Кысэм кизилилэн югытэз

Улонысь дырызлэсь вазь кошкем дано писательлы туэ 70 арес тырмысал ни. Удмурт литература понна дунъятэм мерас кельтэм писательлэн гожтэмъёсыз туннэ нуналэ но асьсэлэсь кулэлыксэ уг ышто. Соин та ужрад но туж пуштросо, шуныт мылкыдо луиз.

Нош кытысен ваньмыз инъет басьтэ? Балтась ёросмылэн Вуж Турья гуртысеныз. Татын кутске Н.М. Никифоровлэн улон но кылдытос сюресэз. Вож писпуосын, жильыртӥсь шурен но ужась калыкен данъяськем гуртын со котьку аслыз тунсыко сюжетъёс шедьтылӥз. Солэн произведениосаз туж яркыт адӟисько гуртлэн инкуазез но тусэз, прототипъёс но куддыр калык пӧлын ик шедё. 

Жаляса верано, гожъяськон дуннеын яркыт пиштӥсь кизили 17 ар талэсь азьло кысӥз ини, но солэн куке но асьме дорозь вуэм тылгизьыосыз али но пишто.

Таиз ужрад куинетӥез луиз ини. Азьвыл ик со куинь арлы одӥг пол ортчоз шуыса чакламын вал, но юбилей араз конференциез ортчытытэк кельтыны туж умойтэм луысал, дыр, шуыса малпазы кивалтӥсьёс. Та туж шонер малпан. Сӥё-дано аспалъёсмес будӥсь нылпиос мед тодозы шуыса, соослы сӥзьыса ӵемгес та выллем ужрадъёс ортчытыны кулэ. Конференцие люкаськизы ТР-ысь ёросъёсысь вордскем кылъя но литературая дышетӥсьёс, визьнодасьёс, дышетскисьёс, дышетонъя управлениысь методистъёс, со сяна, вуизы Агрызысь но Удмурт Элькунысь куноос. 
Ужрадэз мытӥзы самой покчи куноос — нылпи садэ ветлӥсь пиналъёс. Соос ужрадэ пыриськисьёс азьын сяме пыремъя удмурт фольклорысь люкетъёсты но ӟуч эктон быдэстӥзы. Удмурт дӥськутэн но камалиен чебермам нылъёс сокем мусо адӟиськизы ук! Шумпотымон, пичи дырысен ик та школаын калык эктонъёслы яратон но гажан мылкыд пыӵатӥське. Юнме самой пичиосын кутскемын ӧвӧл ужрад. Николай Михайлович котьку яратӥз нылпиосты. Соослы ик кылбуръёсты но сӥзьылӥз.
Ужрадэз азинтӥзы Балтась ёросысь дышетонъя управленилэн кивалтӥсез Ренат Мухарлямов, О.Н. Исаев нимо Ӟаны шоръёзо школалэн директорез Константин Грахов. Конференцилэн пленарной люкетаз школаысь директорлэн дышетон ужъёсъя воштӥсез — Олеся Яковлева — «Милям «удмурт Дюмамы» шуыса нимаськем докладзэ лыдӟиз. Олеся Васильевна Н.М. Никифоровлэн улонэныз но творчествоеныз тодматэм сяна, мукет писательёсын кусып воземъёссэ но шараяз. Макем яркыт но пуштросо кылдытъяз со котькуд гожтэмзэ, калыклы матын луэмен, солэн лыдӟисьёсыз но трос вал. Олеся Васильевна писательлэсь ужъёссэ печатлась изданиослы нимысьтыз бадӟым таукарон кылъёс вераз. Озьы ик со шумпотымон ивор но вераз. Удмурт Элькунысь Йӧскалык лыдӟиськонниен валче соос матысь дыре Н.М. Никифоровен гожтыса кельтэм кигожтосъёссэ (рукописьёссэ) цифровать карон уж борды кутскозы. 

Собере йӧскалык дышетон ужъёс сярысь ивортӥз кылосбур тодосъя кандидат, Удмуртиысь йӧскалык дышетонъя институтысь тодосъя ӧнерчи Ксенья Костина. Инновационной площадкаослэн пайдалыко ужамзы сярысь но вераз, соин валче ужпумъёсты быдэстонэз но валэктӥз. Ёросысь удмурт кылъя но литературая дышетӥсьёсмы но та уже итӥськизы ке, туж умой луысал. Озьы ик та площадка дышетскисьёс, самой пичи пиналъёс понна но туж пайдаё луэ.

Пленарной заседание бӧрсьы куноосты школалэн музееныз тодматӥзы. «Даур куара» шуыса нимаськем школа музейын (кивалтӥсез — Надежда Спиридонова) Н.М. Никифоровлы нимысьтыз инты но висъямын. Надежда Александровна туж тунсыко карыса тодматӥз лыктэм куноосты музейлэн историеныз но солэн пуштросэныз. Нимысьтыз вераз Н.М. Никифоровлы сӥзем стендъёс, люкам арбериос сярысь но.
Музеен тодматскемзы бере конференцие пыриськисьёс кык секцилы люкиськизы. Нырысетӥез секци «Вордскем кылэз но литератураез, кунгож кылэз дышетонын кутӥськись туала технологиос но электронной цифровой ресурсъёс» шуыса нимаськиз, нош кыкетӥез — «Н.М. Никифоровлэн удмурт литератураын творчествоез» но «Дошкольной дышетон организациосысь этнокультурной образование: бервыло практикаос» шуыса нимаськиз. Кыкез но секциос туж тунсыко, аспӧртэмлыко пӧрмизы. 

Докладъёс бере конференцие пыриськисьёсты мастер-класс возьмаз. Дошкольной образованиын визьнодась луыса ужась Людмила Якимова соослы пулэсь дэмдор лэсьтыны ӵектӥз. Удмурт крезьгур чузъяськемен, кабинетын уж эшшо но ӟырдыт пӧзиз. Дэмдор лэсьтон вакытэ соос ог-огенызы но вераськизы, мылкыдъёссэс веразы, огдыре сыӵе малпан но кылдӥз: оло соос кемаласен тодмо ини?

Лымшор но уйпал диалектъёслэн ваче куспазы вераськонзы но туж яркыт шӧдӥськиз. Сыӵе вачевераськонъёс туж тунсыко но аспӧртэмлыко кылӥсько. Ужзэс йылпумъямзы бере, соос одӥг котыре люкаськыса, дэмдорез ог-огзылы сётыса, сӥзёнъёс но веразы. Таиз аспӧртэмлыко йылол луиз.

Вань практической ужъёс бӧрсьы ужрадлэн самой «ческыт» дырыз вуиз — дипломъёсын но сертификатъёсын пусъён. Огшоры гинэ ӧвӧл, вормисьёсты пусъён церемони туж чебер усьтӥськиз нырысетӥ инты басьтэм нылпиослэн кылбур лыдӟеменызы. Макем соос удмурт кылын мусо лыдӟо кылбуръёсты, огшоры гинэ ӧвӧл, вань сюлэмзэс сётыса. Соин но, дыр, ваньзылы сокем тунсыко потӥз ужрадлэн та люкетэз. 

Тӥледыз но тодматӥськом тужгес усто Н.М. Никифоровлэсь кылбуръёссэ лыдӟем но видеороликъёсты лэсьтэм пиналъёсын.

«Инсценировкаен художественной лыдӟон» секциын:
1 инты — Исаева Ангелина — Ципья шоръёзо школа; 
1 инты — Филиппова Эльза — Ципья шоръёзо школа;
1 инты — Григорьева Мария — Ципья шоръёзо школа;
1 инты — Шамаева Анастасия — Баграш-Бигра шоръёзо школа, Удмурт Элькун;
1 инты — Никифорова Елизавета (Н.М. Никифоровлэн внучкаез — Ю.Щ.) — Ӟаны шоръёзо школа;
1 инты — Прокопьева Татьяна — Ӟаны шоръёзо школа;
1 инты — Григорьева Валерия — Ӟаны шоръёзо школа;
2 инты — Чуракова Аделина — 74 номеро школа, Удмурт Элькун;
2 инты — Широбокова Алиса — Быги шоръёзо школа, Удмурт Элькун;
2 инты — Широбоков Степан — Быги шоръёзо школа, Удмурт Элькун;
2 инты — Широбоков Егор — Быги шоръёзо школа, Удмурт Элькун;
2 инты — Исаев Эмиль — Ципья шоръёзо школа;
2 инты — Асхатдинова Ралина — Ярак-Чурма покчиёзо школа-нылпи сад;
2 инты — Тимофеева Дарья — Сарсак-Омга лицей, Агрыз ёрос;
2 инты — Николаева Диана — Ӟаны шоръёзо школа;
2 инты — Ширинова Севиль — Ӟаны шоръёзо школа;
2 инты — Михайлов Максим — Ӟаны шоръёзо школа;
2 инты — Исаева Аделина — Ӟаны шоръёзо школа;
3 инты — Кузьмина Таисия — Иштуган шоръёзо школа, Саба ёрос;
3 инты — Павлов Степан, Николаева Карина — М.П. Прокопьев нимо Нырья шоръёзо школа, Кукмор ёрос;
3 инты — Крючкова Мария — Иваново-Самарской валтӥсь школа, Удмурт Элькун;
3 инты — Яковлева Софья — Ӟаны шоръёзо школа;
3 инты — Петров Константин — Ӟаны шоръёзо школа;
3 инты — Закирова Софья — Ӟаны шоръёзо школа;
3 инты — Трофимова Лия — Ӟаны шоръёзо школа;
3 инты — Смердов Артём — Ӟаны шоръёзо школа;
3 инты — Павлов Родион — Ӟаны шоръёзо школа.

«Н.М. Никифоровлэн произведениосызъя гожтэм видеороликъёс», 5-11 классын дышетскисьёс понна:
1 инты — Афанасьев Матвей, Павлова Элина — Средний Куморысь шоръёзо школа, Кукмор ёрос;
2 инты — Ермалаева Милана — Лельвиж шоръёзо школа, Кукмор ёрос;
3 инты — Григорьева Кристина — Ципья шоръёзо школа.
Мукет пыриськисьёс нимысьтыз сертификатъёсын пусйиськизы. Шумпотымон, кылбуръёс трос вуэмын, адӟиське нылпиослэн сюлмысь тыршемзы но дасяськемзы. Жаляса гинэ вераны луэ видео лэсьтон уж сярысь. Та секцие вить ужъёс гинэ ыстэмын вал. Оскиськом, вуоно конференцие талэн лыдыз йылоз шуыса. 
Озьы ик жюриен эскерем но дунъям докладъёсын вормисе потэмъёсты но нимысьтыз дипломъёсын пусйизы. Соос но научно-исследовательской ужъёсазы туж асдыръем луись ужпумъёсты ӝутӥзы, пыр-поч эскерыса, бервыло йылпумъянъёсы вуизы. Азьланяз но дышетӥсьёс ог-огзылэсь дышетон амалъёссэс асэстыса мед ужалозы вал. 

Тани соос, кин кузь сюрессэ матын карыса аслаз уженыз тодматыны лыктӥз, но интыысь ужасьёслэн бервыло ужамзылэн йылпумъянъёссы.

«Удмурт литератураын Н.М. Никифоровлэн творчествоез» секциын вормисьёс:
1 инты — Антонова Елена, Ефремова Алина (кивалтӥсьёссы — Антонова Н.Л., Пчельникова О.М.) — Покчи Лӧзя шоръёзо школа;
2 инты — Корнилова Милана (кивалтӥсез — Петрова Р.Н.) — Ӟаны шоръёзо школа;
3 инты — Михайлова Ксения (кивалтӥсез — Андреева Л.М.) — Лельвиж шоръёзо школа, Кукмор ёрос. 
Татын пусйыны кулэ, Людмила Михайловна (бызьытозяз — Хомякова), аслэсьтыз дышетскон сюрессэ Ӟаны шоръёзо школаын ик ортчытӥз. Аслаз верамезъя, со шумпотыса лыктӥз аслаз школаяз, кытын солэн самой шудо пинал дыръёсыз ортчизы.

«Дошкольной дышетон организациосысь этнокультурной образование: бервыло практикаос» секциын вормисьёс:
1 инты — Михайлова Надежда — Удмурт Элькун, Пичи Пурга ёрос, Гожня гурт;
2 инты — Якимова Людмила — Ӟаны шоръёзо школа;
3 инты — Васильева Лидия, Фёдорова Ирина, Байматова Нина — Агрыз ёрос, Сарсак-Омгаысь лицей.
Сертификатъёсын пусйиськизы Шкляева Светлана (Удмурт Элькунысь Ува нылпи садысь визьнодась) но Малафеева Любовь (Селты нылпи садысь визьнодась).

«Вордскем кылэз но литератураез, кунгож кылэз дышетонын кутӥськись туала технологиос но электронной цифровой ресурсъёс» секциын вормисьёс:
1 инты — Ефремова Ирина, Павлова Роза — Кукмор ёрос, М.П. Прокопьев нимо Нырья шоръёзо школа;
2 инты — Евдокимова Галина — Ӟаны шоръёзо школа;
2 инты — Григорьева Анна — Ципья шоръёзо школалэн Сырья покчиёзо школа-нылпи садэз;
3 инты — Жукова Алеся — Шишинер валтӥсь школа.

Мукет пыриськисьёс сертификатъёсын пусйиськизы.

Ужрадэ вуылӥз писательлэн Екатерина кузпалэз но. Писательмылэсь улонзэ сайкыт но тынӥсь карыса улэм нылкышнолы школалэн коллективез чебер сяська керттэт но кузьмаз. Со но аслэсьтыз мылкыдъёссэ ӧз ваты, шумпотыса таукаронзэ вераз, нылпиослы но трос пайдаёзэ валэктыны тыршиз.

Ужрадэз яркыт буёлэн йылпумъязы школаысь «Инвожо» ансамбле ветлӥсь ёзчиос. Покчи но бадӟымгес пиналъёс эктонъёсты быдэстӥзы, кырӟазы, туж чебересь дӥськутъёсын конференцилы югыт тусъёс пыртӥзы. Жингрес чузъяськись гуръёсын тырмем залын мӧзмыса пукись ӧз луы.

Н.М. Никифоров пыраклы кошкемын... Кин тодэ, кызьы со адӟысал туала улонэз, мар гожтысал туннэ со пиналъёслы, кыӵе валтӥсь ужпумъёс пуктысал удмурт кылэз но лулчеберетэз утёнъя. Ӧйтод, малпанъёс туж паськытэсь: вордӥсько, бергало но кысо. Ми ноку ум вунэтэ Тӥлесьтыд визьмо кылъёстэс, Николай Михайлович. Гажаса но утьыса возёмы тӥлесьтыд книгаостэс но киын гожтыса кельтэм чуръёстэс. 
Ортчозы аръёс, весяклы вунозы туала шуг-секытъёс, нош Никифоровлэн кыл тылъёсыз котьку мед пиштозы пиналъёс пыр. Озьы ик удмурт лулчеберетэз, кылэз но литератураез азинтонын бадӟым ужъёс мед лэсьтӥськозы.

— Шумпотыса туннэ пумитаськомы палэнысь лыктэм куноосты. Эшшо ке школаын, кудаз дышетскиз но, кудӥз Россилэн Героезлэсь — Олег Николаевич Исаевлэсь — нимзэ нуллэ. Та школалэн туж трос сям-йылолъёсыз. Тани туннэ тӥ азьын самой пичи нылпиос эктӥзы — нылпи садэ ветлӥсь пиналъёс. Нош школаын дышетскись пиналъёсты усточиос пӧлы пыртыны луэ ини. Учырен пайдаяськыса, тау кылъёс вераме потэ Виктор Павлович Камаевлы, кудӥз трос аръёс ӵоже «Инвожо» ансамблен кивалтэ. Туэ соослэн бадӟым вормонзы но вань. Соос 400 сюрс манетлы сертификатэн пусйиськизы. Озьы ик школалэн директорезлы — Константин Викторович Граховлы — бадӟым тау шуисько. Соос сокем бадӟым уж нуо калык сям-йылолъёсты но удмурт лулчеберетэз утёнын.

Оскисько, нылпи садэ ветлӥсьёс но азьланяз «Инвожо» коллективлэн ёзчиосыз луозы шуыса. Куинетӥзэ туннэ ортче Н.М. Никифоровлы сӥзем научно-практической конференция. Школалэн аслаз мылкыд каремезъя радъям ужрад пайдаё мед луоз, писательлэн нимыз котьку мед данъяськоз но нылпиосты калык узырлыкез утьыны мед дышетоз!, -вераз ёросысь дышетонъя управленилэн кивалтӥсез Ренат Мухарлямов.

— «Никифоровской лыдӟонъёс» III улосвылкуспо конференциын тодослыко докладъёсынызы пумиськизы Удмурт Элькунысь но Татарстан Элькунысь дышетӥсьёс, визьнодасьёс но нылпиос. Дэмлам ужъёссы мур пуштросоесь, анай кылъёсты дышетонъя пӧртэм амалъёслы сӥземын вал.
Конференцие пыриськись докладчикъёслэсь тодослыко ужъёссэс, статьяоссэс, разработкаоссэс Удмурт Элькунысь Дышетон удысысь йӧскалык ужпумъёсты эскеронъя тодос институтысь экспертъёс учкизы, котькудӥз авторлы сётӥзы ужзэс тупатъянъёсъя, ӟечлыксэс будэтонъя дэмланъёс. Со дэмланъёсты лыдэ басьтыса но куронъёсъя тупатыса, конференцие пыриськисьёс быгатозы материалъёссэс бичетъёсы пыртыны, удмурт кылэз но литератураез дышетонъя информационно-образовательной порталэ пуктыны.
Осконмес вераськомы, таиз ужрад институтэн валче радъямъёсыз пӧлысь берпуметӥез уз луы шуыса. Азьланяз Балтась ёросысь удмурт кылэз дышетӥсь школаослэсь возьмаськомы институтлэн инновационной ужаз пыриськемзэс, – ивортӥз кылосбур тодосъя кандидат, Удмуртиысь йӧскалык дышетонъя институтысь тодосъя ӧнерчи Ксенья Костина.