Муш вордон мед азинскоз

Муш вордон — удмуртъёслэн вашкала дырысен яратоно ужзы. Быгатӥсь куд-ог семьяослэн нюлэскын ог дасо подэмъёссы (писпу гыркъёсысь кыр муш семья) луылӥллям. Котькудӥз кузё писпуэ аслэсьтыз пуссэ пуктылэм, муртлэсьсэ йӧтылымтэзы. Иське бадӟым куара но поттылӥське вылэм. Писпуэ тубан понна нимысьтыз «гондыр гижыос» лэсьтылӥллям. Удмуртъёс 18-тӥ дауре гинэ ай до- разы муш вордыны кутскиллям, писпуосты каньыл гинэ вандо но вайыса котыразы пуктыло вылэм. Пумен умортоос лэсьтылыны дышиллям. Ӟуч но кунгожсьöр тодосчиослэн гожъямъёссыя, удмуртъёс трос чечы но сюсь вузаллям. Кудӟытӥсь юон — мусур — но дасяллям. Дуно кунооссэс нянен-чечыен-пушмульыен пумиталозы вылэм. Мушкасьёс чакласькисесь луылӥллям. 

Мынам ӵужанае Ӟаныысь вал, мушсы трос вылэм. Солэн анаез Каляка Марья вералоз, пе, вал: «Муш яратэ чылкытэз: зын мугоро, юэм муртэн сэрен соос аляло, вожзы потэ. Мушкась семьяын керетыса ке уло, муш уг удалты. Калгись мушкасьлэн мушез уг пишмы. Чурыт муртлэн мушез уг удалты». Озьы ик муш семьялэсь лыдзэ но шонер вераллямтэзы. Син усёнтэм вылысь, бакчаязы со-та арбериос ошылӥллям.

Котькуд мушкасьлэн мушъёслы аслаз кырӟанэз-вазиськонэз луэм. Сое но муртлы шарае поттылымтэзы. Тани таӵе кырӟанъёс-вазиськонъёс:

1. Дун-дун, дун-дун, дун-дун,
Пужымам тубисько,
Подманы тубисько мон,
Подманы тубисько мон,
Мушъёсы, лыктэ али татчы,
Жингыр-жингыр карыса.

2. Куж-куж гинэ карозы лобась мушъёсмы,
Мушъёсмы чечызэс тэркыен-тэркыен ваёзы. 
Будӥсь гинэ но пиналъёсмы шум мед потозы. 
Сарбаяз но анайзы сур пӧзьтыса дасялоз, 
Сарбаяз но анайзы няньзэ пыжыса дасялоз, 
Утем гинэ нылпиос чечы сиём шуозы. 

Вашкала муш вордон öнерзэс удмуртъёс уг на вунэто, котькуд удмурт гуртын мушкасьёс вань: кудъёсызлэн со кемалась дырысен выжыысен выжые дугдылытэк мынэ, мукетъёсыз — али мушкан ужен вырыны кутскизы но ужам бервылзы но шӧдӥськымон. 

Кылем даурлэн кутсконаз гуртамы муш вордонэн данъяськылэм Шестаков Алексей Тихонович. Олексей агай ёросын та дырлы туж вылӥ культураё адями вылэм: гожтэтлы дышетскемын, сад-бакчаез узыр, мушъёсыз тырмыт, лачмыт воргорон. Коркаез но солэн кык этажо, ньыль комнатаё вал. 30-тӥ аръёсы солэсь юртсэ школалы но арендае басьто. Соку отын дышетскем Зоя апай Петрова Олексей агайлэсь туж каньыл луэмзэ вера. Сюдэ, пе, вал чечыен но, бакча сиёнъёсын но. Садаз экскурсие но ветлытылэм. Олексей агайлэсь öнерзэ басьтэ солэн Семон выныз. Семонлэн кык пиосыз Павел (Павич агай) но, Григорий но мушканэн выро, колхоз муш бакчаын но кема ужало на. Павел агайлэсь ужзэ азинто Василий, Валерий (Удмуртиын уло), Аркадий (кулэмын ни) пиосыз, нош Григорий агайлэсь — Пётр но Вячеслав пиосыз. Пётр нырысь дышетскиз Казаньысь пудо эмъянъя институтын, собере Рязаньын нимысьтыз дышетскиз муш вордонъя зоотехниклы. Кизнер районын муш вордонъя валтӥсь зоотехник луыса ужамын. Вячеслав Григорьевичлэн нимысьтыз мушъя дышетскемез öвöл ке но, агаезлэсь ортчытэ, шуо.

Вань на нош Шестаков мушкасьёслэсь династизэс азинтӥсь — со Семён Шестаков, Олексей агайлэн Аркадий вынызлэн нунокез. Семён Петровичлэн анаез Марья апай Кутэшысь муш вордӥсь Данька выжыысь луэ. Бызем бераз анай-атаезлэсь ужзэ Карек-Сермае но выжыяськытэ. Со дырысен тани 60 арлэсь трос дыр ортчиз ни, Марья апай но кулэмын, нош яратоно анаезлэсь мытэм ужзэ туж быгатыса покчи пиез азинтэ. Семён Петровичлы Чапаев нимо колхозлэсь муш кузёлыксэ но оско. Пенсие потэм бераз но, интыяз мурт шедьтыны ӧз быгатэ. Ужаны ӧй ке быгатысал, кемалась сэрпалтысалзы, дыр, ни. Табере хозяйствоын муш вордонэз быдтӥзы.

Шестаковъёслэн ик выжыысьтызы Якимов Владимир, котьма ужлы луэм воргорон, районысь одӥгез устоез комбайнёр, муш вордон борды но кутскыны ӧз кышка. «Мушез оген вордыны уг луы, со понна мушлэсь кышкасьтэм семья кулэ. Яратскод чечыез — чида муш лекамез. Гужем мушъёс ӵем палдыло, кытчы пуксемзэс чаклано, палэтэз дыраз люкано но выльысь умортоосы интыяно. Нош ачим ужын. Сыӵе дыръя кузпалэлы ужаны тупа, Славик агай юрттылэ, юанъёс кылдӥзы ке но, солэсь юалляськисько», — вера Владимир.

Мушканы туж устоесь вал Матвеевъёслэн семьязы: атаез Серафим агай но солэн пиез Фёдор. Педор агай Казаньын муш вордонъя нимысьтыз ды- шетскылэм мурт. Тодам на Серапи агаен муш вордон сярысь ӵош кенешылэмзы. Трос вал соослэн муш вордонъя пӧртэм буёло книгаоссы, журналъёс- сы. Гид сьӧрысен нюкозь улмопу бакча кузя ог кызё мында умортоос сылозы вал. Макем чебер соос гужлало вал! Чечы кыскем беразы одно ик чечыен чай юыны ӧтчаськылозы вал. Сыӵе ӟеч сям гуртамы али но улэ на. Чечыез трос уд си, нош ӧтемзы — кабан быдӟа. 

Серапи агаен Педор агай пенсие потытозязы колхоз муш бакчаын тыршизы. Соос кулэм бере, доразы мушен вырись ӧз ни лу, но азинтыны муртсы вань. Оскисько, Серапи агайлэн выжыяз муш вордыны кутскозы шуыса. 

Матвеевъёслэн сямен ик, муш вордон кысӥз Пётр агай Павловлэн, Пантелей Никифоровлэн, Анатолий Прокопьевлэн. Войнаозь мушъёссы луиллям Иван Петровлэн, Семён Яковлевлэн, Семён Ивановлэн. 

Шумпотымон, егит дырысенызы ог 30 аръёс ӵоже мушен выро ни Геннадий Петров (афганец, ӵужмуртэзлэн вал мушъёсыз), Анатолий Петров (дышетӥсь), Николай Константинов (азьветлӥсь механизатор, ӵужатаез но муш вордӥз), Алексей Васильев (ЖКХ-ын ужась). Олокытысь муш ӧз басьтэ, Инмар тыршись муртъёслы ачиз сётӥз — муш палэп шоры учыраса, солэсь муш семьяос ӧрчытӥзы. 

Районысь Чапаев нимо но «Труд» колхозъёсын инженер луыса ужам Михаил Хомяков но шулдыр сад но муш бакча кылдытӥз. Миша агай ачиз ӧвол ини, но солэн кутскем ужез öз аналтӥськы, кузпалэз Вера апай утялтэ, муш уморто шоры учке ке, тодаз лыктэ яратон кузпалыз, солэн кибервылыз: кызьы, пе, куштод солэсь ужзэ. Вячеслав Шестаков нош ик юрттӥсез. Юрттэ эмеспиез Владислав Никитин но. Кӧня ке ар талэсь азьло Владислав ачиз но мушен вырыны кутскиз. Озьы тӥни азьланьтӥське гуртамы муш вордон. 

Мушкась муш кадь ик тыршись ке луиз, муш табыш вае. Муш аслыз гинэ уг ужа, утисьсэ но сюдэ, мукет калыклы но тырмытэ. Чечы кыскем бере, чечы яратӥсьёс тросэн кыстӥськыло пичи Карек-Серма гуртамы. Муш вордон — со бакчаяд мушен уморто пуктӥськод но, мушъёс асьсэос чечы люкалозы шуэм ӧвӧл. Луэм, ужась муртъёслэн гинэ мушсы но чечызы луэ.

Василий Никитин, 
Карек-Серма гурт