Зарезь тулкымъёстӥ уяса

Урамысь огшоры адямиез дугдытыса кунгож утисьлэн нуналэз яке ядерной обеспечения ӧнерчилэн нуналэз ку пусйиське шуыса юад ке, соку ик малпаськытэк вераны нокин уз быгаты, дыр. Нош Военно-морской флотлэсь нуналзэ тросэз тодо. Шаермылэн котькуд сэрегаз нимысьтыз торжественной ужрадъёс, пумиськонъёс, ӵошатсконъёс радъясько. 

Гажано зарезьчиос, офицеръёс но та удысысь ӧнерчиос, ветеранъёс! Сюлмысен тӥледыз ожгар ӧнерысь праздникеныды ӟечкыласьком! Улонысь тӧлъёс котьку тӥ понна шонер мед пельтозы. Улон кузя, зарезь тулкымъёс кадь капчи но каньыл уяны сӥзиськом. Ужады азинсконъёс но вормонъёс гинэ мед луозы! Мед тулкымъяськозы зарезьёс, нош тӥляд сюлэмды но улонды тынӥсь медло. 

Со сяна, зарезь дуръёсын та нуналэ ожгар техникалэн туж чебер парадъёссы ортчо, сое синйылтытэк кельтыны уг лу, со аспӧртэмлыко мылкыдъёс кылдытэ, синмаськытэ. Куке тон вӧзтӥ бадӟым военной корабль яке подводной лодка ортче — валэктонтэм мылкыдъёс, вылтыр ик юзыр-кезьыр луыса кошке. Туэ но та йылол уз тӥяськы шуыса малпасько.

Асьме ёросамы но зарезьын службазэс ортчем яке улонзэс зарезен герӟам адямиос ӧжыт ӧвӧл. Соослэн аспӧртэмлыко ужпумзы копак вуэн но чебер пейзажъёсын, пӧртэм шаеръёсын, инвисэн тырмемын шуыса малпалод, но татын туж трос «вуул изъёс», кудъёсыныз зарезьчиос нуналлы быдэ пумисько но шаермес утён уже асьсэлэсь бадӟым люкетсэс пырто. 

Таӵе аспӧртэмлыко войскоосын службазэс ортчизы аслам ӵыжы-выжыосы но. Игорь Щербаков но Максим Исаев ог-огзылы матын луись агаен-вынъёс. Пичи дырысенызы соос ог-огзылы юрттэт луыса будӥзы, али но соос одӥг городын уло, ӵем пумиськыны луонлык уг кылды ке но, сыӵе пумиськонъёс нимысьтыз шуныт ортчо кадь. Оскисько, азьланяз но озьы ик луоз.

Игорь Вуж Кушкет гуртын 1991 арын вордӥськиз. Анаез — Светлана, атаез — Владимир. Шоръёзо школаез йылпумъяса, вылӥ образование басьтыны Игорь Ижевске кошкиз. Татын со географической факультетын умоен дышетскыса, котькуд ужрадъёсы, ӵошатсконъёсы, вожвылъяськонъёсы пыриськиз. Университетэз умоен йылпумъяса, ас ӧнерезъя ик уж шедьтӥз. Нош азьвыл ик, котькуд зэмос воргорон кадь, со азьын бадӟым ужпум сылӥз — армия. Солэсь со ӧз пегӟы — та котькуд пиосмуртлэн дано ужпумез.

2013 арын толсураз со арми радъёсы басьтӥське. Азьвыл ик учебкаез солэн Архангельск улосвылысь Северодвинск городын ортче. Татын со корабльын электриклэсь ӧнерзэ но военно-морской флотлэсь Уставзэ дышетске. Учебказэ ортчем бераз, 2014 арын куартолэзе, Калининград улосысь Балтийск городэ лэзиське. Службаез «Настойчивый» эсминецын но «Бойкий» корветын ортче. Азьвыл БЧ-5-ын (электрикаез но механикаез эскерон-чаклан), собере снабжения службаын. 

— Флотын служба ортчытонлэсь одӥг аспӧртэмлыксэ висъяны быгатӥськод-а?

— Музъем вылын но зарезь вылын кӧня ке пӧртэмгес служба шоры учконъёс. Корабльын коллектив юнгес огазеяськемын, тупаса улӥсь шуод-а, мар-а. Котькудӥз аслэсьтыз ужзэ рос-прос тодэ но быдэстэ. Арми дырысь самой тодэ кылемез — зарезе нырысетӥзэ потон, куке тонэ зарезьчие куто. Палубаын сылӥськод, котырын — зарезь, ӧжытак салкым сылало омыр, мукет номыр ӧвӧл. Татын туж аспӧртэмлыко йылол вань — одӥг плафон зарезь ву юоно. Со бере гинэ тон астэ зэмос зарезьчи шуыны быгатӥськод. Туж тунсыко йылол.

— Ӧнер праздниктэс кызьы ке пусйиськод-а?

— Кызьы ке нимысьтыз висъяса, данъяса уг пусйиськы. Тужгес семья котырын, матысьёсын гинэ пукиськом. Луонлык кылдӥз ке, куддыр эшъёсын но кытын ке люкаськиськом. Тужгес со пӧртэм югдуръёсын герӟаськемын. Городын, луонлыкъёс тросгес ини, пӧртэм ужрадъёс ортчыто, татчы вань калык потэ кадь.

Туннэ Игорь Ижевскын ик улэ, «Трест Геопроектстрой» ООО Тодослыко Ужпӧр Ужбергатонниын физической мугъёслэн лабораториеныз кивалтэ. Ӧнерез дышетскемезъя быръемын, соин ужез но кельшымон, аслыз тупась. Солэн сюрестӥз ик ӵужодӥгез но мынӥз шуыны луэ — Максим.

Максим Вуж Кушкет гуртын ик 1997 арын вордӥське. Анаез — Наталья (Игорьлэн атаезлэн сузэрез луэ), атаез — Олег. Ӟаны шоръёзо школаез йылпумъяса озьы ик Ижевскысь кун университетэ вылӥ дышетскон юртэ пыре. Татын со ассэ вуын уясь чорыг кадь шӧдэ: студенческой весна, турслётъёс, ӵошатсконъёс, ваньмыз туж яркыт ужрадъёсын тырмиз, дышетсконзэ но палэнэ ӧз кельты.

2020 арын коньывуон толэзе Максимез арми радъёсы басьто. Службаез Сьӧд зарезьысь флотын, 41-тӥ Севастопольской Нахимов орденлэн ракетной корабльёслэн но катеръёслэн бригадаязы, «Ивановец» ракетной катерын ортчиз. Электромеханической боевой частьлэн мотористэзлэсь ужзэ быдэстӥз, старшой матрос звани басьтэмын.

Зарезь, омыр, пӧртэм интыос — та ваньмыз военно-морской флотлэн романтикаен тырмем вакытъёсыз, но моторист — со туж секыт, нӧд, кылкутымон уж. Куддыр сайкыт чагыр инбамез но адӟытэк улоно, пӧртэм газъёсын но шокано, но служба вань служба, солэсь нокытчы уд пегӟы. 
Максим ЗАО «ИННЦ»-ысь (Ижкарысь мувӧй тодослыко центр) инженерной геодезия ёзэтэзлэн 2-тӥ категориен инженер луыса ужа. Ӵемысь шуген сюроно интыосы командировкаосы потылэ, но аслыз ужез кельше, котькуд нунал мар ке вылез, арми службаяз кадь ик котыраз чебересь инкуазь суредъёсын.

— Музъем вылын но зарезь вылын служба ог-огезлэсь маин ке висъяське-а?

— Валтӥсь аспӧртэмлыкез со азьвыл ик военной форма. Зарезьчиослэн формазы туж чебер но тодэ кыльымон. Котьку синмаськыса учко, городэ потыку но котьку туспуктыны курисько вал ортчись адямиос. Со сайкыт но югыт малпанъёс кылдытэ. Котькуд солдат понна самой яркыт тодэ ваёнъёс нырысетӥ зарезе потонэн герӟаськемын. Соку тон уд валаськы, мае возьмано. Тазалыкед но куддыр секыт югдуре вуттыны быгатэ, мугоредлэсь лэйкамлы реакцизэ валаны кулэ. Татын ваньмыз тунсыко но бугыртӥсь.

— Праздникез пусъён тон понна кызьы ортче?

— Каньыл но шыпыт пусйисько, мултэс йыртэманъёстэк. Яке эшъёсыным, яке ӵошен служить каремъёсын. Зэмзэ но, городын туж трос луонлыкъёс, но куке тон одӥг ар гинэ та «омырын» шокад, сокем юн уг шӧдӥськы та нуналлэн «ӧтемез».

Озьы ке но, Игорь но Максим — шаермылэн дано пиосыз. Улонзэс весяклы зарезен ӧз ке но герӟалэ, куашетӥсьтэм зарезьлэн шунытэсь тулкымъёсыз соосыз ялан азьлань нуо, выль вормонъёслы но шумпотонъёслы.

***

Россиысь военно-морской флотын туннэ нуналэ ньыль рангъёсты висъяны луэ. Корабельной составаз боевой корабльёс, нимысьтыз ужъёсты быдэстӥсь корабльёс, обеспечениысь зарезь но рейдовой судъёс пыро, нош боевой составаз — боевой корабльёс гинэ.

1-тӥ ранге пыро крейсеръёс, эсминецъёс, ву улысь лодкаос, дышетскон (учебной) корабльёс, десантной корабльёс. Командовать каре 1-тӥ рангысь капитан.

2-тӥ рангын сторожевой корабльёс висъясько. Кузёяське 2-тӥ рангысь капитан.

3-тӥ ранге пырто пичиесь ракетной, артиллерийской, вуул лодкаослы пумит, десантной корабльёсты но тральщикъёсты. Командовать каре 3-тӥ рангысь капитан.

4-тӥ ранге пыро тральщикъёс, десантной но боевой катеръёс. Соосын кивалтыны быгатэ 4-тӥ рангысь капитан, младшой офицер, старшой мичман.