Лидия Губановаез буре вайыса (1 люкетэз)

Ас даурам мыным уно гинэ удмурт сюанъёсы пыриськылыны но адӟылыны тупаз. Азьвылгес сюанъёс мукет сяменгес ортчыло вал. Али дыре сюан карон сямъёс ӧжытак воштӥськизы ке но, вашкала сюанъёслэн уно йылолъёссы но сямъёссы туннэ но (кылем даурлэн 90-тӥ аръёсыз шуыса валаны кулэ — ред.) туж умой утисько. Зэм, котькуд гуртысь сюан мукет гуртъёсынызлэсь маин ке но висъяське. Отын кырӟанъёс но мукетгес луо, йылолъёс но пӧртэмгес. Озьы ке но, удмурт сюанлэн уно гинэ сямъёсыз но йылолъёсыз кызьы ке асьме районын, озьы ик Мари палъёсын ог-огзылы матын луо. Мон татын тодматыны турттӥсько Кургем палъёсын ортчылӥсь сюанъёсын чузъяськись кырӟанъёсын.

Сюанэ кошкыны люкаськем бере эмеспи дорын арган куараез но кырӟан гурез кельшытыса утӥськомы. 

ЭМЕСПИ ДОРЫН КЫЛ КЕЛЬШЫТОН

Шуды мызгандэ, шуды мызгандэ,
Тон гинэ мотор шудӥськод. 
Мынэсьтым ӝуась кӧтъёсме,
Тон гинэ каньыл кариськод.

Ойдо кырӟалом али ачимес 
Кельышоз, пе, медам кылъёсмы. 
Малы, пе, уз кельшы та ик кылъёсмы.
Валче быдэсмем мугормы. 

Жингыр но жангыр ми ик кошкомы.
Сюан валъёсмес кыткыса. 
Жингыр но жангыр ми ик бертомы
Туганлы ужась вайыса.

ВЫЛЬ КУДО ДОРЫН СИЕМ-ЮЭМ БЕРЕ

Ми татчы лыктӥмы вал ик улляса.
Юскимы капка выжыяд.
Ми лыктон дыръя тӥ витиллямды. 
Лыз дыдык сямен гурласа.

Черыгад понэм ческыт аракдэс. 
Кемалась юэммы потэ вал. 
Тӥлесьтыд та сямен шулдыр каремдэс,
Кемалась адӟеммы потэ вал.

Улмопу бакча, чильтэро капка, 
Кин но уз сиы улмозэ. 
Асьтэос каньыл, коркады шулдыр, 
Кин но уз пыры тӥ доры.

Кырӟаськом, кырӟаськом ми ик шуиськом.
Торогой сьӧры кин вуоз. 
Сектаськом, сектаськом ми ик шуиськом,
Тӥ туган сьӧры кин вуоз. 

Ӝытазе ӝужам сизьым кизили, 
Куазь сактон дыръя таркаськоз. 
Милям анайлэн нылыз но пиез. 
Мугораз вуыса таркаськоз.

Тӧдьы йыр сяськаез бичатэк кыли,
Али уз тӧлӟы шуыса. 
Верано кылме вератэк кыли, 
Али ум люкиське шуыса.

Ӟегез кизиськом узьымлы, 
Сезьыез кизиськом араны. 
Нылэз вордӥськом ятъёслы, 
Пиез вордӥськом кузёлы.

Ваёбыж пизэ кытын но поттэ, 
Куала пырыса, ӵын пушкын. 
Милемыз анай кытын но вордэ, 
Кӧкые поныса, сюрыын.

Гырлы вал мынам куарае, 
Сяська вал мынам дауры, 
Гырлы куараме тӧл басьтӥз, 
Сяська даурме ят басьтӥз.

Вае но вае кубо но чукдэс, 
Милемлы кулэ кубо чук. 
Та быдӟа юртэ пырем но бере, 
Ӧвӧл-а коньдон уксёды?

Ньыль пыдо ӝӧкед мар вите, 
Со вите тӧдьы ӝӧккышет. 
Милям кубомы мар вите, 
Со вите ог шырет басмадэ.

Шарт карыны лыктэм, шарт каром,
Йыг карын лыктэм, йыг каром. 
Кургем но пиос шарт карон дыръя,
Чидалоз медам сайкагды (выжъёсты).

Аман кырӟаса мар ик бен пайда,
Ойдо юмшаса утёме. 
Ӧжыт юмшаса утем но бере, 
Шулдыр-а луоз сюанъёс?

АПАЙЁСЛЭСЬ НО ПИОСЛЭСЬ ЭКТОНЪЁССЭС ЭКТЫСА ЮМШАЛО

Ойдо кабанэз сюроме, 
Итымез шулдыр кароме. 
Ойдо кырӟаса утёме, 
Сюанэз шулдыр кароме.

Кырӟалом али, кырӟалом 
Ваньнамы огазьын дыръямы. 
Таркаськом али, таркаськом али
Турлымы турлы интые.

Итым сьӧр сюрес, пудэн но сюрес,
Отӥ ветлэме туж потэ.
Гажаськод медам, уд медам,
Сое тодэме туж потэ.

Пушнер выжыяд ӝуй уз поты, 
Пушнерез нюлэс уз шуэ. 
Аслад туганэд аслыд мусо, 
Со муртлы мусо уз поты. 

Сӥзьыл ӵужектэм писпу куаредлэн,
Усемез потытэк усе, дыр. 
Куарлэн усемез уз поты, 
Милям люкиськем нош уз поты.

Векчи но векчи куазед но зоре,
Со но бен коттэ музъемез. 
Векчи но векчи аракед вия, 
Со но бен кудӟытэ милемыз.

Кубызэз шудом, каллен но шудом,
Ум чиге кайтан езъёссэ. 
Аракез юом, каллен но юом, 
Ум ыштэ кайран визьёсмес.

Сурез пӧзьтӥськом ӵужъемен, 
Туксэ понӥськом мерттаса. 
Оломар пормы визьмо луысалмы,
Инмар визь сётэм мертаса.

Ӝӧк вылад шормам няньёсыд,
Вазьлэсь но ӧвӧл, чабейлэсь,
Милям та сямен сием но юэм, 
Адямилэсь ӧвöл, инмарлэсь.