«Мудорвай» нылпиосты нош ик шумпоттӥз

17-19 шуркынмонъёсы асьме ёросамы витетӥзэ «Мудорвай» конкурс ортчиз.

Конкурс сярысь арысь аре газетэ гожъяськомы бере, лыдӟисьёс умой тодо, солэн радъясез Татарстанысь удмуртъёслэн автономизы луэ шуыса. Таяз учыре «Мудорвай» конкурслэн ёрос этапаз  Татарстанысь удмуртъёслэн НКА-зылэн исполнительной директорез Ольга Чайникова вуылӥз. Со вожвылъяськонэ пыриськем пиналъёслы, дышетӥсьёслы но визьнодасьёслы таукарон кылъёссэ вуттӥз, «Мудорвай» выллем конкурсъёслэн кулэлыксы сярысь эшшо огпол тодазы уськытӥз. Балтась ёросысь удмуртъёслэн «Кенеш» огазеяськонзылэн тӧрез Ольга Пчельникова но, ӟечкылан кылъёсты вераса, ваньзылы, кин та конкурсэз радъяны но ортчытыны юрттӥз, таукарон кылъёссэ вераз, сӥзиз тазалык но шудбур, удмурт лулчеберетмес но кылмес медам вунэтэ вал шуыса мылкыд каронъёссэ но вуттӥз:

— Мон туж шумпотӥсько, нылпиос понна таӵе вожвылъяськон кылдытэмын шуыса. Татчы удмурт нылпиос гинэ уг пырисько, ӟучъёсыз но, бигеръёсыз но асьсэды та конкурсын утё. Озьыен, соос асьмелэн кылмылэсь палэнтӥ уг ортчо; асьме кылынымы, лулчеберетэнымы тунсыкъясько. Азьпалан но таӵе вожвылъяськонъёсы пыриськыны мылкыдзы медаз кулэсмы вал.

«Мудорвай» вожвылъяськон нылпи садэ ветлӥсь но покчи классъёсын дышетскись пиналъёс пӧлын удмурт лулчеберетэн, удмурт кылэн тунсыкъяськонэз будэтон вылысь ортчытӥське. Туэ асьме ёросамы вожвылъяськон куинь зонаослы люкемын вал — Ципья, Шор Кушкет, Покчи Лӧзя. Огъя конкурсэ 167 нылпи пыриськиз, соос пӧлысь 34-ез Ципья зонаын выступить каризы, 16-ез — Шор Кушкетын, нош кылемъёсыз — Покчи Лӧзяын. Пусйыны кулэ, Покчи Лӧзя зонае, Лӧзя школаысь дышетскисьёс но со гуртысь ик нылпи садэ ветлӥсьёс сяна, пыриськизы на Балтасьысь 1-тӥ, 3-тӥ но 5-тӥ нылпи садъёсы ветлӥсь пиналъёс; Карелиноысь, Соснаысь, Бурбашысь нылпи садъёсы ветлӥсь нылъёс но пиос; Ярак-Чурма но Вылын Ушма школа-нылпи садъёсын визьнод люкасьёс.

Туэ но нылпиос ньыль номинациосъя вожвылъяськизы: кылбур веран, эктон, оген кырӟан но коллективен кырӟан. Котькуд номинацияя нылпи садэ ветлӥсьёс пӧлын но покчи классъёсын дышетскись пиналъёс пӧлын нимаз вормисьёс но призёръёс бырйиськозы. Гала-концертын 1-тӥ, 2-тӥ но 3-тӥ интыосты басьтэм нылпиос выступать карозы. Соос но, вожвылъяськонэ пыриськыса призо интыостэк кылем пиналъёс но, кузьымъёсын пусйиськозы. Ужрадэ пыриськемзы сярысь дипломъёсты соослы сётӥзы ини. Пусйыны кулэ, «Дуслык» общество (кивалтӥсез Колоколов Николай Григорьевич) «Мудорвае» пыриськемъёсты ческыт кузьымъёсын но шумпоттӥз. Гала-концерт 2-тӥ толсуре луоз шуыса витиське.

Фото: автор