«Капчи ӧз ке но луы, асме шудо адями шуисько»

Та статьяелэн героеныз, Ольга Степановна Кузнецоваен, пумиськеменымы валче, со вераз, тросгес пичи дырыз сярысь мадёз шуыса. Малы ке шуоно, солэн верамезъя, туала егитъёс песянай-песятайёссылэн секыт пичи дыръёссы, секыт улонзы сярысь ӧжыт тодо.

Кузнецова (Камашева) Ольга Степановна 1940-тӥ арын 20-тӥ гудырикошконэ Кӧргем гуртын вордскем. Кемалась ӧвӧл со аслэсьтыз вордскем нуналзэ пусйиз. Вераськонмес но со бордысен кутскимы.

— Ольга Степановна, кемалась ӧвӧл тӥ вордскем нуналдэс пусйиды. Туж шулдыр луиз шуыса кылӥ.

— Юбилее кылем арын вал ке но, туэ но мон доры трос куноос люкаськизы. Туж шумпотӥсько, куке мон доры озьы трос куноос люкасько. Озьы бере, соос монэ гажало. Мон ачим но адямиосын умой кусып возьыны тыршисько, бускельёсын но эшъяськыса улӥськомы. Бигер-а со, удмурт-а — пӧртэмлыкез ӧвӧл. Соин соослэн монэ гажаса лыктэмзы — мон понна шумпотон, — шуэ пальпотыса Ольга Степановна. — Туала дыре ведь туж ракат улӥськомы, ваньмыз вань, уксёед гинэ мед луоз. Улон но каньыл.

— Азьло сыӵе каньыл ӧй вал-а?

— Каньыл-а, ӧй вал-а, сое валаса вуттыны дырмы но луымтэ, дыр, милям. Малы ке шуоно пичиысен ужаса будӥмы. Пичиысен ик кураськыса ветлӥмы. Кытчы пырод, ма карод? Кӧт сюма ук. Адӟымтэзэ адӟимы ини… Анае колхозын ужаз, атае но. Жугиськонын пленэ шедем 1942-тӥ арын. Атай егитэн ик жугиськонэ кошкем вал бере, ми соослэн кык кузя гинэ нылпиоссы луиськеммы. Анайлы милемыз огназ пыд йыламы султытоно луиз. Ярам ми, нош кӧня вал семьяос, кытын вить-куать яке солэсь но уногес нылпиос… Жугиськон трос адямиосты быдтӥз.

— Школаын дышетскыны луонлыкты вань вал-а?

— Мон 10 классэз йылпумъяй. Дышетски гуртысьтымы школаын сизьым ар ӵоже, ми бере гуртысьтымы школамы начальной школа луыса гинэ кылиз ини. Кӧргем ас дыраз бадӟым гурт вал, али гинэ пичи со. Соин дышетскисьёс трос луизы. Али солы оскымон кадь но ӧвӧл ни. Дышетӥсьёсме но али ке но тодӥсько. Халтурина Фёкла Владимировна туж умой дышетӥсь вал, сое туж яратӥмы ваньмы но. Со али но улэ, но туж мӧйы ини. Огпол гуртэ мыныку адӟеме потэ али сое. Фёкла Владимировна котьку вера вал, мон ашака дышетӥсь луиськем, дыр, шуыса. Но со туж умой дышетӥсь вал. Тышкаськыны но, ушъяны но быгатэ вал. Ма, со гинэ ӧвӧл, тросэз дышетӥсьёс. Азьло дышетӥсьёс шоры мукет синмын учко вал ук: соосты гажазы но, соослэсь кышказы но. Одӥг гинэ учыр верало. Азьло семыке шай вылэ мыныны уг лэзё вал милемыз. Математикаен экзамен сётоно нунал. Шумот. Тоня юлтоше экзамензэ сдавать карыса кошкиз, нош монэ Григорий Семёнович Халтурин потыны ӧз лэзьы. Таос, пе, умой дӥсяськиллям, семыке, пе, мыныны дасясько, лэся. Одӥг дыре со нышыраны кошкиз, со куспын потӥ но доска азе потыса экзаменэз сдавать кари. Кыӵе ини отын парта сьӧры пуксён (серекъя). Потӥ но кошки, Григорий Семёнович ӧвӧл шуыса. Табере эшенымы кыкнамы шай доры лыктӥськомы ини, анайёс кошкиллям. Витьымтэ шорысь мотоцикл куара кылӥськиз, нош ми тодӥськомы: гуртын мотоцикл Халтуринлэн гинэ вань. Мотоцикллэн куараез матэктэ но матэктэ, ми, мар карыны ёрмыса, нюлэс пала вуим но пегӟыса кошким… Дышетӥсь милемыз тодмамтэ. Берлогес вера вал, кык киськем нылъёс озьы пегӟыса ветлӥзы шуыса. Кӧня тышкаськиз. Нош ми шонерзэ вераны кышкамы …Кулэмезлэсь азьлогес анай доры гуртэ куное бертыкум Григорий Семёнович доры мынӥ но шонерзэ верай: соку со киськем нылъёс ӧй вал, ми эшенымы вал. Григорий Семёнович номыр ӧз вазьы ни.

— Ципьяысь школае дышетскыны выжемды бере но, сыӵе ик умой дышетӥсьёс дышетӥзы-а?

— 7 классэз йылпумъяме бере, Ципьяысь удмурт школае дышетскыны пыри. 8-10 классъёс со школаын дышетскизы бере, дышетскисьёс школаын трос вал. Соку школалэн директорез Бабинцев вал, Удмуртиысь. Туж умой директор вал со. Школаын вань кадь предметъёс удмурт кылын нуиськизы. Кубашев Пётр Николаевич ӟуч кылын дышетӥз. Школаын урод ӧй дышетскы. Ципьяе дышетскыны лыктыкум, одӥг «3» гинэ вань вал, соиз но физкультураен. Ачим куасэн ветлыны туж яратӥсько вал, но мугоры таза луэм бере, пӧртэм нормативъёсты сдавать карыны секыт йӧтылӥз. Дышетӥсьёс туж ӟечесь вал. Дышетӥсь урокын вераськыкуз, мон солэн ым шораз учкыса пукисько вал. Куке дышетӥсь умой, дышетскись но тунсыкъяськыса сое кылзэ. Дышетскон процессэ кыскыны быгатыны кулэ. Дышетӥсьёсты яратыса, соос сьӧрын ветлӥськомы вал, но со дыре ик кышканы но, гажаны но быгатӥмы. Улӥмы школалэн подвалаз, отын вал общежитие. Арнялы огпол бертыса ветлӥмы. Нюлэстӥ бертӥськомы вал, пиослэсь пегӟыса, соосын шудыса. Шудэммы потэ вал милям. Шудон понна вазьгес но потӥськомы вал (серекъя).

— Кызьы луиз ке но, тӥ дышетскыны но шудыны гинэ ӧвӧл, ужаны но вутскиллямды.

— Начальной классысен киын кӧжы урыны ветлыто вал колхозын. Эшъёсын ӵош ветлӥмы. Азьло пудо вордыны вож турын уг сёто вал ук, уриськыса турын люкаськомы вал. Со турынэн скалъёсты, парсьёсты, ыжъёсты, казаосты, ӟазегъёсты сюдӥзы. Зэмзэ вераны кулэ: ӟазег сюдонэз ми ум ик тодӥське вал. Соос бусыысь олома быдӟа гадьёсын берто вал, кӧтсы тыр луыса. Татчы, Ципьяе, лыктӥ но пайми: ма, татын ӟазег но сюдоно вылэм шуисько… Кӧргемын ведь ӟазегъёслы воля вал… Ӟазегъёс сярысь вераськон потэм бере тае но вераме потэ. Халтуринъёслэн трос ӟазегъёссы вал. Соос доры черодэн ӟазег возьманы ветлӥськом вал ми эшъёсынымы.  Туж ческыт сюдыса лэзё вал соос милемыз ужаммы бере. Возьмам понна басма но сёто вал милемлы. Со басмаез Пижмарае мыныса дэрем вурытӥськом вал. Озьы тӥни, асьмелы ветлыны одӥг ке но дэрем мед луоз шуыса, пичиысен ужаса будӥмы. Халтуринъёслэн семьяязы Марьяпайзы вань вал, со фабрикаын ужам, соин семьяязы басмазы луэм.

— Ольга Степановна, школаын 10 класстэс йылпумъяса, дышетскондэс ӧд азьланьтэ-а ни?

— Синмы ляб адӟемысь, мыным больницаысен кулэ луись справка ӧз сётэ. Озьыен дышетскыны пырытэк кыли. Зина эше вань вал, со но дышетскыны пырытэк кылиз. Озьыен, 1958-тӥ арын школаез йылпумъяса, комбайнын весовщик луыса ужаны кутски. Ужамтэ уже ӧз кыльы. Со арын озьы ветлыса, ускё басьтӥ но нырысь ужаса басьтэм коньдонэлы Ципья базаре васькыса шудыны потыны лыз куртка но басма, шаль басьтӥ аслым. Весовщик луыса одӥг ар гинэ ужай. Собере одӥг ар ӵоже колхозын валэн тырши. 1960-тӥ арын изба-читальняе заведующий луыса ужаны интыяськи. Ньыль ар ӵоже, картлы кошкытозям, отын тырши. Азьло адями лыдӟиськыны яратэ вал, мон ачим но ас дырам туж трос книга лыдӟи. Удмурт кылын но, ӟуч кылын но. Табере лыдӟеме уг луы ни. Со изба-читальняын ужаку мар но ужаны ӧз тупа: магазинэ ревизия лыктэ вылэм, отчы ӧтё, «Азьлане» газетын селькор луыса но ужаны тупаз (материалъёсты дасямы, котькуд гуртысь селькор аслаз гуртэз сярысь гожъяз; механизаторъёс доры ӵукна лыктыса, ужам ужъёссы сярысь юалляськыса гожъямы, скал кыскисьёслэсь но озьы ик лыдпусъёссэс юалляськыса гожъямы). 1964-тӥ арын скал кыскыны ужаны пыри но пайми: макем секыт ужын мон та дырозь тыршиськем. Киын быдэстоно секыт ужъёс но туж капчи кадь пото вал. Кагаз ужъёслэсь жадиськем. Фермаын сыӵе ракат вал, скалъёс азьын отчёт сётоно ӧвӧл ук (серекъя).

— Нош семья ку кылдытӥды но ку Ципьяын улыны кутскиды? Кин вал тӥляд кузпалды?

— 1964-тӥ арын ик монэ Ципьяе лушкаса вайизы. Геннадий нимо пияш, Кӧргеме юлтош пиеныз шудыны мыныкуз, монэ синйылтэм. Тунсыко, мон лушкатозязы азьвыл нуналаз вӧтай, кызьы монэ лушкало. Но мынам малпанам но ӧз луы, та вӧтэ быдэсмоно вӧт луоз шуыса. Ваньмыз чылкак вӧтам кадь луиз: лушказы вить ӵошен, валэ пуктыса… Вуоно кузпалме тодытэк, соин кусып возьытэк солы картлы кошки ке но, куспамы ми тупаса улӥмы. Табере Геннадийлэн кулэмезлы 8 ар но луэ ини. Со гумыраз плетёной фабрикаын кочегар луыса ужаз.

— Асьтэос тӥ пенсие потытозяды Ципьяысь мех фабрикаын ужады шуыса тодӥсько.

— Озьы. Картлы кошкеме бере, 1965-тӥ арысен пенсие потытозям Ципьяысь мех фабрикаын ужай. Трос кужымме понӥ ужелы. Нокыӵе таукарон гожтэтъёс ӧй ке но басьты, ужын монэ яратӥзы но гажазы, угось мон ужлэсь ӧй кышка ноку но. Ужме туж яратӥ. Фабрикаын ужасьёс но соку туж трос вал. Шумпотыса, шулдыр ужамы. Али ке но адскиськомы валче ужам муртъёсын. Коллективен ужаны быгатӥмы. 

— Тӥ туж каньыл кышномурт. Аресты шоры учкытэк, быгатэмдыя ужъёстэс но быдэсъяськоды, семьядылы но юрттӥськоды. Нылпиосыныды, внукъёсыныды кусыпъёсты умой, дыр.

— Мон татчы улыны лыктэме бере, нырысь улӥмы Анна анайзыенымы ӵош. Соин куспамы туж тупаса улӥмы. Кулонэз азьын тушак вылын кыллись вал ке но, вырӟыса мыным кизэ мычиз. Монэным озьы люкиськиз со… Кузпалэным ньыль нылпиосмес будэтӥмы. Самой быдӟымез Елена Удмуртиын ас семьяеныз улэ. Кема аръёс ӵоже медсестра луыса тыршиз со, туннэ нуналэ фермаын скал кыске. Кыкетӥ пимы Юрий Ципьяын улэ, со но аслаз семьяеныз. Ӟаны колхозын тракторен ужа. Куинетӥез Сергей но Ӟаны колхозын тракторен ужа, улэ милемын ӵош. Коля пие Казане ужаны ветлэ, соин но солэн кышноеныз Иринаен, внукъёсынымы Аринаен но Игнатэн ӵош улӥськомы. Ваньзылы тау, монэ утё, учко. Туннэ нуналэ мынам куать внуке вань, кык правнуке. Туж шумпотӥсько, куное берто шуыса. Сыӵе мусоесь пото ведь ваньзы внукъёсы… Аслад нылпиед но сыӵе йӧтымтэ, дыр, внукъёс кадь. Юнме гинэ уг верало вылэм, внукъёс нылпиослэсь но мусогес пото шуыса… Соин мон соосты ӵукналы быдэ школае келяны потӥсько, ӧй ке келя, лумбыт сюлмы интыяз уг луы. Сыӵе тӥни песянай ини мон (серекъя).

— Озьы бере, тӥ туннэ нуналэ шудо анай но шудо песянай. Ольга Степановна, вераськемды понна тӥледлы бадӟым тау. Таза но шудо луэ, али кема аръёс ӵоже внукъёстылы шумпотыса улыны мед кылдоз!