Кылбуръёсыз удмуртэн но чузъясько

Нырысь ик дышетскыкум Ципья шоръёзо школаын со завуч вал, урокъёсы пыралляз. Собере со трос аръёс ӵоже ёросамы кивалтон ужын вал, социальной ужпумъёсъя главалэн кивоштӥсез, соин ӵош ик со кылбурчи но. 90-тӥ аръёсы ёросамы Удмурт культурая обществоез кылдытон азьын, Гарифзян Садыкович удмурт активистъёсты ялан люкалляз,,умоесь ӵектонъёс, валэктонъёс сётъялляз . Общество кылдэм бере но пӧртэм ужрадъёсты, соос пӧлын ик конференциосты ортчытъяны юрттылӥз. Удмуртъёслы ӟеч мылкыдзэ возьматэмысьтыз, мынам солэн кылбуръёсыныз тодматскеме потӥз. Озьы ог дасо кылбурзэ удмурт кылэ берыктӥ.

КӦНЯ КЕ КЫЛЗӤСЬКОМ...

Кӧня ке кылзӥськом

                                            шыпытак:

Чабейёс, йыдыос кырӟало, — 

Пасьтана лэйкаса бусытӥ,

Ӟеч ужысь тулкымен бертыло.

Кӧня ке кылзоме шыпытак:

Чингыль-чиль

                      сезьыос шильырто.

Кожалод кыдёкысь сюрестӥ

Сюанчи пар валъёс гонӟырто.

Кӧня ке шыпытак кылзоме

Ю-нянё бусылэсь кырӟамзэ.

Татысен ук выльме адями,

Юнмало сямъёсмы, сюлэммы.

ТӦДЬЫ КЫРӞАН

Юг-тӧдьы вань дунне,

Туж каньыл мылкыдмы —

Усьылэ, усьылэ тӧдь лымы.

Шып шудӥсь гӧп куазен

Урамын ми ӵошен —

Пыраклы вунонтэм

                                        та ӝытмы.

Чылк лымы пужнэмъя

Выль ар уй вуыку,

Йыромим, лэся, ми йыромим.

Тыр толэзь пиштэмъя,

Яратон ӟырдаку,

Верамы оскымон кылъёсмес.

Дун-чылкыт шудонъёс,

Та Выль ар ӝытазе

Улонмес герӟазы огазе.

Усьылэ тӧдь лымы...

Вунонтэм ӟеч ӝытмы —

Кызьпуос адӟисьёс милемлы.

ЛЫК АЛИ, ЛЫК АЛИ

Тырмизы верано кылъёсы,

Крезьгурен пачылмиз

                                            синъёсы,

Весь тодам шумпоттӥсь

                                          тусбуед, —

Лык али, лык али, лык али.

Бен али бер ӧвӧл, бер ӧвӧл,

Кырӟанмы чузъяське на

                                          вӧл-вӧл,

Даурмы ог гинэ — трос ӧвӧл, —

Лык али, лык али, лык али.

Люкамы мылкыдлэсь

                                             ӟечъёссэ,

Ӵук ӟардон вадеслэсь

                                           тӧдь туссэ,

Ӵош усьтэм кизили югытэз, —

Лык али, лык али, лык али.

Лулъёсмы адӟонлы

                                      сётскисьтэм,

Сюлмамы осконмы кысымтэ,

Сюрсъёсын усьтоно кизили, —

Лык али, лык али, лык али.

ВОРДСКЕМ ПАЛЪЁСЫ

Матын меда мыным кадь

                                      котькинлы

Вордскем палась

                        возь бамалъёсыд,

Бамалъёсысь

             кызьпу-нылъёсыдлэсь

Йырсиоссэ сынась тӧлъёсыд?

Кыӵе гинэ сюрестӥ мынӥсько —

Вутто монэ одно Балтаче.

Шумпотонэн сюлэмы

                                             пачылске

Аспалъёсын луи ке валче.

Мыным сямен котькинлы

                                           дуно шат

Вордскем паллэн

                 сӥзьыл но гужемез?

Анаелэн вешамезлы укша

Вордскем паллэн

                           пӧсь пумитамез.

Шурдур бадьёс пӧлын —

                                   мон уӵыпи,

Шурын ке уясько —

                                      мон юсьпи.

Та шаерысь шудме

                             шедьтэм понна,

Йыбырттӥсько тыныд,

                                                улонэ!

Василий Никитин