«Котькуд нылкышнолэн кужымез семья пушкын»

Гуртысь арлыдоосты пумитасько ке, котьку паймисько вал: кызьы соос улон шоры шумпотыса учко, кыӵе пальпотыса но яратыса вераськонэ пырисько. Котькуд вераназы тунсыко кенеш сётыны тыршо, юн сюлмасько. Соин ик сюлэм эшшо но бурдъяське, куке арлыдоос кема аръёс ӵоже улыса, сӥё-дано юбилейзэс пыд йылазы пумитало. Сыӵе арлыдоос пӧлысь одӥгез — Вуж Кушкет гуртысь Зоя Трофимовна Туктарова — 15-тӥ куартолэзе пусйиз аслэсьтыз 90 аресъем юбилейзэ.

Шуныт кылъёсын ӟечкыласа, песянай доры куное вуизы Балтась ёросысь главалэн воштӥсез Наиль Нургаязович Сабирзянов, ёросысь социальной дурбасьтонъя ёзэтлэн кивалтӥсез Алсу Фаризовна Гатиятуллина, «Яна тормыш» возёслэн кивалтӥсез Мугсумзян Равилович Сайфутдинов но Янгул гурт поселенилэн главаез Раниль Фаритович Габдрахманов. Соослэн ӟечкылан кылъёссылы, ваем кузьымъёссылы, Россилэн Президентэзлэн ӟечкылан открыткаезлы но Балтась ёрослэн главаезлэн Таукарон гожтэтэзлы со юн шумпотӥз.

Вуж Кушкет гуртысь Безбородовъёслэн семьяязы вордӥськизы 3 нылъёс: Екатерина, Зоя но Татьяна. Зоя Трофимовна вордӥськиз 1933-тӥ арын. Нылъёс пичи дырысен ик анай-атайзылы котькыӵе ужын юрттыса, ужлэсь кышкатэк, ужлэсь данзэ валаса будӥзы, дышетскыны но вуизы. Секыт дыръёс кутскизы, куке Зоя Трофимовна 7-тӥ классэз йылпумъяз: жугиськон басьтӥз нылъёслэсь атайзэс фронтэ. Анайзылы юн пыкет луыса, Зоя Трофимовна ужаны кутскиз гуртысь колхозын скал кыскись луыса. Пинал нылаш, вань кужымзэ сётыса, семьяез понна тыршиз. Жаляса верано, фронтысь атайзы ӧз ни берты… Пинал дырзы шимес, секыт аръёслы тупаз ке но, со дырысь егитъёс ноку ӧз ӝожтӥське: эшъёсынызы юмшаны поталлязы, пудо-животлы сиён дасязы, ужан ӧнеразы котьку тыршизы. Нокыӵе ужлэсь ӧз палэнтӥськы Зоя апай но: артысь гуртэн одӥг колхозэ огазеямзы бере, парсь сюдӥз, собере пӧртэм ужъёсты быдэсъяз. Егит дырыз Зоя Трофимовналэн ужын гинэ ӧз ортчы: пӧртэм ужрадъёсы, гуртлэн улоназ мыло-кыдо пыриськиз со, вань сюлэмзэ но яратонзэ сётыса, матысь адямиосызлы, эшъёсызлы юрттыны тыршиз. Огдыре гурт кенеш Зоя Трофимовнаез депутатэ быръе, соку кылкутонэз кык поллы йылэ: семья понна гинэ ӧвӧл, быдэс гурт калык понна. Кышномурт ассэ туж умой кивалтӥсен адӟытӥз, гурт понна сюлмаськемзэ котькуд ужын возьматӥз. Секыт дыръёсы ӧз ӝожтӥськы, вань шуг-секытъёсты йыг-йыг чидаз но азьлань улон шоры капчи мылкыдын учкиз. Аслэсьтыз вань улон сюресэз ӵоже ортчем эскеронъёссэ Зоя Трофимовна ачиз гинэ тодэ, ваньзэ вераны уз но дӥсьты, озьы ке но, солэн ымныраз котьку пальпотон, со котькуд учырысь умойзэ гинэ адӟыса, котырысь адямиослы юрттыны тырше.

Аслэсьтыз нылкышно шудбурзэ нылмурт гуртаз ик шедьтӥз: 28 аресэн со бызиз Пантилимон Иванович Туктаровлы. Семьяязы вордӥськизы Иван, Анатолий пиоссы но Алевтина но Валентина нылъёссы. 49 ар кузпалъёс тупаса, ог-огзэс валаса но гажаса улӥзы. Жаляса верано, 2010-тӥ арын Пантилимон агай югыт дуннеысь кошкиз.

50 аресаз вуыса, Зоя Трофимовна дано шутэтсконэ потӥз. Пенсия арлыдаз вуыса но со интыяз огшоры ӧз пукы: киужъёсын вырыны туж яратӥз, гуртысь лулчеберетъя юртэ потылӥз, мыло-кыдо «Марӟан» фольклор коллективе пыриськиз, Ижысь Калыкъёслэн эшъяськон юртазы но вуылӥз. «Кушкетысь песяйёс» пӧлысь одӥгез солисткаез луиз, трос калык кырӟанъёсты тодэменыз, эктыны быгатэменыз сцена вылын ассэ туж усто возьматӥз.

1983-тӥ но 1999-тӥ аръёсы Зоя Трофимовна данъямын вал «Ветеран труда» но «Анайлык» медальёсын. Зэмзэ но, чидась но дано нылкышно ужаз но, семьяяз но адӟем карымон луыны тыршиз, соин ик нылпиосыз но, анайзы шоры учкыса, улонын асьсэлэсь интызэс шедьтыны быгатӥзы.

Улоназ трос пӧртэм учыръёсын пумиськем нылкышно, туннэ нуналэ шудо улэ: Иван пиеныз но Галина кенэныз огазе хозяйство возьыса, котыр юртъерзэс радъяса, ог-огзэс гажаса но валаса.  Шутэтскон нуналъёсы дораз бертыло нылпиосыз, яратоно внукъёсыз но соослэн нылпиоссы. Туннэ нуналлы Зоя Трофимовналэн туж узыр но бадӟым семьяез: 5 нылпиез вань, 9 внукъёсыз но 9 правнукъёсыз.

Дуно анайзэ ӟечкыласа, Иван пиез вера:

— Анай туж кужмо но зӥбыт. Ачиз корка но ӝутыны быгатэм. 90 аресэз пусъён — туж дано но бадӟым уж. Анаймылы сӥзисько юн тазалык но шудбуро улон. Трос аръёс ӵоже улыса, вань нылпиоссэ пыд йылаз султытэмез понна тау шуисько. Улоназ трос шуг-секытъёсын пумиськиз ке но, ноку кайгыронъёссэ семья пушказ ӧз вайы.

Вордскем нуналзэ Зоя Трофимовна семья пӧлаз пумитаз. Асьсэлэсь шуныт кылъёссэ нылпиосыз но внукъёсыз телефон пыр верало, шутэтскон нуналъёсы яратоно анайзэс, песянайзэс но ӵужанайзэс ӟечкыланы берто.

Улон шоры сайкыт синъёсын учкись, сюлмаз каньыл малпанъёсын улӥсь песянайлы мон но сӥзисько юн тазалык но капчи улон. Та чебер дунне вылысь вань умоез но шудоез, улонады сяськаяськись пальпотонэн гинэ мед шӧдӥськоз. Трос аръёс ӵоже матысь адямиосыныды ог-огдэс валаса но гажаса улыны мед кылдоз на!

Юлия Щербакова