Москва парадын — асьме солдат

Милям син азямы, туж ужась пи луыса будӥз Алмаз. Дораз но тэк ӧз улы, кык гужем комбайнёрлы юрттыса но ужаз. Школаын но умой дышетскиз. Казаньысь гурт хозяйствоя государственной академие дышетскыны пыриз, одӥг арскын армие кошкиз.

Калининград улосысь Балтийск городэ интыяськем 336 номеро десантно-штурмовой батальонэ - морской пехотае шеде Алмаз. Сӥзьыл ик ини ньыль арлы огпол ортчытӥськись «Запад - 2013» калыккуспо военной дышетсконъёсы пыриське. Нош ноябрь толэзе ӝужыт, веськрес мугоро пиослэсь нимаз группаос - асьсэ сямен верано ке, «коробкаос» - люканы кутско. Алмаз но соослэн радазы шеде но туэ январь толэзе Санкт-Петербургын Ленинград блокадаез тӥянлы 70 ар тырмемен валче радъям парадэ пыриське.

Нош 16 мартэ со быдэн 200 адямиен кык «коробкалэн» составаз Москвае лобе. 9 мае ортчоно парадлы дасяськон ужрадъёс толэзьёс ӵоже мыно, нуналаз 4-5 час кыстӥсько. Алмазлэн «Парадэ пыриськись» шуэм одӥг медалез вань, военной билетаз гожтыса, эшшо одӥгзэ сёто вылэм.

Вуж Салаусьысь Азат Хурматуллин но Екатеринбург городын ортчем парадэ пыриськем.