«Котырысьтыз чеберез ас пушкыз чебер но чылкыт луэм адями гинэ адӟе…»

Наташа район газетын ужасьёслы, ӵыжы-выжыосызлы но матысь тодмоосызлы гинэ яратоно адями ӧвӧл, дыр, вань «Азьлане» газетэз лыдӟисьёслы но. (Ма, табере «Хезмэт» газетэз басьтӥсьёс но солэсь нимзэ тодо ини.) Юнме ӧз юа, дыр, со сярысь Ижкарысь газет лыдӟисьмы Вера Лобанова но. «Туж тодэме потэ егит гожъяськись Наташа сярысь. Котьку синмаськыса лыдӟисько туж тодыса-валаса гожъямъёссэ...» — шуиз вал со одӥг гожтэмаз.
Нырысьсэ Наташа Жуковаен тодматскимы, куке со «Хезмэт» газетлэн редакцияз ужан практика ортчиз. Собере «Азьлане» газетлы шуд усиз — Наташаез редакцие удмурт но ӟуч кылын гожъяськись карыса басьтӥзы. Наташалы нырысь ми дорын секытгес вал ужаны — удмурт кылын гожъяськыны нимысьтыз дышыны кулэ ук, нош дышетскемезъя со ӟуч кылын гожъяськись журналист, кудӥз кемалась ӧвӧл али йылпумъяз Йошкар-Ола городысь МарГУ-ысь журналистикая факультетэз. Но, соглаш луоды, дыр, гажано лыдӟисьёс, Наташа удмурт кылын но туж усто гинэ гожъяны дышиз шуыса. Газетмылы удмурт шӧм пыриз, со тунсыкогес но лыдӟымонгес луиз. 
Но, ужмылы умойзэ ваемез сярысь вераса быдтытэк, ӝоггес мукетаз выжем потэ. Удмурт но ӟуч кылын гожъяськись журналист луэмез сяна, со туж визьмо но каньыл, огшоры но лякыт сямо адями луэ. Та нылашлэн егит мылкыдыз котьку усьтэмын вылезлы, чылкыт сюлэмыз тунсыкъяськись но утчаськись, зэмлыкез гажась но кырсез валасьтэм. Наташа туж гажа но яратэ удмурт кылэз, со понна котьку дурбасьтэ. 
Егит гожъяськисьмы уг кышка вераны ас малпанзэ, но со дыре ик удмурт возьдаськон сямыз но шӧдӥське. Туж каньыл кылзэ но вала критикаез. Котырысьтыз чеберез ас пушкыз чебер но чылкыт луэм адями гинэ адӟыны быгатэ, шуо. Наташа ӵапак сыӵе — огшоры арбериосысь но чеберзэ адӟыны быгатэ. Сыӵе сямыз ик юрттэ, дыр, солы творческой уженыз быгатыса вырыны. Соин ик, дыр, школаын дышетскон аръёсаз но со висъяськем тунсыкъяськись сямыныз, тодӥсь -валась луэменыз. Пинал дыръяз ик со мыло-кыдо пыриськылэм пӧртэм конкурсъёсы, олимпиадаосы, кылбуръёс но гожъяны вутскылэм. Озьы ик студент дыръяз но тунсыко улонэн улэм, тужгес шумпотыса тодаз вае журналист практика ортчемъёссэ.
Лыдӟисьёсмылы тунсыко, луоз, тодыны кин бен та нылашлэн анай-атаез. Анаез, Ираида Евгеньевна, Ципья школаын ӟуч кылъя но литературая дышетэ. Нош атаез, Леонид Валентинович, Сырья гуртысь, колхозын слесарь луыса ужамез сяна, со усто мызганэн шудыны быгатэ (оло, Наташаез но куке шудыны дышетоз али). Алеся сузэрыз но кырӟаны-эктыны усто, со туэ 11-тӥ классэз йылпумъяны дасяське. Озьы ик, ӟуч сямен вераса, «заочно» тодӥськомы Наташалэсь песянайзэ. Со туж ческыт пӧраське шуыса, одно ик вераны кулэ кадь... (Солэсь пӧраськем саламъёссэ веръяммы трос пол вань уго). 
Туала улон кагаз газетэн артэ электрон амалэн ужамез но кулэ каре. Соин, газетэ гожъям сяна, Наташа быгатыса быдэсъя сайтэн герӟаськем ужъёсты но (пусйыны кулэ, кызьы удмурт газетэн, озьы ик бигереныз но выре), егит нылаш туала компьютер амалъёсын «эшлыко» улэ. Сыӵе ужась луыку оскон кылдэ, газетлэн вуоноез вань шуыса. 
Ӝоген яратоно Наташамы пусъёз вордскем нуналзэ. Ваньмыз умоез гинэ мед луоз бордад вань улонэд ӵоже, ноку медаз ышы улонэн тунсыкъяськон мылкыдэд, медаз кельтэ осконъёсыд. 

Ӵош ужасьёсызлэн нимыныз Екатерина Салтыкова