«Мынам сюлэм али но нюлэскын», – шуэ Ӟуч Лӧзя гуртын улӥсь 95 аресъем Мария Александровна Иванова

Паймоно кадь та арлыдоослы: соос огшоры чыры-пыры макелы но шумпотыны быгато. Небыт кыл-а со, мусо учкон-а яке шуныт ӟыгыртон-а – та ваньмыз соослы туж дуно. Веранэ Быдӟым тылож пыр потэм адямиос сярысь. Со поколениысь адямиослэн улонзы ожен ӵуштаськемын, пичи дырзэс но ож лушка, дырызлэсь вазь быдэ вуытэ... Со кышкыт война аръёсты, война бере секыт дыръёсты соос ноку уз вунэтэ, кызьы уз вунэтэ дунне вылын луэмезлы тау карыса улоно шуыса но.

Мария Александровналэн улонэз юн герӟаськемын нюлэсэн. Вордӥськем Гондыргуртэз но нюлэс дорын интыяськемын. Улон сюресаз нюлэс коран ужъёс бадӟым инты басьто, мур пытьы кельто. Тани ма вера ачиз Мария апай улонысьтыз та вакытэз сярысь:

– Гондыргуртын вордӥськи. Отын уно ужаськиз. Али сое но малпасько, трудодень понна ветлӥськиз ведь азьло. Адӟод вылэм! Сомында ужаса ветлыса, нокытчы но ӧз пыры ведь со, нокытчы но! Азьло ведь кыӵе секыт вал солэн ужез но, нярак киын ужано вал ук… – кутскиз веранзэ Мария Александровна. – Собере пумен музон турлы ужъёс но ужаськод вал. Бусыез урыто вал, анайёс сьӧры бусые мынӥськомы вал. Азьло ӟегез йӧны нюртэ вал, соин бусыез урыто вал. Собере, ю кизён быдмем бере, баранги пуктӥмы ини колхозын валэн. Адями но озьы пуктылӥз, но калыклы бусы уж быдмытэк вал уг сёто вал. Быдэсак уж валэн вал. Аман сыӵе ужъёс ужаса ветлӥськиз ини. Собере утыр бусые но потӥськиз. Бусыын усыяса но ветлӥ мон. Усыяны валъёсыз начаресь вал. Ӟыгытъёс гыро вал, ми усыяськомы вал соос сьӧрын. Айбат валъёсыз гырыны сёто, милемлы – отходзэ. Озьы ужаса ветлӥськиз ини тӥни, колхозэз обеспечить кариськиз.

Сэре тӥни нюлэсъёсын ветлӥськиз ини постоянно. Нюлэс корамы. Азьло корамы Чапшарын. Квартираын но отын улӥмы. Айбат вал квартира кузёосыз. Собере со нюлэсэз нуллытӥзы школае, больницае, адямиослы. Отысь быдтэм бере Нурмабашын корамы. Ӝыны район отын ужаз, пу кораз, дыр. Адями беда уно вал. Отын одӥг бигер кышнолэн мунчояз улӥмы. Ваньмызлы квартира тырмымтэ, дыр, ини…

Пунек нимо крашин гуртын нюлэс кораку, квартираын улӥмы. Нярак нылкышноос улӥмы. Одӥг мӧйыгесэс лумбытлы сиён пӧзьтэ вал. Нышырлы бертоно ӧй вал ук. Нюлэс кораськод сьӧрдэ-бердэ быдэсак утялтоно вал, нюлэстэ, улъёссэ сутыса кельтоно вал. Соку но кыкнамы ужамы ми Зина эшеным. Со гуртын но шӧдскымон кема ужамы. Но соос дорын корказы выж вылазы кӧлӥмы ини.

Собере Тырыш гуртын нюлэс корамы. Но отын кема ӧм ужалэ. Нюлэскысь кынмыса бертӥськом вал но гур вылазы тубиськом вал. Паймисько, кызьы лэзиллям гур вылазы тубыны. Нылпиоссы но тубо вал.

– Бен кӧня арес макеос вал тӥ соку, Мария апай?

– 14-15 арес луиськеммы меда. Ма соку возё вал-а, мар-а? Нярак озьы ветлӥзы, дыр, пиналъёс. – азьланьтӥз мадёнзэ песянай. – Нурмабашын нюлэс кема корамы. Ми бускель нылэн ӵош погыръяськомы вал. Погыртӥськом но собере сое макем кулэ ёзнаськом вал. Азьло ведь со времаосын эшшо поездэд но пуэн ветлӥз ук али, эгыр ӧвӧл бере. Солы но дасяса кораськом вал. Солы но норма сёто вал, размерен вандыто вал. Тэгыз вандыса, штабелен сюрыса кельтоно вал сое. Нош моторъёссэ погыръяськод но, ылыстӥськод но кельтӥськод вал. Со деловой материалъёсты эшшо Каенсар станцие поттӥськомы вал.

– Малпано ке, сомында нюлэскын секыт уж ужаса, тӥ нюлэслэсь жадьыны кулэ вал кадь, нош тӥ сое туж яратӥськоды. Маиз сокем кельше нюлэскын?

– Мынам сюлэм нюлэскын, али но нюлэскын. Ма нюлэсэз учкид ке, мар но бен ӧвӧл отын! Кыӵе бен чебер, шулдыр писпуос, нымы-кибыосыд но кыӵе ветло! Мон соосын вераськисько но. Кузьылиен вераськисько. Оград сӥзьыл, бадӟым кузьыли карез адӟыса, кузьылиосты ӧй адӟы. Бен, шуисько, кытчы пыриды, изьыны пыриды-а, ма ини таӵе вазь ик? Вазь изиллямды ук, шуисько, – бурдъяськыса маде Мария апай. Та минутэ, мылкыдъёссэ вормымтэеныз, песянайлэн куараез ик куалекъяны кутскиз кадь, синъёсысьтыз пальпотонэн суро мӧзмон мылкыдъёсты шӧдыны луэ вал…

Быдэс статьяез «Азьлане» газетлэн 50-тӥ номерысьтыз лыдӟыны быгатоды.