шӧдӥське. Туннэ вераськомы шошма удмуртъёслэн аспӧртэмлыко лулчебертсылы но вашкала дунлыкъёссылы сӥзем книга — Леонид Сапожниковлэн «Удмурт шыкысысь ваньбуръëс» бичетэз — сярысь. 

Шуркынмон толэзьлэн пумаз Леонид Дмитриевич ВКонтакте мерлыко вотэсысь бамаз шумпотонзэ вераз: кема возьмам книгаез потӥз шуыса ивортӥз. Зэмзэ но, та бадӟым шумпотон! Кызь арлэсь кема сюлмысь тыршемлэн, пумтэм утчалляськонъёслэн емышез кисьмаз, сюресэз кузь луиз ке но, лыдӟисьёс доры вуиз! Соин валче «али гинэ гурысь поттэм пӧсь табанез» киязы басьтэм адямиос соку ик асьсэлэсь мылкыдъёссэс вераны дыртӥзы.

Вылын Ушма гуртысь Екатерина Иванова, дано шутэтсконысь дышетӥсь: 

«Мынам киям Леонид Сапожниковлэн „Удмурт шыкысысь ваньбуръëс“ сборникез. Та книга нырысь киям кутыса ик паймытӥз секталаеныз. Вылбамаз удмурт апайëс но пиос чебер удмурт дӥсьëсын экто. Нош пушказ пырыса, паймытӥз ваньмыз. Макем чебересь туспуктэмъëс котькуд бамаз, нош мур пуштросъем главаоссэ лыдӟыса пумаз потыны туж кема дыр кулэ луоз. 

Та сборнике Леонид Дмитриевич люкам асьме районысь но Шошма шур котырын улӥсь удмуртъëслэсь вашкала историзэс, сям-йылолъëссэс. Вань татын озьы ик кырӟан люкасьëс сярысь статьяос но соослэн люкам кырӟанъëссы. Нимаз ик ӝӧксьӧр кырӟанъëс, сюан гуръëс, лекрут келян кырӟанъëс трос. Котькудмы, та книгаез лыдӟыса, пинал дырмес тодэ вайиськом, мӧзмон дыръя кырӟаны но луоно. Эктон гуръëслы нотаосты но, фигураосын валэктонъëсты но шедьтоды татысь. Вань эшшо ньыль диск, кудаз Евгения Плотниковалэн радиофондысь ужъëсыз но пыртэмын. Туж трос пайдаë информация пыртэмын та сборнике. Мон сямен, та шошма удмуртъëс сярысь энциклопедия но, фотоальбом но, аудио-, видеоматериал но. Ваньзэ гожтыса гинэ вераса уд но быдты. 

Та сборник, мон сямен, котькуд удмурт семьялэн настольной книгаез луыны кулэ. Удмурт кылэз яратӥсь адями тыршоз шуыса малпасько, вуоно поколениослы но сям-йылолъëсмес пыӵатыны. Асьме нылпиосмы но внукъëсмы мед тодозы вал чебер удмурт кырӟанъëсты но эктонъëсты. 
Леонид Дмитриевич Сапожниковлы туж бадӟым тау, вань кужымзэ но дырзэ жалятэк, со сборникез асьме доре вуттэмез понна. Быртыкен-быртыкен котькуд гуртысь материал утчаса шедьтэм со. Нош кӧня тыршиз со книгазэ асьме пӧлы вуттыны. 

Книгалэн дуныз 5 сюрс манет. Милям пересь 95 аресъем апаймы шуэмъя, со быдӟа книгалы утьыса, дуныз но бадӟым ик ӧвӧл. Сое огпол басьтод, гумырад шумпотыса лыдӟод! 

Гажано, эшъëс. Басьтэ та сборникез! Уд жалялэ ноку, басьтӥм шуыса!»

Ярак-Чурма гуртысь Людмила Фомина, визьнодась:

«Котькудмы лыдӟись луиськомы. Улытозяз адями туж трос книгаосты лыдӟыны быгатэ. Монэ туж тунсыкъяськытӥз Л. Д. Сапожниковлэн шошма удмуртъёс сярысь бичетэз. Та книга огазея Балтась, Кукмор, Мари-Турек но Малмыж (мынам вордскем шаере) ёросъёсысь удмуртъёсты. Отын пыр-поч гожтэмын удмуртъёслэн сям-йылолъёссы сярысь. Бичетын печатламын удмуртъёслэн гуръёссы, кудъёсыз монэ зол тунсыкъяськытӥзы, угось мон соосты ӧжыт тодӥсько. Туж тунсыко учкыны туспуктэмъёсты. Книгаын туж трос вашкала туспуктэмъёс. Та туспуктэмъёс пӧлысь кыкысьтыз мон шедьтӥ аслэсьтым песятайме. Со кияз кубыз кутыса туспуктэме пуксем. Солэн сыӵе туспуктэмез анай-атай дорын ӧвӧл. 

Бичетын Балтась ёросысь потэм дано адямиос сярысь информация но вань. 
Быдэсак лыдӟыны мыным ӧз кылды на. Но верало, туж пуштросо но тунсыко пӧрмем шуыса. Мынам песянае Ӟаныын вордскемын. Солэсь семьязэ раскулачить кариллям. Бӧрысь соос Малмыж ёросэ улыны выжиллям. Озьыен, мынам выжыосы, шуыны луоз, кык улосъёсын герӟаськемын, Леонид Дмитриевичлэн книгаез выллем, со но та улосвылъёсысь удмуртъёсты огазея угось. 

Та бичет асьмелы но, будӥсь пиналъёслы но пайдаё луэ. Удмуртъёслэн сям-йылолъёссы асьме дорысь ялан кыдёкегес но кыдёкегес кошко. Нош мынам сыӵе потэ вылэм берытскеме со вакытэ, куке адямиос шулдыр улыны быгато вал, трос ужаса но, ваньзэ киын лэсьтоно луыса но шулдыръяськыны дыр шедьто вал. 

XIX даурлэн пумысеныз XX даурлэн 60-тӥ аръёсыз дорозь Вятской губерниысь Малмыж уездлэн территорияз Тихоновской ярмарка радъяськем. Сое земской собрание 1887-тӥ арын кылдытэм но со арлы быдэ Аджимын 28-тӥ июне ортчылэм. Та сярысь ВК-ысь «Вужмем» группаын но гожтэмын вал.

Тӥни со ярмаркаез адӟон понна Балтась но Мари-Турек ёросъёсысь удмуртъёс азьвыл ик мынам вордскем гуртам — Малмыж ёросысь Порез гуртэ — люкаськылӥллям, отын ӵыжы-выжыоссы дорын кӧлаллям. Туж трос калык гуртамы вуылэ, пе, вал. Та нуналэ ӵукна ваньзы Аджиме басьяськыны, цирк учкыны ветлӥллям, нош нышыр бере Порезын зэмос калык шулдыръяськон кутске вылэм, урамъёстӥ арганэн кырӟаса, котькуд коркан куно луыса. Шулдыръяськонъёс ӵук ӟардонозь кыстӥськылӥллям. Тӥни озьы кырӟанъёсын, эктонъёсын шулдыр праздник ортчылэ вылэм азьло гуртамы. Та сярысь мыным атае вераз. Туж потэ, туала вакытэ но адямиос озьы ик огкылысь мед улозы но валче праздникъёс мед ортчытъялозы шуыса!

Огъя вераса, туж шумпо-тӥсько, та книгаез басьтӥ шуыса. Со асьмелэн историмы, кудзэ асьмеос тодыны но выжыысь выжые сётыны кулэ». 

Ципья гуртысь Ильсур Камалов, туспуктӥсь:

«Пӧрмиз! Мынам киям выль книга: «Удмурт шыкысысь ваньбуръёс» бичет, книга поттӥсьлэн Леонид Дмитриевич Сапожниковлэн автографеныз. 

Книгае шошма удмуртъёслэн кырӟанъёссы, эктонъёссы но шудонъёссы пыремын. Та бадӟым изданилэсь (750 бамлэсь ятыр) бамъёссэ берыкъяса, паймисько солэн быдӟымлыкезлы, выйисько удмурт калыклэн улон-вылон дуннеяз, солэн лулчеберетаз но сям-йылолъёсаз. Книга туж дуно, отчы туж бадӟым уж понэмын: материал люкан, радъян, кылдытон, профессиональной уровенен дизайнерской вёрстка, дась материаллы рецензия лэсьтон. 

Книга бордын уж кутскиз 1997-тӥ арын но кыстӥськиз 2019-тӥ арозь. Со 22 ар ӵоже туж сюлмо, пуктэм ужпумез быдэстыны тыршыса ужан. Мыным, туспуктӥсьлы сямен, ӵемысь пыриськылоно луылӥз ёросысьтымы тросаз гуртъёсын радъяськылӥсь ужрадъёсысь, праздникъёсысь фото-, видеосъёмкаосы. Съёмкаос 2002-тӥ-2008-тӥ аръёсы толалтэ но гужем толэзьёсы ортчылӥзы. 

2019-тӥ арын книгалэн эскерон (пробной) изданиез потэ. Сырья гуртын но Ижкарын изданиен тодматскон ужрадъёс ортчо. Книга калыкын тодмо луэ. 

Трос кужымзэ но дырзэ понэ Леонид Дмитриевич та книгазэ поттон понна. Мыло-кыдо адямиос коньдон люканы юртто. Озьы ик организациослэн, ужъюртъёслэн кивалтӥсьёссы но та уже пырисько. Бадӟым кужымен книга потӥз (книга поттыны выриз 2011-тӥ арысен). 

Та туж бадӟым уж удмурт йӧскалык лулчеберетэз утён но улӟытон понна дуно ватсэт луэ. 

Мынам малпамея, та аспӧртэмлыко книга котькуд семьяын луыны кулэ: удмуртаз но, ӟучаз но, бигераз но. Со трос лыдӟисьёслы тунсыко луоз. Та издание ёросысьтымы но солэн палэнысьтыз котькуд библиотекалэсь книга фондъёссэ узырмытыны кулэ. Эшшо потэ вал, та книгалы сӥзьыса ёрос масштабен тодматскон ужрад мед ортчоз шуыса. Та ласянь администрацилэн юрттэтэз кулэ.

Леонид Дмитриевич — со легендарной, аспӧртэмлыко адями! Асьмеос дунъяны, гажаны но данъяськыны кулэ сыӵе адямиен. Леонид Дмитриевичлэн эшшо выль сборникъёс поттыны малпанъёсыз вань на. Малпанъёсызлы зэманы мед кылдоз. Кема аръёслы ӝутскем мылкыд, энтузиазм но тазалык сӥземе потэ солы». 

Вукогуртысь Евгения Михайлова, лулчеберет удысын ужась:

«Туж но туж шумпотӥсько, милям ужъюлтошмы сыӵе бадӟым ужзэ пумаз вуттӥз шуыса. Зэмзэ но, Леонид Дмитриевич вань удмурт калыклы туж бадӟым кузьым кузьмаз! Шумпотӥсько: асьме ёросысьтымы удмурт клубъёслэн но та бадӟым книгаез поттонын ӧжыт ке но юртэттсы луиз. Леонид Сапожниковлы „Удмурт шыкысысь ваньбуръëс“ книгазэ поттыны юрттон вылысь 30 апреле милям Ципья черкогуртлэн лулчеберетъя юртаз ортчиз благотворительной концерт. Та концертын тямыс удмурт гуртъёсысь но искусствоосъя нылпи школалэн Ципья филиалысьтыз 60 нылпиос та ужрадэ пыриськизы, 45 сюрс манет люкамы но Леонид Дмитриевичлы сетӥмы. Вань артистъёслы но кивалтӥсьёслы бадӟым тау вераськом. Азьло палан Леонид Дмитриевичлы юн тазалык но творческой азинсконъёс сӥзиськомы! Вань удмурт калык Тӥледын даньяське, Леонид Дмитриевич!»

***

Удмурт газетын ужась луыса но, огшоры лыдӟисьлэн синмыныз учкыса но, малпанъёсме аслам но вераме потэ.

Нырысь ик мон сюлмысь ӟечкыласько Леонид Дмитриевичез та бадӟым вормонэныз, пумтэм шумпотӥсько, сюлмаз нуллэм кемалась малпанзэ улонэ пыӵатыны быгатӥз шуыса. 

Кыкетӥез, мае пусъеме потэ — со «Азьлане» газетлэсь, нимаз ик кызь укмыс ар та газетэн кивалтэм адямилэсь — Александр Михайлович Кунаевлэсь — та уже бадӟым люкет пыртэмзэ. Ӵапак Александр Михайлович, 1991-тӥ арын Ижкарын ортчем «Удмурт Кенешлэн» съездаз пыриськем Татарстанысь Балтась ёросысь делегатъёсын (ачиз но соос пӧлын вал) огмылкыдын луыса, 16 южтолэзе 1992-тӥ арын «Азьлане» газет пыр лыдӟисьёслы вазиськиз, вашкала удмурт кырӟанъёсмес люканэ пыриськыны ӧтьыса. Тани ма со сярысь гожтэ ачиз Леонид Сапожников:

«Гажано лыдзисьёс! Кияды вуэм книга XХ-тӥ даурлэн пумаз удмуртлыкмес утьыны ӝутскеммылэн емышез. 22-23 шуркынмонэ 1991-тӥ арын Ижкарын ортчем „Удмурт Кенешлэн“ нырысетӥ (ньылетӥ) съездаз пыриськизы Татарстанысь Балтась ёросысь делегатъёс но. Тани соос: Байтуганов П. В. — Покчи Лӧзя шор ёзо школалэн директорез, Ермаков И. В. — Ӟаны шор ёзо школалэн директорез, Кунаев A. М. — „Азьлане“ газетлэн редакторез, Никитин В. П. — Карек-Серма покчи ёзо школалэн директорез. Удмурт азьветлӥсьёсты кылзыса ӟырдам мылкыдзэс соос ас дор палъёссы вылэ пазьгизы. Делегатъёслэсь куспазы кельшем огъя мылкыдзэс калыклы вуттӥз Кунаев Александр Михайлович — 16 южтолэзе 1992-тӥ арын „Азьлане“ газетлэн бамаз потэм пичи гинэ статьяез пыр лыдӟисьёслы вазиськиз, вашкала кырӟанъёсмес люканэ пыриськыны ӧтьыса. 

Лыдӟисьёс пӧлысь куд-огъёсызлы со гинэ кулэ вылэм! Нимысьтыз усьтӥськем „Шумот ӝытэ“ рубрика улсын калык кырӟанъёс, чыписькыса улэм тулкымъёс сямен потыны кутскизы. Ялымтэ ӵошатсконъёслы кичӧлтӥсь луизы Л. П. Губанова, А. Е. Сапожникова, Е. Н. Самаева, И. К. но А. С. Павлова кузпалъёс но мукетъёс. Соослэсь адӟем карыса мукетъёс но итӥськылӥзы. Ог дасо ар пала кыстӥськиз та уж...»

Нялтас вераса, калык кырӟанъёслы нимысьтыз рубрика понна тау карыны кулэ Василий Петрович Никитинлы: кырӟанъёсты «Шумот ӝытэ» ним улсын поттыны ӵапак со ӵектэм. 

Кызьы вера ачиз Леонид Сапожников, нырысьсэ сборник кылдытон сярысь малпанъёсыз но солэн потӥзы 1-15.10.1997-тӥ арын «Азьлане» газетын «Марӟан быртыкъёсмес сандыке люкано вал» нимо статьяеныз.

Озьыен, юн оскыса вераны луэ, «Азьлане» газет но та бадӟым уж борды кутскыны мылкыд сётӥсь луиз шуыса. Талы мон туж шумпотӥсько.

Табере нимаз книга сярысь. Кие кутэмлэсь азьло ик, солэсь быдӟалазэ адӟыса гинэ али, валамон луиз, со, зэмзэ но, дуно ваньбурен тырмытэм шыкыс выллем шуыса. Маиз но отын ӧвӧл! Ёросысь тодмо адямиос, кырӟан люкасьёс сярысь ивортодэтэз но отысь шедьтыны луэ. Книгаысь информация ваньмыз лад-лад радъямын, нимаз люкетъёслы висъямын. Кылсярысь, зоутэн (ӝӧксьӧр) кырӟанъёс таӵе темаосъя люкылэмын: кунояськон гуръёс, нимаз нылпи вордонлы, анай-атайлы, егит дырлы сӥзем кырӟанъёс, выль кышнолэн мӧзмыт кырӟанъёсыз но мукет. Нимаз сётэмын кисьтон дыръя быдэстоно кырӟанъёс, лекрут кырӟанъёс. Книгалэн тужгес бадӟым люкетэз сӥземын шошма удмуртъёслэн сюан ортчытон радлыксылы. Бичетын инты висъямын палэнысь вуэм кырӟанъёслы, юмшан, шудон-шулдыръяськон дыръя быдэстоно гуръёслы. Огъя вераса, та книгаын удмурт лулчеберетэн, сям-йылолъёсын, историен тунсыкъяськись муртъёслы, этнографъёслы, фольклористъёслы эскерон понна туж узыр материал люкамын. 

Удмурт калыклэн аслаз историез, аспӧртэмлыкъёсыз но мур выжыосыз вань. Лулчеберетмы но асьмелэн аспӧртэмлыко, сое чакласа но утьыса возьыны гинэ кулэ. Нош удмуртъёслэн лулчеберетсы, улон-вылонзы но сям-йылолъёссы сярысь верась та выллем книгаос юртто та узыр историез утьыны но сое вуоно поколениослы сётыны. Мар шедьтыны луэ таӵе книгаысь? Нырысь ик, удмурт семьяос пӧлын али но возиськись сям-йылолъёсты, праздникъёсты. Со калыклэсь дунневаланзэ но менталитетсэ мургес валаны, поколениослэсь кусыпъёссэс шӧдыны но лулчеберет дунлыкъёсты выжыысен выжые сётонлэсь кулэлыксэ валаны юрттэ. Озьы ик книга удмуртъёслэн вашкала кырӟанъёссы сярысь валан сётэ. Таӵе тодон-валанъёс юртто ышон калэ вуэм яке воксё улонысь потэм кырӟанъёсты улӟытыны но выль улон шокчыны. Со сяна, та выллем изданиос мукет калыкысь лыдӟисьёслэсь удмурт калык, солэн лулчеберетэз но улон-вылон радлыкез сярысь тодон-валанзэс паськытато. Таӵе книгаослы луыса туала адямилэн аслаз калыкезлэн улэп историез борды йӧтӥськыны, вашкалаосыз но ӵыжы-выжыосыз сярысь тросгес тодыны луонлыкез будэ. Озьыен, удмуртъёслэн лулчеберетсы сярысь котькуд книга — со лулчеберет мерасэз утёнэ люкет, кудӥз вашкалазэ утьыны, улӟытыны но азьланьтыны юрттэ.