Киосады — калыкмылэн вуоноез

Таяз аре егитъёслэн нуналзы но Татарстанысь удмуртъёслэн «Гырон быдтон» праздниксы одӥг нуналэ — 28 инвожое — тупало. Ёросысь егитъёсмы пӧртэм удысъёсын ужало, котькудӥз быръем ӧнерезлэн усточиез луэ ини. Соос пӧлы пыртыны быгатӥськом Татьяна Зубареваез но. 

Татьяна вордӥськиз но быдэ вуиз Тагашур гуртын Нина но Егор Константиновъёслэн семьяязы. 2013 арын Ципья шоръёзо школаез йылпумъяса, дышетсконзэ Казаньысь лулчеберетъя но устолыкъя кун институтын азьланьтӥз. Бӧрысь 2019 арын Санкт-Петербургысь Штиглиц нимо художественно-промышленной академие пыриз. Пандемия кутскем бере гуртаз ик бертыны малпаз. Дышетскон вакытаз удмуртъёслэн пӧртэм ужрадъёсаз пыриськиз, ассэ усто возьматыса, Татарстанысь егит удмуртъёслэн огазеяськонзылэн ёзчиез но луиз. Дыр ортчыса, гуртысьтыз ик Игорь нимо пилы бызиз. 

— Туннэ нуналэ мон куинь нылпиё, шудо анай но кышномурт луисько ини. Казаньын дышетскон аръёсам ик «Удмурты Татарстана» обществоен тодматски. Удмуртъёслэсь пӧртэм орнаментъёссэс, пужыоссэс, декоративно-прикладной искусствозэс эскерыны кутски. Трос гинэ калык дауркылъёсты (легендаосты) лыдӟи. Сыӵе зол соос мыным кельшизы. Одӥгез соос пӧлысь мынам нырысетӥ диплом ужелэн инъетэз но луиз. Со Эштэрек батыр сярысь легенда. Татын вераське солэн улонэз но подвигъёсыз сярысь. Кыкетӥ дипломе но удмурт тематикаен герӟаськемын. Солы инъет карыса Улон писпу (древо Жизни) басьтэмын, Дунне кылдон сярысь легенда. Ужъёс туала этнофутуризм амалэн быдэстӥськизы. 

Озьы тӥни егит ныл юн герӟаськиз удмурт кылэн но лулчеберетэн. Солэн улоназ та огшоры тунсыкъяськон гинэ ӧз луы, со валтӥсь ужлы пӧрмиз. 

— Удмурт лулчеберет пичи дырысеным ик туж тунсыко потэ вал. Азьвыл со эктон-кырӟанъёс гинэ вал, собере ини быдэс ужлы пӧрмиз. Орнаментъёс бордазы кыско, соосъя трос гинэ тодыны луэ. Кылсярысь, дӥськутъя валаны луэ, кыӵе гуртысь адями, кӧня солэн нылпиез. Озьы ик егитъёслэн «БиГерд» форумазы пыриськылӥ. Балтасьын ортчыкуз, куратор луи. Ми со арын фотозона лэсьтӥмы. Стилизованной камали лэсьтонъя мастер-класс ортчытӥ. Декретэ потытозям, Балтасьысь искусствоосъя нылпи школаын ужай. 

Туннэ нуналэ Татьяна Зубарева но со выллем егитъёс — ёросысь удмуртъёслэн бадӟым осконзы. Соос удмурт кылэз но лулчеберетэз пӧртэм сямен мукет калыкъёс пӧлын возьмато. Нош егит кузпалъёс нылпиоссэс но удмурт лулчеберетэн тодматыса будэто. Семьяязы ог-огенызы удмурт кылын верасько, нылпиоссы но удмурт кылъёсты тодыса будо. 

Таӵе ӝуась синмо но сюлэмо егитъёслэн киосазы удмурт калыклэн шудо азьланез. Оскон кылдэ, азьланяз таӵе зэмос удмурт кылын вераськись егит семьяос тросгес луозы шуыса.