Кылъёсты тодон ноку уг люкеты

Асьме ёросысь калык котьку данъяськыны быгатӥз пӧртэм калыкъёслэн валче тупаса улэменызы. Туннэ нуналэ но ӵошен ортчытӥськомы калык праздникъёсты, вераськиськомы пӧртэм кылын.  Таяз учыре статьяе нылкышно сярысь, кудӥз ят улосысь лыктыса, тодмотэм адямиосын огъя кыл шедьтыны быгатыса, соослэсь вордскем кылзэс но дышетске, нылпиоссэ но солы дышетэ. Вераськон мынэ Киськем гуртысь Петрова Любовь Борисовна сярысь.

«Пичиысен анайлы фермае юрттыны ветлылӥ»

Асьмеос дышемын кадь ни, ёросысь калык тросэз тодэ бускелезлэсь кылзэ шуыса — удмуртъёс яке поръёс бигерез, бигеръёс — удмуртсэ. Уг ке но тодо, ӧжыт ке но валало. Любовь Борисовна вордскемезъя воксё асьме палась ӧвӧл, со Киров улосысь Малмыж ёросысь Кинерь гуртысь вылэм. Солэн верамезъя, Киров улосын но, Татарстанын кадь ик, пӧртэм калыкъёс куспазы тупаса но эшлыко уло.

— Мынам вордскем гуртэ чылкак пор шуыны кулэ. Но мукет калыкысь кӧня ке адямиос но вань. Со азьло но бадӟым гурт вал, али но, шумпотымон, пичи ӧвӧл — куинь урамез вань на. Егитъёс но отын вань, 8 классъем школа, нылпи сад, кык магазин, клуб вань туннэ нуналэ, озьыен, гурт уг быры, — гуртэз понна шумпотонзэ ватытэк вера Любовь Борисовна.

Кышномуртлэн анаез но, атаез но пор калыкысь адямиос луиллям.

— Анай ньылетӥ классэ йылпумъямез дырысен кызьы фермаын ужаны кутскем, озьы ик пенсие потытозяз отын тыршиз. Со кунянъёсты сюдӥз. Атай тракторен ужаз. Анай, ӵужанайлэн юрттэменыз, вить нылпиоссэ — ньыль нылъёссэ но одӥг пизэ — ачиз пыд йылаз султытӥз (атаен люкиськизы соос). Мон анайлэн нырысетӥ нылпиез вал, самой бадӟымез. Соин ужаны но мыным тросгес тупа вал, сузэръёсме но вынме утьыны. Яра али ӵужанаймы вань вал. Милемыз туж умой утиз, учкиз, яратӥз.

Люба апай Кинерьысь 8 аръем школаез йылпумъя. Сое быдтыса, егит ныл гуртысьтызы фермае ужаны интыяське. Та уж солы ят уг луы — пичи дырысеныз анаезлы фермае ужаны юрттыны ветлэм Любовь. Солэн верамезъя, уксёзы луымтэысь, Любалы дышетсконзэ азьланьтон сярысь малпаны но уг йӧты, яра али гуртазы бадӟым ферма луэ. Со фермаын Любовь Борисовна картлы кошкытозяз скал кыске.

— Ыж, парсь, скал фермаос вань вал гуртамы. Егит вал ке но, ужлы дышыны секыт ӧй вал, ӝытлы быдэ пичиысен анайлы фермае юрттыны ветлылӥ. Школаысь бертыса вуисько гинэ но фермае кошкисько вал. Анай ведь нылкышно интые но, пиосмурт интые но тыршиз… Озьы тӥни 1982-тӥ арозь гуртысь фермаын тырши.

«Огмес огмы огпол гинэ адӟыса, валче луимы»

1982-тӥ арын егит Любовь вуоно кузпалэныз, Петров Николаен, тодматске. Николайлэн дядяез Кинерьын улэ вылэм, отчы куное мыныса ик егит пи Любовез адӟем но синмаськем.

— Огмес огмы огпол гинэ адӟыса, валче луимы. Кузпалэлэн анаез, Гайша, Кушкетбашысь луэм, но секыт 30-тӥ аръёсы семьяеныз ӵош соос Кинере улыны выжиллям но татчы интыяськиллям. Со Гайша, Кинерьын улыны кутскемез бере, мынам ӵужанаен эшъяськем. Соин Коля кузпалэным тодматскеме паймымон ӧвӧл — семьяосмы тодмо вал.

Егитъёс, семья кылдытыса, Киськем гуртын улыны кутско. Бадӟым семьяын Любовез шуныт пумитало. Люба апай туннэ но умой кылъёсын тодаз вае анайзызэ но атайзызэ, кудъёсыныз соос тупаса кема аръёс ӵоже валче улӥллям.

— Коляен умой улӥмы. Жаляса вераны кулэ, кузпалэ 2016-тӥ арын кулӥз ини. Кема аръёс ӵоже со ДТ тракторен «Активист» колхозын ужаз, азьмынӥсьёс пӧлын луылэ вал. Тазалыкез лябӟемен сэрен берло колхозысь гаражын караулчи луыса тыршиз. Ачим но мон, картлы кошкем дырысен пенсие потытозям, 2016-тӥ арозь, Кӧргем гуртысь фермаын ужай. Зоре-а, лымыя-а, пӧсь-а, кезьыт-а — куазь шоры учкытэк кема аръёс ӵоже со гуртэ фермае ужаны ветлӥ. Отын но ферма бадӟым вал, трос адямилы со уж сётиз. Туж умой вал коллективмы но. Эшлыко, тупаса, ог-огмылы юрттыса валче ужамы, — маде Любовь Борисовна.

Удмурт кылэз но, бигер кылэз но фермаын дышетске

Чылкак пор нылашлы, удмурт гуртэ картлы быземез бере, нырысь туж секыт йӧтэ. Семьяяз вераськон ласянь шуг-секытъёс кылдымтэзы — кузпалэз пор кылэз умой тодэм (Николай агайлэн анаез бигер, атаез пор луэм), соин нырысь тросгес пор кылын вераськиллям. Нош тани фермаын, удмурт кылэз тодымтэез шӧдскымон шуг-секытъёсты кылдытэм.

— Зэмзэ верано ке, удмурт кылэз дышетскон туж капчиен ӧз сётскы, пор кыллы матын ке но со. Кӧргемын фермаын ужаны кутскеме бере, валай: мыным одно ик удмурт кылэз дышетсконо луоз. Ужын ваньзы гуртысь адямиос вал бере, соос удмурт кылын вераськизы, нош мон соосты уг валаськы. Дорам бертӥсько но кузпаллэсь юасько вал, тани та кыл мае валэктэ, соиз мае валэктэ шуыса. Нош со шорам учке но пайме вал: «Со кылэз но уд тодӥськы-а?». Тӥни озьы каллен дышетски, вераськыны но кутски. Фермаын ужасьёслэн юрттэменызы, кузпаллэн валэктэмъёсыныз дышетски удмурт кылэз. Али ярам удмурт кыл — кызьы луиз ке но, пор кыллы матын бере, дышетскыны луэ вал — бигерзэ но дышетски. Татарстанын улыны кутскеме бере, бигер калыкысь адямиосын но тросгес пумиськылыны тупаз ужын но, улонын но. Озьы тӥни туннэ нуналэ ньыль кылэз тодӥсько — ӟуч, пор, удмурт но бигер кылъёсты. Татчы удмуртсэ но, бигерзэ но тодытэк лыктӥ, табере бигеръёсты «сатам», — серекъя Любовь Борисовна. Собере ватса на, кулэ луиз ке, чуваш кылэз но дышетско шуыса. Кышномуртлэн малпамезъя, трос кылъёсты тодон адямилы уг люкеты, юрттэ гинэ. Куке бускеленыд, валче ужано адямиеныд, огшоры тодмоеныд солэн вордскем кылыныз вераськиськод, солы но шумпотымон, тыныд но умой. Люба апай но шумпотэ, удмурт кылэз дышетскиз шуыса.

«Нылпиосмы пор кылэз но, удмуртсэ но умой тодо»

Любовь Борисовна удмурт кыллы нылпиоссэ но дышетыны быгатэ.

— Куинь нылпиосмы вордскизы — одӥг пи но кык нылъёс. Но пимы 11 аресэн висьыса кулӥз… Сое ыштыны туж секыт вал. Кузпалэлы но со ыштон туж секытэн сётскиз, берлогес тазалыкезлэн лябӟемез но та муг бордын луэ, дыр, шуыса малпасько. Нылпиосты адӟиз ке: «Адямиослэн нылпиоссы урамын ветло, нош мынамез сюй пушкын кылле…» шуэ вал, сюлмыз вӧсь луыса. Но кылдэмез озьы луэм, дыр… Нылъёсы Анна но Анжела вань. Анна туннэ нуналэ аслаз семьяеныз Нижнекамскын улэ, солэн кык нылпиез вань ини. Анжела нылы дорам, соин кыкнамы ӵош улӥськомы. Со поварлы дышетскиз, аслэсьтыз семьязэ ӧз кылдыты али.

Нылъёсыз удмурт кылэз но, порзэ но, бигерзэ но, ӟучсэ но тодо вылэм. Али школаын англи кылэз но дышетскизы. Люба апай туж шумпотэ, со доры куное Нижнекамскысь внучкаосыз бертыло шуыса. Соос но, пе, гуртэ бертыса, удмурт нылпиосын шудо но удмурт кылэз дышетскемзы потэ шуыса верало.

Пенсиын ке но, тэк пуконэз уг тоды

Любовь Борисовна 2016-тӥ арысен пенсиын ке но ини, тэк пуконэз уг тоды. Али пудо но вордэ. Солэн верамезъя, скал — со гуртын семьялэн валтӥсь сюдӥсез. Пенсиын луыса, тазалыкез луиз ке, адями пудо но ӧз ворды ке, азьтэмъяськыны аналске, пе.

— Яра али пудо вань. Малы ке шуоно со сяна, мон табере мукет номаин но уг выриськы ини. Нылы керттӥське тани. Озьы ик кыкнамы улӥськомы, ог-огмылы юрттыса. Таза гинэ мед луомы, — шуэ Люба апай.

Кыкназы гинэ уло ке но, Петровъёслэн юрттӥсьёссы вань — бускельёсынызы, гуртоосынызы соос тупаса уло. Соин Люба апай талы пумтэм шумпотэ. Адямилы шудо но каньыл улон понна тазалыкез луиз ке, матысь адямиосыз луизы ке, ӵыжы-выжыосыз бертылыса улӥзы ке, бускельёсыз но гуртоосыз гажазы ке, мукет номыр но кулэ ӧвӧл ини.