Ма быдӟа кузьым тон, нылкышно!

Сяме пыремын ини: 8 южтолэзе нылъёс, нылмуртъёс, нылкышноос, песянайёс асьсэлэсь ненег тулыс праздниксэс пусъё. Дырыз но туж тупась уга: та вакытэ ваньмыз улӟе, шунды золгес пиштыны кутске, куазь шунытске но небӟе, кытын ке шер-тур тылобурдо куараос кылӥськыны кутско. 

Вашкала дырысен нылкышно вылын семьялэн шунытэз гинэ ӧвӧл, нош юртлэн зӥбыт но ӝикыт луэмез но возиськиз. Азьвыл семьяе ужась но таза нылмуртэз басьтӥллям, кудӥз азьланяз семья учогез утись луоз, нылпиосты будэтоз, юртъерез учкоз, сиён пӧралоз, пӧртэм ужъёсты быдэсъялоз. Малпаське али, макем бадӟым кылкутон усе кышномуртлэн ненег пельпумъёсыз вылэ! Паймымон, макем трос кужымез луыны кулэ кышномуртлэн! 

Туала нылкышноос вашкала кышномуртъёслэсь трослы висъясько ини. Туннэ кышномурт — со нырысь ик нимаз личность, кудӥзлэн вань аслаз яратоно ужез, эшъёсыз, хоббиез, тунсыкъёсыз но кулэяськонъёсыз. Огъя вераса, туала нылкышнолэн вань ас улонэз, кудзэ со ачиз быръе. Валамон ини, туала технологиослэн азинскеменызы, кышномуртлэн ассэ учкыны но дырыз тырме, семьяезлы, ужезлы, эшъёсызлы но дыр сюре.

Туннэ статьяямы но сыӵе ик задор сямо кышномуртэн тодматскоды. Со ныл, кышно, анай но ужбергатӥсь. Ёросамы сое тросэз чеберлыкез но тазалыкез азинтӥсь одӥг тодмо компанилэсь ужзэ вӧлмытӥсен тодо. Тусбуезъя со чебер но веськрес кышномурт, кужымезъя пиосмуртъёслэсь бере уз кыльы. Ужезлэн емышъёсыз но ушъяськымонэсь. Тӥ лыдӟоды огшоры гуртысь ныллэн улонысьтыз пичи люкетсэ, оло, тӥляд но азьланяз мылкыдды усьтӥськоз маин ке выленыз тодматскыны.

— Оля, вера вал кӧня ке ачид сярысь: кытын вордӥськид, кытын али улӥськод но кин луыса тыршиськод?

— Мон вордӥськи но будӥ Кисаль (Сала-Кушкет) гуртын, шоро-куспо семьяын, анай но атай огшоры гуртысь ужась адямиос, номыр аспӧртэмлыкоез ӧй вал. Мон сяна семьяямы вань на Алина нимо сузэры. Покчиёзо тодон-валан басьтӥ но пумозяз Ӟаны шоръёзо школаын дышетски. 11 классэз йылпумъяса, дышетсконме Казаньысь кун университетын азьланьтӥ. Cое йылпумъяса, психологлэсь ӧнерзэ басьтӥ, ватсаса — англи кылъя дышетӥсьлэсь ӧнерзэ. Школаын дышетскыкум ик льӧль малпанъёсам бадӟым городын улон но бадӟым чебер машинаен ветлон вал ини. Зэмзэ вераса, мон котьку коньдон поттон сярысь малпай, ватсаса пӧртэм ужъёслы но дышетски, аслэсьтым зэмос быдэстоно ужме утчай: бровист но, массажист но, парикмахер но, шугарингъя мастер но. Но та пӧлысь одӥгез но сюлме кельшымон ӧз луэ.
Туннэ нуналэ улӥсько Казаньын, аслэсьтым бизнесме онлайн нуисько. Та аспӧртэмлыко ӧнер мынам улонам 2014 арын потӥз. Азьвыл ик ваньмыз ас бордысен кутскиз: компанилэн продуктъёсыз чеберлыке но тазалыке понна пайдаё луо шуыса шӧдӥ. Сыӵе тӥни «эшъяськонмы» дас арлэсь кема кыстӥське ини. Али мынам туж бадӟым командае. Котькудӥз тазалыкез сярысь сюлмаськыса лыктэмын, али соос ини талэсь бервыло луэмзэ валало. Озьы ик тросэз валтӥсь ужзылэн уждунэз вылэ ватсаса доход пырто, таиз но мултэс уг луы. Семьялэн пыкет луэменыз, аслым ачим оски шуысал. Озьы мынам Ципья гуртын но магазинэ усьтӥськиз. 

Та сюрес, зэмзэ вераса, капчи ӧй вал, куддыр усьылонъёс но луизы, синкылиос но кисьтӥськизы. Ваньзэ куштэме но потэ вал. Но, сыӵе дыръёсы аслым котьку юанъёс сётӥсько вал: «Кӧня адями понна мон пайдаё луыны быгатӥсько? Кӧня адями тазалыксэ юнматыны быгатоз мон пыр?» Соин котьку азьлань гинэ мыныны но адямиослы юрттыны тыршисько.

— Кытысь тон кужым басьтӥськод азьлань мыныны?

— Семьяысьтым. Со мынам юн пыкетэ, мынам нылпиосы — мынам мотивацие. 2014 арын Леонид нимо пилы бызи. Кузпалэ котьку мон вӧзын, котькуд ужын но, котькуд юанын но мыным юрттыны дась. Милям вань нылмы (8 арес) но пимы (6 арес). Котькудӥзлы нимысьтыз саклык висъяно. Туала улонлэн темпеныз ваньмаз вутскыны кулэ. Шутэтскон нуналъёсты котьку сямен гуртын ортчытӥськом, яратоно анай-атайёсмы доры бертӥськом. Ваньмыз семьяысь потэ. Макем тон шудо семьяяд, сокем ужъёсыдлэн но бервылъёсыз вылӥ луо.

Мынам уже троссэ интернетэн герӟаськемын бере, нунал ӵоже троссэ ужъёсты лэсьтыны вутскисько. Нылпиосмы школае ветло, кружокъёсы, эктон занятиосы. Соосты нуоно-ваёно, нош уже котьку дорам, телефонын, интернет гинэ кулэ. Та туж каньыл: пиналъёсты витьыку, мон ужасько.

— Ӝытъёсты кызьы ортчытыны яратӥськод?

— Ӝытъёсы керттӥськыны яратӥсько. Со сюлэмез но йырме буйгатэ, малпаськытэ. Нуналлы йылпумъянъёс лэсьтон понна туж пайдаё уж та.

— Вашкала дырысен 8 южтолэзь — со Нылкышноослэн калыккуспо нуналзы. Маин тон понна та праздник аспӧртэмлыко луыса син азяд пуксе но кыӵе луыны кулэ туала кышномурт?

— Асьмеос ваньмы тодӥськом ини, кышномурт — со семьялэн шорсюлэмез, аспӧртэмлыко двигателез. Сотэк улон ӝегатске, кыӵе ке бездыт луэ кадь, соин кышномурт котьку чидась, кужмо луыны кулэ, со дыре ик чебер, яратӥсь, каньыл мылкыдо луоно.

— Мар тон карод та нуналэ? Кытын ортчытод сое?

— Та празднике сяме пыремъя ми кузпалэным анайёсмес, песянайёсмес но апайёсмес ӟечкыланы мыном. Мон малпасько, 8 южтолэзь — со нырысь ик семьялэн праздникез, куке ваньзы люкасько анай дорын но быдэс корка тыр ческыт пӧраськемъёслэн зыныз лӧсъяське. 

— Туж тунсыко на тодыны, кызьы тӥ бадӟым городын улыса, сыӵе машина басьтыны быгатӥды. Татын компаниедлэн юрттэтэз но вань-а?

— Одно ик. 2022 арын ми выль HAVAL F7 машина басьтӥм, быдэс комплектациен вал со. Со понна компания автобонусъёс тыре. Та машиналэн руль сьӧраз асме самолётлэн штурвал сьӧраз кадь шӧдӥсько (серекъяса).

— Тон кышномурт, анай но кышно гинэ ӧвӧл, тон бизнесвумен но. Кызьы туала кышномуртлы котькытчы вутсконо но со дыре ик кужымдэ ыштытэк, семьяедлы, яратоно ужедлы саклык висъяно? Мар ке но мышке уг кыльы-а?

— Зэмзэ вераса, котькытчы вутскыны секыт луылэ. Кызьы верай вал ини, мынам семьялэсь туж бадӟым юрттэт вуэ, соин шумпотӥсько но азьлань мынӥсько. Мынам вань яратоно но яратӥсь семьяе, ваньзы сӧл-таза, Инмарлы тау, сыӵе узырлыке вань. Кышномуртлэсь валтӥсь ужпумзэ быдэстӥ шуысал. Асьтэос тодӥськоды ук, нылъёс, ӟучъёс верамъя, эмоциосын уло, соослы кыӵе ке кужмо мылкыдъёс кулэ. Сыӵе мылкыдъёс соосты пӧртэм ужъёсты быдэстыны бурдъяло. Синмаськыса учкисько ужлэн емышъёсыз шоры. Компанилэн стимул сётэмез но мылкыд сётэ: котькуд кузьымен эшшо но тросгес ужаме потэ. 

— Туннэ нуналлы малпанъёсыд зэмазы шуыса вераны быгатӥськод-а?

— Бен, вань малпанъёсы зэмазы. Республикалэн шоркараз улӥсько, яратоно семьяе вань но машинаен ветлӥсько. Тӥ но ас кужымдылы оске, соку тӥляд но малпанъёсты одно ик быдэсмозы.

— Оля, бадӟым тау вераськемед понна. Ми сӥзиськом тыныд семьяяд но ужад азинлыко луыны. Вань малпанъёсыд одно ик мед замалозы. Нош тон мар сӥзьысалыд вань кышномуртъёслы та нуналэ?

— Та шуныт тулыс празднике вань нылъёслы, нылкышноослы, анайёслы но песянайёслы самой шунытэсь но сюлмысь ӟечкыланъёсты вераме потэ. Сӥзисько тӥледлы сибирысь кадь тазалык, пумтэм яратон. Возьмалэ асьтэды, ведь тӥ матысьёстылы туж кулэ адямиос.

Кышномурт вань улоназ матысьёссэ небыт шобрет выллем шунтэ но котькуд шуг-секытъёслэсь утьыны тырше. Но туала кышномурт семьялэсь учогзэ утись гинэ ӧвӧл ни, со пиосмуртэн огкадь ужъёсты быдэсъясь. Солэн трос кужымез, жалясь сюлэмез но ӵыдонтэм трос луонлыкъёсыз. 

Гажано нылъёс, нылкышноос, песянайёс! Нылкышноослэн калыккуспо нуналаз пуш кужымдэс ыштытэк, котьку пальпотыса азьлань гинэ мынэ. Тулыслэн шуныт пельтэмъёсыз улонады паськыт сяськаё бусы выллем мед вӧлъяськозы, нош сюлэмады котьку шуныт но капчи тулыс мед луоз.