Кӧргем — данъяськымон адямиосыныз тодмо луись гурт (фоторепортаж)

Лыдӟисьёсты ёрос центрлэсь 32 иськем кусыпын интыяськем пичи гинэ удмурт гуртэн — Кӧргемен — тодматыны малпаммы бере, 8-тӥ шуркынмонэ отчы сюрес кутӥмы. Кӧргем гурт милемыз туж шуныт пумитаз: корреспондентэн пумиськыса вераськон понна гуртысь кӧня ке активистъёс (кузпалъёс Юрий но Тамара Даниловъёс, Антонина Камаева, Полина Поликарпова), ӵош люкаськыса, монэ витё вал ини.

— Гуртмы сярысь кемалась гожтоно вал ини, тыршись калыкмы сярысь газет лыдӟисьёс мед тодысалзы. Берлозэ Кӧргем сярысь 22 ар талэсь азьло статья потэм вал ук ини, тани со, — шумпотыса пумитазы монэ кӧргемъёс но, ӵужектэм газет бамез мычыса, киям сётӥзы. Со вылэм Кузьма Халтуринлэн гожтэм статьяез.  

Кӧргем гуртын вордскем но будэм, нош собере улонзэ Пермь улосвылын азинтэм Кузьма Халтуринлэн гожтыса кельтэм материалэзлы осконо ке, Кӧргемын вашкала дыръёсы пыраны-потаны луонтэм нюлэс но нюр интыос вылӥллям. Удмуртъёс, пе, та пала вуиллям Арча котырысь бигеръёс донгемен. Татчы кӧчыса лыктэм удмуртъёс нюлэсъёсты сайкиллям, нюръёсты шупатӥллям. Туала Кӧргем гуртлэн интыяз азьло нялмыт, гурезё инты, пе, луэм. Нырысь ик татчы вуэм Кӧчергем нимо мурт, ӵапак со ик гуртлы улон сётэм, татчы нырысетӥ адями луыса улыны интыяськем. Берлогес мукет муртъёс но выль кылдэм гуртэ кыстӥськыны кутскиллям. Гуртэз азьветлӥсьсылэн нимыныз «Кӧчергем» шуиллям. Пумен Кӧчергем Кӧргемлы пӧрмем…

Та интыын гуртысь старосталэн Юрий Даниловлэн (ӵапак соос дорын люкаськимы) куараез лыдӟонме куспетӥ кариз:

— Кӧргемамы азьло трос хозяйствоос луиллям. Быдӟым Отечественной ож кутскемлэсь азьло 60-лы матэ юртъёс сылӥллям. Жугиськон бере коркаослэн лыдзы кулэсмем ини — татын улӥсьёс Марий Эл но Киров улосъёсы улыны кошкиллям…  

Кӧргемъёслэн ивортэмзыя, шонергес вераса, гуртын азьло улэм мӧйыослэн тодэ ваёнъёссыя, гуртлэн нырысетӥ юртъёсыз туала гуртлэн пумаз интыяськем нюкысь Урбор шур дурын луиллям. Берлогес, ву нюртэмысь, юртъёсты нюк вадьсын пуктылыны кутскиллям. Туннэ нуналэ та пичи гинэ чебер гуртын 17 улоно корка, со сяна 3 вуж но буш сылӥсь коркаос лыдъясько. 70-тӥ аръёсы Кӧргемысь куинь семья Казахстанэ улыны кошкем — улон условиос отын умойгес луиллям. Улӥсьёс ваньзы шуымон удмуртъёс. Одӥг гинэ пор кензы вань вылэм — Светлана Петрова.

Кӧргемын тросгес пенсионеръёс уло, но ужан арлыдэн пиосмуртъёс но, кышномуртъёс но вань (ог 15 адями лыдъяське). Сюрессы гуртын умой — Кӧргемъёслы сое «ЩПС» программая лэсьтӥллям. Куке но татын магазин но луэм (табере арняяз огпол автолавка вуылэ), медпункт но (кылем арын ворсаськем) ужам, клуб но… Табере соос ӧвӧл ини. Парсь фермаоссы гинэ но гуртазы куинь луиллям. Ваньмыз 2016-тӥ арын ворсаськем. 2018-тӥ арын самообложение амалэн люкам коньдонлы нылпи площадка лэсьтӥллям (гуртын ог 20 мында нылпиос вань на), туэ бадӟымъёслы спортэн вырон понна но кӧня ке тренажёръёсты интыяллям. Интернет вотэсын гуртсылэн группазы вань, пӧртэм ужпумъёсты но юанъёсты отын гинэ сэртто-пертчо вылэм.

Школае но нылпи садэ ветлӥсь нылпиослэн лыдзы но ӧжыт ӧвӧл (Ципьяе но Дургае ветло). Тросэз улӥсьёс ужало Дурга гуртын, «Активист» обществоын. Егитъёс гинэ гуртэ интыяськыны уг дырто вылэм. Но соос вань ик. Сыӵеос пӧлысь пусйыны луэ Татьяна но Михаил Тургеневъёсты (кык нылпизы) но Анастасия но Александр Семёновъёсты (куинь нылпизы). 

Быдӟым Отечественной ож кутскемлэсь азьло, али со йылпумъяськем бере но, гуртын 7 аръем школа луэм, 1955-тӥ арын со ньыль аръем школа луыса кылем. 1976-тӥ арын, нылпиослэн лыдзы ӧжыт луэмысь, со но ужамысь дугдэм. Но 1989-тӥ арын школа ас ӧсъёссэ нош ик усьтэм но 2012-тӥ арозь ужам. Ӵапак татын кема аръёс ӵоже ужаллям ёросамы тодмо луэм Халтуринъёслэн династиысьтызы представительёс. Григорий Семёнович Халтурин витьтон арлы матэ школаын дышетӥсь но директор луыса тыршем, кузпалэз Фёкла Владимировна но школаын кема аръёс ӵоже дышетэм (нялтас вераса, Фёкла Владимировна туннэ нуналэ Кӧргемысь самой мӧйы адями луэ, солы 98 арес). Берлогес Вячеслав Григорьевич анай-атайзылэсь ужзэс азинтэ, школа ворсаськытозь отын ужа (жаляса верано, воргорон туэ висьыса кулэм). Халтуринъёслэн семьязы сярысь туж данъяськыса веразы кӧргемъёс.

— Сыӵе дано адямиосын гуртмы узыр, — азьланьто веранзэс вераськоно муртъёсы. — Милям гуртмы уно дано адямиосты будэтэм, соосын но газет пыр лыдӟисьёсты тодматэммы потэ вал. Кылсярысь, Елена Павловаен. Со партийной но кун ужчи вал.

Павлова Елена сярысь, зэмзэ но, нимысьтыз гожтымон. Куанер крестьян семьяын вордскыса, секыт гурт ужлы дышем нылаш, вазь ик лулысь-сюлмысь пыриське политической движение. 1922-тӥ арын пыре ВКП(б)-лэн радаз. Ас вакытэзлы туж тупась зӥбыт сямыз юрттэ солы карьерая ӝутскыны. 1923-тӥ арын Казаньын партийной кадръёсты дасянъя вакчи дыръем курсъёсты ортче. Кӧня ке дыр ужа Ижевскын. Ӝоген берытске Казане, ужа Кузон карлэн исполкомаз но Тат-ЦИК-лэн аппаратаз вылӥ должностен кивалтӥсь луыса.

1933-тӥ, 1935-тӥ аръёсы ТАССР-ысь делегатъёсын валче пыриське Москваын ортчем колхозникъёслэн нырысетӥ но кыкетӥ Всесоюзной съездъёсазы. Со аръёсы матысен тодматске Н.К. Крупскаяен.

Кыӵе гинэ постъёсын ужаны уг тупа, Елена Павлова котькытын ассэ кужмо, чырмыт валась-быгатӥсь кивалтӥсен возьматэ. 1935-тӥ арын Елена Павловаез быръё ВКП(б)-лэн Тюлячи райкомезлы нырысетӥ секретаре. Огдышем сямен, татын но, пужалляськыса, паськыт вамышъёсын ужаны кутске.

Но кема ужаны солы кылдымтэ ни. 1937-тӥ арын, юри янгыше уськытыса, сое арестовать каро. Со арын ик, калык тушмон чотэ пыртыса, ыбо.

1959-тӥ арын быдэсак реабилитировать каремын.

…Собере чузъяськиз Поликарпов Иван Дмитриевичлэн нимез. Ижевскын кунгожсьӧр кылъёсъя факультетэз йылпумъяса, со кӧня ке дыр ӵоже англи но немец кылъёсъя дышетӥсь луыса ужам, кык ар ӵоже Германиын но улэм. Отысь бертыса, 1973-тӥ арын Набережной Челны городысь «КамАЗ»-ын ужаны кутскем. Технической переводъя отделлэн кивалтӥсез но луэм. Трос кылъёсты тодэ. 2008-тӥ арын дано шутэтсконэ потэмез бере но американо-российской предприятиын ужзэ азьланьтэм. 2018-тӥ арысен шутэтске, улэ семьяеныз Набережной Челны городын.

Иван Дмитриевич, кыдёкын улэ ке но, вордскем гуртэзлэн зэмос патриотэз луэ вылэм. Соин шумпотыса монэным телефон пыр герӟаськиз но гуртоосыз сярысь мадиз.

— Гуртамы вылӥ тодон-валан басьтэм, уженызы дано луэм адямиослэн лыдзы ӧжыт ӧвӧл. Пусъеме потэ Павлов Владимир Ивановичез. Туж усто адями вал со. Мон кадь ик, кунгожсьӧр кылъёсъя факультетэз йылпумъяз, Йошкар-Олаысь политехнической институтын дышетӥз. Но, жаляса верано, туж вазь кулӥз, солы ваньзэ-ӧвӧлзэ 34 арес гинэ вал. Озьы ик Халтурин Юрий Иванович но гуртамы туж гажамон адями. Уфинской нефтяной институтэз йылпумъяса, гумырыз ӵоже Салават городысь нефтехимической комбинатын ужаз. Али но сӧл-таза, Салаватын ик улэ. Андреев Владимир Иванович  —  Быдӟым оже пыриськем мурт, Альметьевскысь МВД-ын ужаз, подполковник звание басьтӥз. Со кулэмын ини. Пусйыны кулэ Чумакова Прасковьяез но. Ижкарысь пединститутэз йылпумъяса, Играын партиысь райкомлэн организационной отделэзлэн заведующиез луыса тыршиз. Али но Играын улэ. Озьы ик, Ижкарысь сельхозинститутэз йылпумъяса, Игра ёросын, нош собере Ципьяе бертыса агроном луыса ужаз Петров Константин Аркадьевич. Со Москваысь Тимирязевской академиез но йылпумъяз. Ёросын тодмо луэм агрономез Иван Владимирович Губановез но вераны кулэ. Со «Гурт удысысь сӥё-дано ужась» нимен пусъемын. Солэн выныз Анатолий но гуртамы гажамон адями, Казаньысь физматэз йылпумъяз, компьютеръёсын ужаны туж усто. Камаев Виталий Иосифович но подполковник званиен пенсие потӥз, туннэ нуналэ Покчи Лӧзя гуртын улэ.

Вераськонмы ӵоже вӧзамы пукем кӧргемъёс диалогмес мыло-кыдо кылзӥськизы но Иван Дмитриевичлэн котькуд верам фамилиезлы быдэ, зэматыса выллем, йыръёсынызы шоназы (гуртозылэсь Губанова Лидия Павловналэсь нимзэ но ватсазы — кышномурт ас дыраз «Азьлане» газетлэн матысь эшез луэм, лыдӟисьёсты гожъям материалъёсыныз шумпоттэм). Котькудӥзлэн синъёсаз гуртоосынызы данъяськон мылкыд шӧдскиз.

— Гуртын номыр но ӧз кыльы ке но, со милемлы туж шулдыр потэ. Аслад вордскем гуртэд аслад ини со, котьма шуид ке но, — азьланьтӥз вераськонмес Тамара апай Данилова. Тӥни ук данъяськымон адямиосмы гинэ но мамында.

Тамара апай Юрий кузпалэныз гумырез ӵоже Кӧргемын уло ини. Соос кыкназы но та гуртысь, соин гуртсылэн азьлоез но туннэез сярысь соос туж сюлмасько. Полина но Антонина апайёс но сыӵеесь ик.

— Клубмы ӧвӧл шуыса но ум ӝожтӥськиське, Дургае ветлӥськомы, Балтасьын ортчись концертъёсы но мыло-кыдо пыриськиськомы. Ми — активной улон нуыны тыршись адямиос. Куспамы но шулдыр, тупаса, кенешыса улӥськомы. Ужаны но ӵош. Та нуналъёсы, кылсярысь, валче люкаськыса ӟазегъёсты вандӥмы, — шуо соос.

Кыӵе ке куронъёсты ӧвӧл-а шуэм юанлы но соос, малпаськытэк ик, вазизы: ӧвӧл, милемлы, пе, ваньмыз кельше. Луэмезлы тау карыса улыны быгатыны, пе, кулэ.

Пумиськем адямиосы Кӧргемысь вань кадь адямиосты — Александровъёсты, Тургеневъёсты, Петровъёсты (2 семья), Чумаковъёсты, Губановъёсты (3 семья), Даниловъёсты, Андреевъёсты, Семёновъёсты, Поликарповъёсты (2 семья), Лепатовъёсты, Камаевъёсты, Халтуринъёсты (2 семья) — возьмато кадь. Гуртын улӥсьёс ваньзы но тыршисесь, ужасесь. Та сярысь уноезлэн семьяослэн тросэн пудо вордэмзы, бадӟым но утялтэм юрт но юрт котыръёссы гинэ но верало.

Зэм, гуртэз чебер но узыр юртъёс ӧвӧл, нош огъя луэменызы, тыршыса улэменызы асьсэос адямиос шулдырто.

Фото: Вакиф Закиев, Наталья Жукова