Кырӟа но эктэ «Инвожо»

Кылдэмын ни со 1981 арын. Кивалтӥсез удмурт воргорон Геннадий Гайфутдинович Ахметов. Та коллектив ас азяз пуктӥз асьме калыкмылэсь вуныны кутскем яркытэсь сям-йылолъёссэ выльысь калыке вуттыны, выль эктон-кырӟанъёсын калыкез тодматыны, шумпоттыны. Артистъёс асьсэос концерт костюмъёс вуро, репертуарлы материалъёс люкало-дасяло. Ансамбль куинь люкетлэсь сылэ - покчи, шоро-куспо но мӧйыос.
1993 арын коллективлы калык ансамбль ним сётизы. Та нимез соос данэн нулло: трос пол луылэмын ни республикая, улоскуспо но калыккуспо фестиваль-конкурсъёслэн лауреатъёссы. Кемалась ӧвӧл «Инвожо» калык фольклор ансамбль Сочи курорт-городын ортчытӥськем «Народные истоки» Калыккуспо (Международный) фестивале пыриськиз. Коллектив выльысь юнматӥз аслэсьтыз вылӥ устолыко луэмзэ но пусъемын вал «Народные истоки» фестиваль-конкурслэн кубокеныз но Лауреатлэн I степенё дипломеныз. Туэ гужем «Инвожо» ветлӥз на Москвае. Отысь по пӧртэм дипломъёсын бертӥз. Нош кылем арняе лыктӥз асьме ёросысь Ӟаны гуртэ. Концерт умой дасямын вал. Чырткемесь эктонъёс но шулдыресь кырӟанъёс учкись калыклы ӧз акыльтэ, шумпоттылӥзы гинэ. Котькуд быдэстэм номер кужмо кичабонъёсын дунъяськылӥз.
Ма бен, «Инвожо» ансамбльлы сӥзём вормонъёс, бур сюрес!