«Лемлет малпанэз быдэстыны – одӥг арня»

Эльбрус — Россиысь но Европаысь одӥгез самой ӝужытэз гурезь. Телевизорын но туспуктэмъёсын та гурезь туж чебер адске ке но, соин матынгес тодматскыса, валаськод: со ас пӧлаз трос гинэ сюрпризъёсты ватэ. Нош малы адямиос, пӧртэм шудтэм учыр луэмъёсты кылыса но, ялан та гурезез киултыны тыршо?

Родион (кинлы ке Радик) — ёросмы понна воксё тодмотэм адями ӧвӧл, со вордӥськиз но быдэ вуиз Улын Ушма гуртын. Учконо ке, огшоры гуртысь пияш. 

2022 арын со удмурт лулчеберетлэн «Батыр» элькун вожвылъяськоназ но пыриськиз. Татын со, ассэ усто возьматыса, «Калыкен быръем батыр» ним басьтӥз. Озьы ик со аслаз кырӟанъёсыныз но тодмо луэ. Вотэсъёсысь сое RODI SMILE кушемнимын шедьтыны быгатоды.

Гитараен но шудэ, спортэн но тунсыкъяське. Котькытчы вутскись егит пи ас лыдметаз (списоказ) табере нош ик одӥг пусъет пуктыны быгатэ ини — со 5642 метръем гурезез киултыны быгатӥз.

Котькуд удысын ассэ возьматыны дӥсьтӥсь егит воргорон секытъёслэсь уг кышка. Соин но, дыр, солэн кемалась гыбдась малпанэз улонэ выжыны но быгатӥз. Та вамыш адямилэсь азяз пуктэм ужпумъёсты быдэстыны быгатэмзэ но уж шоры кылкутыса учкемзэ возьматэ. 

— Родион, вера вал, кызьы тынад сыӵе малпанэд вордӥськиз?

— Сыӵе малпан кемаласен вал ини. Малы ке шуоно гурезьёс — со котьку чеберлык, аспӧртэмлык, со — синмаськымон инты. Кыӵе ке пуш катьтэммемен, ӟучъёс верамъя, выгораниен сэрен отчы кошкыны малпай. Одӥгаз тодмо мерлыко вотэсысь сторисъёсысь кинлэсь ке адӟи но, малпай: «О, мынам но потэ. Мон но отчы одно ик мыно». Одӥг арня куспын ваньзэ радъяса вуттӥ. Лемлет малпан кемалась улӥз, нош сое быдэстон понна одӥг арня гинэ кулэ вылэм. 21 куарусёнэ мон Минеральные Водые кошки, отысен Пятигорске, собере милемыз Терсколэ нуизы. Терскол — со Эльбруслы матын луись гурт. Нырысетӥ нуналаз отысен акклиматизационной выходъёсы поталлямы. Со нырысетӥ нуналаз «пичи гурезь» гинэ вал, 3100 метр, обсерватория, кыкетӥез озьы ик климатлы дышон нунал вал. Таиз ини Чегет гурезь вал, со 3200 метр ӝуждалаын интыяськиз. Куинетӥ нуналаз милемыз Эльбруслэн 3850 метр ӝуждалаяз интыяськем штурмовой лагере куштӥзы ини. Со нуналэ ик ми 4100 метр ӝуждалае тубӥмы. Отын кӧня ке дышетским йӧ коран тӥрен ужаны, пӧртэм мукет кулэ луись занятиос ортчытӥськизы. Вуоно нуналаз ми «скала Пастухова» шуыса нимаськем интые тубӥмы, со 4800 метрен тодмостӥське. Та ваньмыз юри лэсьтӥське, ӝуждалаез нуналысен нуналэ будэтыса, тынад мугоред дыше. Тӥни озьы мон каллен ӝуждалалы но гурезьлы дыши шуыны луэ. Витетӥ нуналаз ми шутэтскыны кулэ вал, малы ке шуоно гурезе тубон азьын кужым но люкано, малпанъёсты но радэ пыртоно, огазеяно, огъя вераса вань ӧръёсъя дасяськоно. Тубонъёс отын туж меӵ, горнолыжной трассаосын кадь. Отын ведь вань пӧртэм трассаос, самой дӥсьтӥсьёсыз но быгатӥсьёсыз гордаз тубо, татын но сыӵеесь ик вал. Тубиськод но паймиськод, кыӵе та гурезь меӵ! Йырад соку ик юан кылдэ: кызьы татчы тубоно? Озьыен, витетӥ нуналаз шутэтскон интые, прогнозъя куазь тупась луэмен, гид милемлы тубыны ӵектӥз. Нош ми шутэтскемын но ӧй вал, климатлы но пумозяз дышымтэ. Озьы ке но, тубыны дӥсьтӥм. Ма, ми ум валаське вал ук али, мар милемыз вите. Ратракен милемыз 5100 метръем ӝуждалае ӝутӥзы, отысен кутским ини ӝутсконмес. Со вал 2 часэн уйин. Самой вылӥ точкае ӝутскыны милемлы чакламъя 4-5 час кулэ вал. Группаын ми куинь кузя: мон, Белоруссиысь пияш но гид. Ӝыны час ортчыса, мон валай, мыным начар луэ шуыса, нош Рома (Белоруссиысь пи — ред.) воксё катьтэммиз. Гидмы интыын ик решение кутоно луиз. «Родион, мон тонэ мукет группае юнматӥсько, соосын тубод, нош ми Ромаен берытскиськом», — шуиз со. Но, Рома кытысь ке кужымзэ поттӥз но ми сюресмес азьланьтӥм. Ӝынызэ ортчим. Эльбруслэн кык йылэз ук: одӥгез — ӝужытгес, мукетыз — лапеггес. Со куспын тӥни седловина интыяське. Отын ми 20 минут пала шутэтским. Татын ини мынам «гурезь висён» но кутскиз, со куке тынад вань кужымед быре, тыныд туж начар луэ, ӧскиськод. Кӧня ке шутэтскыса, сюресмес азьланьтӥмы. Отын кужымед но ӧвӧл ни, тон аслад юн сяменыд, лул кужыменыд тубиськод, эшшо ке меӵ бамалтӥ. «Ёлочка» амалэн тубиськод: я одӥг пала, я мукет пала. Собере «Плато Зомби» шуэм интые вуим, со 600 метре кыстӥське. Зомби кадь 20 метр мынӥськод — усиськод, нош султӥськод — мынӥськод. (Соин, дыр, нимез но интыезлы тупась — Ю.Щ.) Отын меӵ гурезьёс ӧвӧл ни, нялмыт гурезь гинэ. Отын нокыӵе кужым уг кыльы, но мон азям ужпум пуктӥ — ньыль пыдын ке но, мон азьланьто, пумозяз вуо. Отысен гурезьлэн пумыз но адӟиське вал ини, соин стимул эшшо но йылӥз. Нош гурезьлэн вылӥяз тон номыр сярысь уд малпаськиськы ни, ваньзэ вунэтӥськод. Вань чеберез адӟиськод но уд валаськы, кызьы тон быгатӥд! Номыр йырад уг лыкты, со сыӵе паймымон вакыт, куке тон валаськод, тон вань секытъёсты, вань вӧсь луонъёсты ортчид шуыса. Тубыкуд тон асэныд нюръяськиськод. Йырад малпан но лыктэ: «Малы та ваньмыз тыныд кулэ, дорад гинэ пук вал». Но тон азяд ужпум пуктӥд но, сое быдэстӥськод. Гурезь йылын ми 15 минут пала гинэ луим, дыр: туспуктэмъёс лэсьтӥм, видеоос снимать карим но берлань васькыны кутским. Гурезьтӥ васькыны капчи шуо, татын воксё мукет ласянь. Малы ке шуоно васькыкуд, кужымед тонэ воксё кельтэ. Эшшо ик тыныд туж сак луоно: меӵ бамалъёс котыр. Васькыны капчигес ке но, милемлы со понна куинь час пала кулэ луиз. 5100 метр васькем бере, ми сьӧры нош ик ратрак вуиз. Отын ини монэ вань кужымъёс куштӥзы, кать быриз. Базовой лагере кызьы вуэммес но уг тодӥськы ни. Нош монэн ӵош тубем пияш — Рома — васькыкуз, кужымез быремен, котькуд 5 метрлы быдэ усьылӥз. Отын зэмзэ но туж сак луоно, шудтэм учыръёс туж трос. Сыӵе статистика но вань: 90% кулонъёс гурезьысь васькыку луэмын. 

— Отчы мыныны мылкыд карисьёслы кӧня коньдон дасяны кулэ?

— Огъя ваньмыз 100 сюрс пала коньдон кулэ луоз. Но котьку запас луыны кулэ.

— Мар тон ӵектысал соослы, кинлэн озьы ик ассэ та гурезен эскеремез потэ?

— Та уж борды огшоры бась-тӥськоно ӧвӧл. Азьвыл ик астэ дасяно: бызьылыны кутсконо, шоканэз радъяно, пыдъёс но туж юн луыны кулэ. Озьы ик пуш дунне ласянь но дась луоно. Малы ке шуоно мылкыдъя со кык пол куасэн марафон бызьылэм кадь потӥськод. 

Зэмзэ но, Родион данъяськыны быгатэ аслаз вутскеменыз. Паймыны луэ сыӵе егитъёслы, кудъёсыз дырзэс юнме уг ортчыто, асьсэлэсь, кужымзэс эскеро. Тани Родион но аслыз, котырысь адямиосызлы вераны быгатэ: «Мон Эльбрусын но вал», шуыса. Ушъяськон понна ӧвӧл со, будӥсь пиналъёс, тае адӟыса, адямилэсь самой ӟеч сямъёссэ гинэ мед басьтозы. Мед соос адӟозы: тазалыклы изъян лэсьтӥсь арбериос огвакытлы гинэ, нош тазалык но спорт — весяклы!

Азинсконъёс тыныд, Родион! Семьяяд, ужад но огшоры улонад но ваньмыз умой медло, нош котькуд вырйылэз дано вормыны мед быгатод! Тынад со ваньмыз азьланяз, оскиськом — тынад ваньмыз пӧрмоз! 

P.S. Тӥляд но ваньзэ пыр-поч адӟемды потэ ке, одно ик Родионлэн мерлыко сетьёсаз пырыса учке, оло, солэн мылкыдэныз тӥляд но кыӵе ке гурезьлэн вырйылаз тубэмды потоз!

Туспуктэмъёс: личной архив