Маин егитъёсты синмаськытэ эмтодос? (азьланьтонэз)

— Малы эмтодос удысэз быръёно кариськиды? Та удысын маиз тужгес но кельше? Кыӵе шуг-секытъёсын пумиськоно луиськоды?

Елена: Анай пичи дырысен ик вера вал эмтодос удысэ дышетскыны пыроно шуыса, нош мон пумитаз верасько вал, тӧдьы халат уг нуллы шуыса. Экзаменъёс бере дышетӥсьлы документъёсме сётӥ, собере малпаськи но, дышетӥсь луэме уг поты шуыса валай. Пумаз-йылаз медицинской колледже дышетскыны пыри. Нырысетӥ нуналъёсысеныз ик валай: та «мынам» удысэ. Колледжез йылпумъяса, Йошкар-Олаысь Быдӟым Атыкай ожысь ветеранъёслэн госпитальысьтызы ӝегатскытэк юрттэт сётон кабинетазы фельдшер луыса ужаны кутски. Туннэ нуналэ ужасько аптекаын нырысетӥ ӝӧк сьӧрын (лыктэм адямиослы эмъюм вуза — Ю. Щ.). Матысь дыре дистанционной амалэн фармацевтлы дышетскыны малпасько. 

Ветеранъёсын ужаны тунсыко но пӧртэм пумо вал. Пациентъёслэсь туж трос тау кылъёсты кылӥ. Одӥг кышномуртлэсь верамзэ ноку уг вунэты: «Тӥледын вераськем бере улэме потыны ик кутскиз». Сюлме кылизы та кылъёс. 

Эмтодос удыс кельше, татын тон адямиослы юрттӥськод, вераськиськод, огназ улӥсь песяй-бабайёслэсь сюлэмзэс каньыл кариськод. Шуг-секытъёсыз но вань ини, татын котькуд адямилы нимысьтыз амал шедьтоно. Туннэ нуналэ но анайлы тау карисько дыраз мыным шонер сюрес возьматӥз шуыса. Озьы ик бадӟым тау вань семьяелы, кудӥз вань кужымзэ поныса мыным юрттэ но вань малпанъёме улонэ выжтыны кужым сётэ. 

P.S.: Тӥни сыӵе эмтодос удысын тыршись нылъёслэн валэктонъёсынызы тодматскимы туннэ. Кин тодэ, кызьы радъяськоз соослэн азьпал сюрессы, но адямиослы юрттэмзы ноку лыдэ басьтӥськытэк уз кыльы. Ужъёсады адямиосын одӥг кыл шедьтыны но сюлмысь тау кылъёсты кылыны сӥзиськом, адямиосты ыштонэн пумиськыны тӥледлы ноку медаз кылды.