Мызганчимы – нырысетӥосыз пӧлын!

2018 арысен Удмурт Элькунысь Можга ёросысь Бадӟым Уча гуртын туж аспӧртэмлыко ужрад ортче — мызганчиослэн «Крутихинская гармонь» шуыса нимаськись фестиваль-конкурсэз. Та эшшо одӥгез вамыш, кудӥз калык гуръёслэсь чеберлыксэ возьматэ. Конкурсэз радъясьёслэн одӥгез — Сергей Крутихин. Кин уг тоды, со «Вить Сергейёс» группалэн ёзчиез. 

Азьвыл ик пыриськисьёс видео ыстӥзы. Вань заявкаосты уже кутыса, жюри финалистъёсты бырйиз. Туэ фестиваль Россия Федерациысь Удмурт Элькунлэн йӧскалык политикая кун программаез улсын, Удмурт Элькунысь «Этносоциальное развитие и гармонизация межэтнических отношений» кун программая ортчиз но Можга ёрослы 95 ар тырмонэзлы сӥземын вал. Фестиваль-конкурс аспӧрмосо (самобытной) шудӥсьёсты шарая, мызганэн шудӥсьёсты огазея но калыклы капчи мылкыд кузьма. 

— Азьвыл та «Сергей Крутихин собирает друзей» шуыса нимаськись ёроскуспо фестиваль-конкурс луоз шуыса малпамын вал. Та арозь озьы ик вал, но пӧртэм мугъёсын онлайн но ортчытоно луиз (коронавирус висёнэн сэрен), то кык нунал ӵоже кыстӥськиз. Туэ ини фестиваль-конкурсмы элькун статус басьтӥз. Самой устоосыз, быгатӥсьёсыз Бадӟым Учае Гала-концертэ но данъет кузьманэ вуизы. Азьланяз но конкурс луоз шуыса оскисько, но нимзэ гинэ кызьы ке воштоно вал, — шуыса ивортӥз Сергей Крутихин. 

Сыӵе устоос туэ 30 шуркынмонэ Бадӟым Уча гуртысь лулчеберетъя юртын люкаськизы. Кызьы верамын вал ини, татын Гала-концерт радъяськиз, пыриськисьёс туж мылкыдо мызганэн шудӥзы но быгатонлыкъёссэс возьматӥзы. Котькудӥз нимысьтыз дипломен пусйиськиз. 

Та фестиваль-конкурсэ асьмелэн Вуж Кушкет гуртысь Алексей Павловмы но пыриськиз. Нялтас вераса, со арлы быдэ но конкурсэ пыриськыны тырше. «Песни под гармонь» номинациын со 1-тӥ степенё дипломлэн кузёез луиз. Ӟечкыласьком! Азьланяз эшшо но тросгес вормонъёсты мед луозы!