Лулчеберетын но, колхозын но усточи

Пичи дырысен ик Геня агай аслаз пальпотӥсь ымныреныз, капчи мылкыдэныз висъяське вал. Школаын дышетон дыръя ӵукналы быдэ ӟечъяськон — милям сяме пырем йылоллы пӧрмем вал ини. Соин Геня агай но солэн улон сюресэз сярысь вераськон — нимысьтыз пумиськон муг луиз. 

1933 ар. Егит кузпалъёслэн — Иван но Мария Капраловъёслэн — семьяязы нырысетӥ пиналзы вордӥськиз. Жаляса верано, пизылэн улонзы куспетӥ луэ. Бен, котькуд анай-атай понна нылпи ыштон — со бадӟым кайгу. Озьы ке но, кузпалъёс оско ог-огзылы но азьлань вамышъёс лэсьто, ӵошен корка но пукто, юртъер котырысь ужъёсты нуо.

1935 ар, сӥзьыл. Капраловъёслэн кыкетӥ пизы вордӥське. Солы Геннадий ним сёто. Тазьы кутске выль улон, выль адямилэн историез но тунсыко пумиськонъёсыз. Та сюрес вылын пӧртэм адямиосын ужаны но кусып возьыны кылдэ, но Геннадий Иванович ноку улон кужымзэ уг ышты, уг ӝожтӥськы. Оло, та сямыз ик сое туннэ бадӟым дано лыдпусаз вуттӥз.

Котьку сямен Геня агай пальпотыса пумитаз.

— Ма сярысь вераны но уг тодӥськы ук, огшоры гуртысь пересь ини. Туннэ нуналлы мон выллем аресъемъёс ӧвӧл кадь ини гуртамы но. Азьло пересьёс трос вал али, сьӧраз-сьӧраз кошкизы, — веранзэ кутскиз Геня агай. 

Зэмзэ но, Вуж Кушкет гуртмы котьку пересьёсыныз данъяське вал. Соос гуртлэсь историзэ, адямиоссэс, гуртлэсь азинскемзэ туж умой тодӥзы. Туннэ нуналлы соос чиньыен лыдъямон гинэ кылизы ини. 

— Мынам анае бускель Пор-Кутеш гуртысь Мария нимо вал, нош атае — Иван Сергеевич — Вуж Кушкетын вордӥськыса быдэ вуэ. Анай быдэс улонзэ секыт ужъёсын ужаз, вазь ик югыт дуннеен люкиськиз. Нюлэс кораса ветлӥз, соин тазалыкез но чаль уродмиз, луоз. Нош атай дышетӥсь вал, маин дышетэмзэ вераны уг быгатӥськы. Ма, со дыре али кадь дышетон система ӧй вал ук. Дышетӥсь котьмалы дышетэ вал. Данъяськымон вал соку дышетӥсьлэн ужез. Анай-атай сяна эшшо песяймы вал на. Пӧртэм пудо-живот вордыса улӥмы. 1942-тӥ арын атаез войнае басьтӥзы. Жаляса верано, больше сое адӟон ӧз йӧты ни, одӥг гинэ гожтэтсэ басьтыса кылим. Соин атаен герӟаськем тодэ ваёнъёсмы куспетӥ луизы.

Та бадӟым ыштон нылпилэн сюлэмаз мур яра кельтэм. Пи муртлы атай — со валтӥсь адями, кудӥз дышетэ зэмос воргорон луыны. 

— Секыт вал ке но, мон 10 классэз йылпумъяны быгатӥ. Июнь толэзь вал со. Нош сентябре монэ армие басьтӥзы ини. Совето Армилэн радъёсаз куинь арлы матын служить кари. 1954-1957 аръёсы Украинаын, зениткаын вал. Шонерен вераса «лётчикъёслэн врагзы вал мон» (серекъяса). Зенитка — со самолётъёсты быдтэ, али соос ӧвӧл ини. Туннэ ракетаос ини соос интые, кнопкаен гинэ ужало.

Азьланьтонэз газетлэн 42-тӥ номераз