«Мынам утёно муртъёсы ваньзы но умоесь, каньылэсь»

Мӧйыосын ужан капчи уж ӧвӧл шуыса котькин но умой вала, дыр. Тросаз учыре сыӵе адямиослы уно но кулэ ӧвӧл ке но (соослы нянен сиён но шуныт юрт луиз ке, тырме), оген улӥсьёсыз понна ӵемысь огшоры вераськон гинэ уг тырмы. Сыӵе мӧйыослы ужен но, ӟеч кылын но юртто социальной удысын тыршисьёс. Арлы быдэ 8-тӥ инвожое та удысын ужасьёс асьсэлэсь ӧнер праздниксэс пусъё. Праздниксы матэктон азьын Вуж Кушкет гуртын кема аръёс ӵоже социальной ужась луыса тыршись Римма Павловаен вераськимы.

Римма Николаевна Павлова (Шапошникова) социальной удысын ужась луыса дас сизьым ар ӵоже тырше вылэм ини.

Римма апай Сырья гуртын трос нылпиё семьяын вордске. Школазэ йылпумъямез бере, со Малмыжысь СПТУ-ын вуриськисьлэсь ӧнерзэ басьтэ.

— Улонын аслам ӧнерея ужаны ӧз тупа. Дышетсконме йылпумъяме бере, куинь ар ӵоже гуртысь фермаын ужай но собере Кушкет гуртэ картлы кошки, — маде Римма Николаевна.

Кушкетын улыны кутскемез бере кӧня ке ар ортчыса, нылкышно социальной удысын ужаны кутске, со нуналысен аслэсьтыз ужзэ уг вошты.

— Аслэсьтым ужме мон яратӥсько, утялтоно муртъёсме но. Уноез адями малпа, та ужын секыт ӧвӧл шуыса, но со воксё озьы ӧвӧл. Малы ке шуоно котькуд социальной удысын тыршись адями пересьёслы шонер амал (подход) шедьтыны быгатыны кулэ, соослэсь сямзэс, мылкыдзэс санэ басьтыса, вераськыны кулэ.  Али со гинэ но ӧвӧл. Тынад ужам ужед соослы кельшоз меда шуыса но сюлмаськоно, — ужез сярысь маде Римма Николаевна.

Ас ужезлы сюлмыныз сётскем социальной ужась Римма апай туннэ нуналозь гуртысьтыз дас тямыс подопечнойёсызлы социальной юрттэт возьматыны вутскем. Жаляса вераны кулэ, соос пӧлысь тросэз али дыре кулэмын ини. Но со шоры учкытэк, Римма Николаевна кулэм песянайёслэн нылпиосынызы юн кусып возьыны быгатэ. Али но соос, Римма апайлэсь матысьёссы понна лэсьтэм ӟеч ужъёссэ тодазы возьыса, нылкышнолы звонить карыса, улон-вылонэныз, ужъёсыныз но тазалыкеныз тунсыкъясько вылэм.

— Веранэз ӧвӧл, утем пересьёслэн матысьёссы озьы юалляськыса уло бере, югдуре сярысь тунсыкъясько бере, со мон понна шумпотымон. Озьы бере, огшоры ужаськымтэ, ӟеч ужъёсы пересьёслы ас дыраз юрттӥллям. Туннэ нуналэ но юртто. Кылсярысь, али дыре мон вить пересьёсты утисько, соос пӧлысь куинез тылысь ветеранъёс, одӥгез дано шутэтсконын луись пенсионер, нош одӥгез пичи дырысеныз инвалид луись Петя агай, — валэктэ Римма апай.

Нялтас вераса, Пётр Германовичлэн гуртаз, Кушкетын, нокинэз но ӧвӧл вылэм. Соин Римма апайлы юртысьтыз ужъёссэ но быдэсъяны тупа. Яра али, кузпалыз Сергей ваньмыз ласянь кышноезлы юрттыны дась. Юртсэ утялтыны, ассэ воргоронэз учкыны, тӥяськем мазэ ке тупатыны — ваньзэ радъя вылэм. Соин Римма Николаевна кузпалэзлэн юрттэмезлы пумтэм шумпотэ но солы тау каре. Кузпалыз сяна, юрттэт кизэс мычыны дась луись валче ужасьёсыз но вань солэн.

— Котькытын ужад ке но, шуг-секытъёстэк уг луы ни со. Котькуд минутэ кыӵе ке юанъёс, валантэмъёс кылдыны быгато. Милям ужын но, валамон, сотэк уг луы. Кыӵе ке шуг-секытъёс кылдӥзы ке, соку ик ужысь ӧнерчиосмылы жингыртыса кенеш курисько, соос котьку шонер визь-кенеш сёто, юрттэт возьмато. Со понна соослы бадӟым тау. Учырен пайдаяськыса, тани ма сярысь но вераме потэ. Гуртоосмес туннэ нуналэ магазинлэн луымтэез сюлэмшугъяськытэ. Пичи гурт понна бадӟым проблема со. Матысь гуртъёсы ветлыса, вузъёсты отысь вайылыны тупа. Ведь гуртын улӥд ке но, нуналлы быдэ магазинысь мар ке но кулэ луэ. Ярам, кинлэн транспортэз вань, соос понна та сокем бадӟым шугъяськон уг кылдыты, дыр. Но ведь машинатэк улӥсь семьяос но вань, оген улӥсь мӧйыосты веранэз ӧвӧл ини. Соослы шуыса, мукет гуртъёсысь туж уно сиён яке хозяйствоын кулэ луись пӧртэм арбериосты нуллыны тупа. Но таиз ласянь но юрттӥсьёсы вань. Эшъёсы вань шуыса шумпотӥсько. Мынам пересьёсылы бускель гуртын ужась вузкарись Елена но продуктъёсты нуллэ, мон солы жингыртыса верай ке. Огпол но отказ каремез ӧвӧл. Нош одӥгез эше Нина артэн гуртысь нылпи садэ ветлыкуз но мынам куремея магазинэ пырыса, кулэ луись арбериосты басьтыса вае, — мылкыдъёссэ вуттэ социальной ужась.

Озьы, социальной удысын ужасьёслэн ужзы мӧйыосты яке инвалид муртъёсты утёнэн гинэ уг йылпумъяськы. Соослэсь куронъёссэс но быдэстыны вутсконо, юрт котырзэс но утялтыны тупа, куддыр небыт кылын вазьыса буйгатыны, куддыр чурытгес но вазьыны тупа, дыр. Сыӵе соослэн ужзы. Но Римма Николаевна ужезлы ӝожтӥськыса одӥг кыл но ӧз вера. Вить хозяйствое сиён-юон нуллон но капчи уж ӧвӧл ведь.

— Кызьы ӝожтӥськод, — пайме Римма Николаевна, — мынам утёно муртъёсы но ваньзы йӧноесь, каньылэсь. Соос монэ гажало но жаляло. Туж шумпотӥсько, туннэ нуналэ соослэн ваньзылэн но тазалыксы, асшӧдонзы умой югдурын шуыса. Соос понна но сюлмаськоно ведь. Адями борды дышиськод, аслад семьяед кадь пото соос но. Таза улон но кузь гумыр соослы.

Римма апайлэн аслаз верамезъя, секыт но кылкутымон ужаз солы чиданлыкез юрттэ. Ӵапак сыӵе сямо — чидась луыны кулэ вылэм котькуд социальной удысын тыршись ужасьлы, тужгес но мӧйыосын ужасезлы. Со сяна, та ужын бадӟым инты басьтэ тазалык но.

Ини дас сизьым ар ӵоже та интыужын тыршем Римма апай котькыӵе шуг-секытъёслы дышем, соин мукет интыын со ассэ уг адӟы вылэм — пересьёсты, пе, жалясько. Чурыт график но сое уг кышкаты, Пётр Германович доры шутэтскон нуналъёсаз но ветлэ, сое сюдыса, утьыса кельтэ вылэм.

— Куддыръя (пересьёсылэн нылпиоссы ӧтизы ке яке мӧйыосы кулэм учыре) соос доры уйин но мыныны тупа. Берпуметӥ сюресэ но келяны юрттӥськомы, кызьы уд мыны, матысь адямиос луо ук соос но ватытэк вера Римма апай. —  Яра али кузпалы юрттэ.

Римма апайлы кузпалэз зэмзэ но туж юрттэ. Ачиз  шабашка ужъёсын выре ке но, кышноезлы юрттыны но дыр шедьтэ Сергей агай. Кузпалъёслэн кык пиоссы вань. Бадӟым пизы Артём туннэ нуналэ арми радъёсын (со сярысь газетлэн кылем номераз гожтӥськеммы вал ини), покчи пизы Андрей сизьыметӥ классэз йылпумъям.

— Семья котькуд адямилэн шумпотонэз. Кузпалэным, пиосыным данъяськисько. Соос мынам валтӥсь юрттӥсьёсы, котьку но озьы мед луоз, — шуиз Римма Павлова.

Социальной ужасьлэн туннэ нуналэ ТР-ысь ужъя, уже пыриськонъя но социальной дурбасьтонъя Министерстволэн Таукарон гожтэтэз вань, со сяна Римма Николаевна ёросысен сётэм грамотаосыныз но таукарон гожтэтъёсыныз ушъяськыны быгатэ. Озьыен, ужзэ яратыса но рос-прос быдэстэ бере, Римма Николаевнаез кивалтэтэз но адӟе, дунъя.

Праздниксы вуон азьын Римма Николаевнаез но солэсь вань кадь коллегаоссэ ӧнер праздникенызы ӟечкыласа, соослы юн тазалык, чиданлык-сабырлык, кузь гумыр сӥзиськомы. Ужды азинлыко мед луоз но мӧйыослы шудбур но шумпотон мед ваёз!