Азьлане
«Мудорвайлэн» тылъёсыз пиштӥзы 1-тӥ люкет + фоторепортаж
27 шуркынмонэ ёросамы удмурт лулчеберетлэн «Мудорвай» вожвылъяськонэзлэн Гала-концертэз ортчиз.
Устоосыз пӧлысь устоосыз вирнунал ӝытэ Балтась лулчеберетъя юртэ люкаськизы. Эшшо ке та удмурт кыллэн нуналэзлы тупаз, озьыен, ёросамы кык полэс удмурт праздник луиз.
Мылкыдъёс ӝутӥськемын, ми туннэ тырмем залын,
Вань ужъёс палэнтэмын, лыктэмын ми шутэтскын…
«Мудорвайлэсь» Гала-концертсэ возьмаса, таӵе кырӟан гуръёс тодам лыктӥзы. Альбина Беспалова, оло, азьвыл тодыса ик гожтэм та чуръёсты? Ӵапак та нуналлы тупало ук соос!
Учкисьёс люкаськемын, нылпиос дӥсяськемын, берпуметӥ дасяськонъёс йылпумъяськемын, сцена вылын ӝуатско тылъёс но пото ужрадэз нуисьёс. Соос учкисьёсты, нылпиосты пумитало, котькудӥзлы вормонъёс сӥзё. Кыл сётӥське Балтась ёросысь лулчеберетъя ёзэтлэн кивалтӥсезлы Ильназ Петровлы.
Со ужрадлэсь чеберзэ но кулэлыксэ пусйиз, йӧскалыко луэмез сярысь но ивортӥз. Одӥгез гинэ паймытӥз, удмурт вожвылъяськонын со сценаысен бигер кылын вазиськиз. Собере ини самой валтӥсез кутскиз — выжыкыл дунне — нылпиос ёрослэн валтӥсь сценаяз удмурт кылэз шараязы. Огезлэсь-огез муспотон пиналъёс сценаез чеберто: кырӟало, экто, сценкаос возьмато, кылбур лыдӟо. Макем мусо кылӥсько соослэн удмурт кылъёссы! Кыӵе задор эктонъёс, пуштросо кылбуръёс, ӵыдонтэм чебер кырӟанъёс, кылзэмъя кылзэм, учкемъя учкем потэ.
Куинь зонаысь татчы 38 номер люкаськиз, огъя 160 пыриськись. Соосты жадьытэк, одӥг шокчемен учкимы. Пӧртэм йӧскалык чеберъянъёсын выступлениос эшшо но мылкыдэз ӝутӥзы. Шумпотымон, татын удмуртэз но, ӟучез но, бигерез но огкылысь эшъяськыса вожвылъяськонэз ортчыто.
Ваньды тодӥськоды, дыр, Ципья нылпи садысь пиналъёс но куд-ог мукетъёсыз тодмо мугъёсъя ваньмынызы ӵош зона вожвылъяськонэ пыриськыны ӧз быгатэ. Соос понна нимысьтыз зона ортчиз. Соос пӧлысь но та ӝытэ усточиосты адӟимы.
Пусъеме потэ тодэ кыльымон Ципья нылпи садысь егит кизилиез — Дарья Раимоваез. Ачиз пичи ке но, куараез туж пезьдыт, жингрес. «Лымы тӧдьы» удмурт калык кырӟанэз быдэстыса, эктыны но вутскиз, аспӧртэмлыко черектонэныз но висъяськиз. Аппаратураен шуг-секытъёс кылдӥзы ке но, со ӧз ыштӥськы, кырӟанзэ азьланьтӥз. Ӟечок нылаш! Кивалтӥсезлы — Лариса Тарасовалы — тау шуыны кулэ, со зэмос удмурт жингрес куараё кырӟасез будэтэ!
Озьы ик Покчи Лӧзя нылпи садысь Карина Волкова таланто луэмзэ возьматӥз. Мунё кадь чебер удмурт дӥськутэн дӥсяськыса, со «Мемие но вордэм» тодмо кырӟанэз быдэстӥз. Вожвылъяськонэ пыриськисьёслы ёросысь волонтёръёс выступленизы бере ик кузьымъёс сётӥзы.
Ужрадлэсь йылпумъянъёссэ вераны но вормисьёсты нимысьтыз дипломъёсын пусйыны кыл сётэмын вал лыктэм куноослы — жюрилэн ёзчиосызлы: Светлана Измайловалы — ТР-ысь лулчеберет удысысь сӥё-дано ужасьлы, «Русская песня» калык хорлэн но «Славянские узоры» калык ансамбльлэн кивалтӥсьсылы, Казаньысь Н. Жиганов нимо кун консерваторилэн выпускницаезлы, ТР-лэн Раисэз бордын радъям лулчеберетъя но искусствоя Кенешлэн ёзчиезлы; Елизавета Короткина — Удмурт кун лулчеберетъя колледжлэн выпускницаезлы, Казаньысь удмурт егитъёслэн «Эрико» ансамбльзылэн нырысетӥ кивалтӥсезлы но Надежда Никитиналы — театрысь но киноысь актрисалы, М.С. Щепкин нимо Вылӥ театральной училищелэн выпускницаезлы, «ЯАртист» студилэн кивалтӥсезлы. Соос пусйизы концертлэсь чеберлыксэ но нылпиослэсь тыршемзэс.
Котькуд номинациын вормем но призо инты басьтэм нылпиосты нимысьтыз пусъеммы потэ:
«Удмурт кылын кылбур лыдӟон» номинациын:
I степенё диплом — О.Н. Исаев нимо Ӟаны шоръёзо школалэн Вуж Кушкет покчиёзо школа филиалысьтыз Исаева Аделина, Ципья шоръёзо школаысь Конькина Милана, Карадуван нылпи садысь Гарифуллина Саида, О.Н. Исаев нимо Ӟаны шоръёзо школаысь Ширинова Севиль, Ципья шоръёзо школаысь Филиппова Эльза;
II степенё диплом — Балтасьысь 2-тӥ номеро нылпи садысь Вафина Асель, О.Н. Исаев нимо Ӟаны шоръёзо школаысь Никифорова Елизавета;
III степенё диплом — Балтась гимназиысь Нарузова Алина, Балтасьысь 5-тӥ номеро нылпи садысь Халилова Ильфина, О.Н. Исаев нимо Ӟаны шоръёзо школаысь Яковлева Софья.
«Удмурт кылын театральной миниатюра возьматон» номинациын:
I степенё диплом — О.Н. Исаев нимо Ӟаны шоръёзо школаысь 2-4 классъёслэн коллективзы, О.Н. Исаев нимо Ӟаны шоръёзо школаысь 1-тӥ класслэн коллективез.
«Удмурт кылын оген кырӟан быдэстон» номинациын:
I степенё диплом — Балтась гимназиысь Тугумова Милана, Балтась гимназиысь Александр Нарузов, Покчи Лӧзя нылпи садысь Петрова Стефания (эктӥсез — Плотникова Мирослава), Ципья нылпи садысь Раимова Дарья, Покчи Лӧзя лулчеберетъя юртысь Агеев Денис, Ярак-Чурма покчиёзо школа-нылпи садысь Фомина Анна;
II степенё диплом — Балтасьысь 3-тӥ номеро огъя визьнод сётӥсь нылпи садысь Закирова Залина;
III степенё диплом — Покчи Лӧзя нылпи садысь Волкова Карина, О.Н. Исаев нимо Ӟаны шоръёзо школаысь Игнатьев Игнат, Ципья шоръёзо школаысь Демеева Ангелина, Покчи Лӧзя лулчебертъя юртысь Добромыслов Ярослав.
«Удмурт кылын коллективен кырӟан быдэстон» номинациын:
I степенё диплом — Ципья шоръёзо школаысь коллектив, Карадуван нылпи садысь Сагьдиев Самат но Галимова Зинира, О.Н. Исаев нимо Ӟаны шоръёзо школаысь 2-4 классъёслэн коллективзы, Балтась лулчеберетъя юртысь Антон но Андрей Камаевъёс;
II степенё диплом — Балтасьысь 2-тӥ номеро нылпи садысь «Горошинки» ансамбль;
III степенё диплом — Покчи Лӧзя лулчебертъя юртысь «Чебеляй» коллектив.
«Удмурт калык эктон быдэстон» номинациын:
I степенё диплом — Нурмаысь «Тургай» нимо нылпи садысь «Непоседы» творческой коллектив, Сосна нылпи садысь «Искра» эктонъя коллектив, Балтасьысь 4-тӥ номеро комбинированной нылпи садысь коллектив, Балтасьысь 5-тӥ номеро нылпи садысь коллектив, Ципья нылпи садысь «Искорки» коллектив, Карелино нылпи садысь «Забава» коллектив, Вуж Кушкет гурт клублэн «Веснушки» коллективез;
II степенё диплом — Балтасьысь 1-тӥ номеро нылпи садлэн коллективез, Балтасьысь 3-тӥ номеро огъя визьнод сётӥсь нылпи садысь «Непоседы» коллектив.
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Галерея
Оставляйте реакции
Теги: гала-концерт "Мудорвай"-2024
Нет комментариев