Лыдӟись доры сюресэз кузь луиз

Николай Никифоров — Балтась ёросысь удмуртъёс пӧлын паськыт вӧлмем ним. Огшоры ужась семьяын вордскыса, со анай кылзэ яратӥсь но дор палъёссэ дунъясь адямиен тодмо луиз. Бен, солы кема улыны кылдымтэ. Соин но, дыр, со улэп дыръяз сокем трос веросъёсты гожтыса вуттӥз. Паймымон кадь, но соосты лыдӟон понна трос малпаськоно но ӧвӧл. Вань веросъёсыз капчи кылын гожтэмын, озьы ке но мур пуштросэз дырын-дырын малпаськонъёсы выйытэ. Со гожъя вал огшоры адямиос, вордскем интыосыз сярысь, сокем кельшем солы гурт но гуртысь улон сярысь гожъяны. 

Шор Кушкет шоръёзо школаын нимысьтыз научно-практической конференциос ортчытӥськыны кутскем бере, Николай Никифоровлэн нимыз эшшо но паськыт вӧлмиз. Шумпотымон, писательлэн нимыз югыт кизили выллем пиштэ быдэс удмурт литература понна но.

— Зэмзэ вераса, кылем арозь та писатель сярысь номыре ум тодӥське вал. Н. Никифоровлэн творчествоеныз научно-практической конференцие пыриськыса тодматским. Мерлыко сетьёсын солэн гожтэмъёсыз сокем вӧлмемын ӧвӧл вылэм. Соин милемлы туж тунсыко вал интыысь писательлэн малпанъёсыныз тодматскыны. Озьы тӥни табере милям Пичи Пурга ёросысь школаосын но Николай Никифоровлэн творчествоеныз тунсыкъясько, — ивортӥзы Пичи Пурга ёрос школаосысь дышетӥсьёс.

Гожъяськыны Николай Михайлович пинал дыръяз кутскиз, кылбуръёс бордысен. Нырысетӥ «Ӟольгыри» кылбурзэ «Дась лу!» газетын но печатлазы. Солэн кылбуръёсыз «Йыр вадьсын инбам» (1984 ар), «Выжыос-сяськаос» (1990 ар), «Погыли» (1996 ар) коллективной бичетъёсы пыризы. Николай Михайлович ассэ прозаын но эскериз. 1983 арын потэм «Чипы лым» сборниклэн но одӥгез авторез пӧлын со луэ. 1995 арын Н. М. Никифоровлэн нимаз бичетэн дышетскись пиналъёслэсь сюлмаськонъёссэс, эшъяськон но яратон кусыпъёсты, улонын пумиськылӥсь пӧртэм могӟетъёсты возьматӥсь «Толэзен вераськон» шуыса нимаськись нырысетӥ книгаез потӥз.

Аспалмы печатласькиз «Удмурт дунне» газетын, «Кенеш» но «Инвожо» журналъёсын. Пӧртэм юморескаос, серемес мадёсъёс но сценкаос гожъяз. Кужымзэ пьеса гожтонын но эскериз. Куд-огъёсызъя Удмурт радио постановкаос но дасяз. Но котьку но Николай Михайлович тужгес юн кусып возиз Балтась ёросын потӥсь «Азьлане» газетэн. Дырын-дырын туала лыдӟисьёсты но тодматон понна солэсь веросъёссэ печатланы тыршиськом.

— «Удмуртия» издательствоын Николай Никифоровлэн покчиослы гожтэм веросъёсыныз «Гондыр эктон» книгаез потӥз. Бичетэ 21 веросъёсыз пыртэмын. Автор та рукописьсэ ачиз улэп дыръяз 2001-тӥ арын дасям, нош издательствое сётыса вуттымтэ.

2022-тӥ арын мон Татарстанысь Балтаси ёросысь Средний Кушкет школае вазиськи, Николай Михайловичлэн кыӵе ке рукописьёсыз кылемын ӧвӧл-а шуыса. Дышетӥсь Олеся Яковлева (мынам тодэмея, писательлэн ӵыжы-выжыез луэ) мыным Н. Никифоровлэсь «Гондыр эктон» рукописьсэ ыстӥз. Веросъёссэ лыдӟыса потӥ. Троссэ соку ик тодмай, «Кизили» журналэ поттылӥмы вал угось.

Рукописез «Удмуртия» книгапоттонние сётӥ. Издательстволэн кивалтӥсезлэн Юрий Кузнецовлэн, редакторлэн Сергей Матвеевлэн сюлмаськеменызы книга югыт дуннеез адӟиз, табере со лыдӟисьёс доры сюресъёс утчалоз. Оскисько, книга вуоз авторлэн вордӥськем палъёсаз но.

Котькуд веросын — тунсыко учыр, аспӧртэм геройёс, сямъёс. Книга покчи лыдӟисьёсты серекъятоз но, малпаськытоз но, — ивортӥз аслаз мерлыко бамаз тодмо удмурт гожъяськись, журналист Ульфат Бадретдинов.
Тиражез — 300 экземпляр. 

Тӥни сыӵе шумпотон иворен тӥлесьтыд но мылкыддэс ӝутыны малпамы. Оскиськом, матысь дыре ёросысь удмуртъёс но книгалэн пуштросэныз тодматскыны быгатозы. Печатлам книгаос лыдӟон понна гинэ ӧвӧл, соос будӥсь поколение, история понна воштонтэм инъет луыса кылёзы.