Лякыт, визьмо, ӟеч сямо дышетӥсьмы

Ымныраз пальпотонэн пумитаз милемыз дышетӥсьмы Елена Васильевна Чакмина. Лякыт, визьмо, ӟеч сямо дышетӥсьмы улон сюрес усьтӥз милемлы. Елена Васильевна кема-кема улыны мед быгатысал, ми сое туж гажаськом но яратӥськом.

Чакмина Елена Васильевна вордскем 1942-тӥ арын 21-тӥ декабре Бигер Элькунысь (Татарстанысь) Тылогуртын. Атаез, Карабаев Василий Фёдорович 1891-1967, со нырысетӥ дунневыл жугиськонэ пыриськемын. Корка нимзэс «Насьта Педор» шуиллям. Нырысетӥ кышноез Сырья гуртысь Пчельникова Ольга луэм. Со туж вазь кулэм, соослэн ньыль нылпиоссы кылиллям. Нылъёссы Мария но Елена, пиоссы Григорий (1917-1941) но Иван (1926-1945). Кык пиоссы но Быдӟым оже быриллям. Григорий финской войнае шедем, Иван кулэмын Калининградской областьын. Елена нылзы пневмониялэсь кулэмын.

Вашкала корка выжызы Комсомольской (Тыло) урамын луэм, со инты шорын канцелярия но вал, али отын Абрамов Юрийлэн коркаез. Атайзы выль корка пуктэм уллапал ураме. Корка интызы Наздеков Геннадий (Деппал Геня) вӧзын.

«Туж шулдыр инты вал отын, кык кызьпуос вӧзын улыно-вылыно корка вал (берло анай сьӧры лыктэм пиез, Вишняков, выль корка пуктэ, али отын нокин но уг улы ини), — тодаз вае Елена Васильевна. — Атай кышно пыртэ мынэсьтым анайме. Анае Лельвиж гуртысь, со но дышетӥсь вал. Ӵужанае Григорий Медведевлэн дорвыжыысьтыз луэ. Мон атайлэн но анайлэн 9-тӥ нылпиез луисько».

— Дышетӥсьлэсь сюрессэ бырйыны анайды мылкыд сётӥз-а? – юасько.

— Соку 10 класс гинэ вал, школаез йылпумъям берам дышетскыны пырыны ӧдъясько вал мукет училищее. Капка выжыын сылыкум, Яппаров, школалэн директорез, ортчыса кошкыкуз, мынэсьтым  юаз: «Тон дышетскыны ӧд пыры-а, мар-а?» «Ӵуказе ик мын РОНО-е, Сизьныр гуртэ дышетыны мынод», — шуиз со. Озьыен, 1960 арысен ужаны кутски. Сизьнырын, Тагашурын, Вукогуртын дышетӥ. Собере педучилище но пединститут йылпумъяй», - ужаны кутскем аръёсыз сярысь вера гажано дышетӥсь.

 Картэныз, Чакмин Валерий Васильевичен, Елена Васильевна тодматске Вукогуртын ужан дыръяз. «Солэн анаез, Барышникова Мария Петровна, удмурт кылын дышетӥсь луэ. Атаез, Чакмин Василий Сергеевич Быдӟым оже быремын. Со луэ «Азьлане» газетлэн нырысетӥ редакторезлэн, Чакмин Николай Сергеевичлэн, выныз. Милям эшдярамы (семьяямы) вордӥськиз пимы Игорь но нылъёсмы Эльяна но Инна. Пенсие кошки 1998 арын. Удмурт школаын но ужаса вуи, собере лэсьтӥзы кык этажъемзэ. Выль школаын одӥг ар гинэ ужаны кылдӥз, ужаны мылкыды вань вал али. Нылпиосыз туж яратӥ, уже но туж кельшымон вал. Дышетэм нылпиосы али ке но тодмало монэ, соослэн ӟеч кылъёссы одно ик сюлэмез бугырто», — шуэ гажано дышетӥсьмы, Елена Васильевна Чакмина.

Алексей Шмелёв

Санкт-Петербург