Кургем гуртын одӥг юбилярлы тросгес луиз

Югыт дунне вылын адямилы кӧня улыны кылдэмын нокин но уг тоды. Али гинэ кадь адями вордӥське, нырысетӥ вамышъёссэ лэсьтыны турттэ, нош берлань учкыны кутскиськод ке, быдэс даур ортчемын кадь. Озьы ик Любовь Сергеевна но аслаз пичи дуннеяз гумырзэ ортчытэ. 

Та пичи дуннеяз улыны но шумпотыны солы юрттэ покчиез нылыз Нина. Кургем гурт пичи ке но, татын арлыдоослэн лыдзы ӧжыт ӧвӧл. Оло, инкуазез сыӵе умой, оло, калыкез сыӵе каньыл мылкыдо. Дано арлыдоослэсь радзэс будэтӥз табере Любовь Сергеевна но. 

Жаляса верано, юбиляр-песянаен ваче пумит вераськыны луонлык ӧз кылды. Солэсь улон сюрессэ, сюлмаськонъёссэ, шумпотонъёссэ но вань адӟемъёссэ нылыз пыр тодӥмы. Капчи шуымон ӧвӧл со сюрес. Асьтэос но валаськоды, дыр, кыӵе секыт вакытэ вордӥськизы асьме арлыдоосмы. Озьы ке но, сютэм улон, секыт уж, бадӟым ыштонъёс пыр соос кыдазы гинэ. Оло соин но соослэн ӝуась сюлэмъёссы али но ужлэсь уг палэнско, соос ялан маин ке вырыны тыршо. 
Гондыргуртысь Ольга но Сергей Петровъёслэн семьяязы Любовь нылзы кыкетӥез нылпи луыса вордӥськиз. Бӧрсяз эшшо одӥг ныл вордскиз на, собере кема витем пизы но югыт дуннеез адӟиз. Жаляса верано, куинетӥ нылзы пичиысен ик кулӥз. Петровъёс ас кужыменызы улӥзы-вылӥзы, пудо-живот вордӥзы. Любалы 6 арес но тырмытэк кутске вир кисьтон дыр — Быдӟым Атыкай ож. 

— Анаймы аслэсьтыз атайзэ рос-прос уг но тоды. Пичи дыръяз ик ӵужатаймес войнае басьтӥллям. Кӧня ке пиосмуртъёсты люкаллям но нуыса кошкиллям. Со дырысен ивортэк ышем ӵужатаймы. Озьы пичи дырысеныз ик секытэн пумиськем ини со, — вера Нина Тихоновна.

Озьы ке но Люба 5-тӥ классозь тодон-валан басьтэ, школаын дышетске. Собере секыт улэменызы, ужаны потоно луэ, анаезлы кызьы ке но юрттыны тырше. Колхозын пӧртэм ужъёсты быдэсъяно луэ. 

— Тани кемалась ӧвӧл гинэ трудовойзэ учкиськем вал, отын 1966-тӥ арысен гинэ гожтэмъёсыз вань. Та арын со ыжъёсты сюдыны кутскем колхозын. Со дырозь кытын ужамез тодмо ӧвӧл, — азьланьтэ веранзэ Нина нылыз. — 1974-тӥ арын анаймы кыкетӥ кышно луыса Кургем гуртэ лыктэ. Атаймы — Тихон Григорьевич — туж ужась, быгатӥсь, усто, кибашлы адями вал. Пӧраськыны но, вуриськыны но, лэсьтӥськыны но быгатэ вал. Нырысетӥ кышноез кулэм бере, солэн куинь нылпиез кылем — Николай, Светлана но Пантелеймон. Анаймы лыктыку, Пантелеймон гинэ дораз луэм, сое аслэсьтыз пизэ кадь вордэм со. Ми сое «агай» гинэ шуиськом. Светлана Кускем гуртын улэ, нош агайёс — городын. Ваньмынызы туж умой вераськиськом, пумиськиськом. Инмарлы тау, кусыпъёсмы шунытэсь. 
1975-тӥ арын Тихон но Любовь Чумаковъёслэн Наталья нылзы вордӥське, 1976-тӥ арын — Нина нылзы. Нылпиоссэс пыд йылазы султытон понна, кыкназы ик «Активист» колхозын ужало. Любовь Сергеевна 1980-тӥ арын парсьёсты сюдыны кутске, со сяна мукет ужъёсты но быдэсъяны вутске на. 1990-тӥ арын пенсие потэ но со дырысен пенсионер шуыса лыдъяське. 20 ар ӵошен ог-огзэс валаса но яратыса улэмзы бере, 1994-тӥ арын, улонзылэн пыкет луись воргоронзы — Тихон Григорьевич — улонысь кошке. 

Туннэ нуналлы Любовь Сергеевна анай но ӵужанай гинэ ӧвӧл, солэн 1 правнукез но вань ини. Наталья нылэз ас семьяеныз Сизнер гуртын улэ, Нина вордскем гуртаз ик тырше. Со возёсысьтызы фермаын заведующей луыса ужа.

Юбилей нуналаз Любовь Сергеевнаез но ӟечкыланы куноос лыктӥзы. Сьӧразы соос кузьымъёс но вайизы. Юбиляр-песянай соосты шумпотыса, капчи мылкыдын пумитаз. Дано лыдпуссэ ӵошен пумитаны вуизы вань ӵыжы-выжыосыз но.