Н. М. Никифоровлы сӥзем нырысетӥ конференция шуныт но тунсыко пӧрмиз

Со сӥземын вал удмурт гожъяськисьлы, Н.М. Никифоровлы, солэн вордскемез дырысен 65 ар тырмонэзлы но озьы ик кемалась ӧвӧл ортчем удмурт кыллэн нуналэзлы. Ужрадэ пыриськизы Киров улосвылысь, Удмуртиысь, Марий Элысь но Татарстанысь (Кукмор ёросысь) делегатъёс.

Конференцилэн программаезъя нырысь ваньзы огазе люкаськизы школалэн актовой залаз. Татын кыл веразы Ӟаны школалэн директорез К. В. Грахов но районысь дышетонъя управленилэн кивалтӥсезлэн визьнодан ужъёсъя воштӥсез И.И. Петров. Соос конференциын люкаськем куноосты праздникен ӟечкылазы, ужрадысь трос выльзэ но тунсыкозэ басьтыны сӥзизы. Та люкетын ик дышетскисьёс Николай Никифоровлэн «Инмысь шуд» пьесаезъя спектакль но возьматӥзы. Татын пусйыны кулэ дышетскисьёслэсь усто шудыны быгатэмзэс, декорациосты дасямзы но вылӥ уровеньын вал. Спектаклез учкем бере делегатъёс люкиськизы куинь группаослы (котькудӥзлэн ас кураторез луиз ). Котькуд группа учкиз удмурт кылъя но литературая шара занятиосты но урокъёсты. Шара урокъёс йылпумъяськем бере ужаны кутскизы «Мастерскойёс». Одӥг час куспын делегатъёс ас группаосынызы ньыль «мастерскойёсы» вуылӥзы. «Шулдыръяськон коркаын» куноосты школаысь «Инвожо» ансамбль шулдыртӥз — татын кырӟазы, эктӥзы, удмурт шудонъёсты шудӥзы. «Кибашлы киос» секциын дышетскизы шортлэсь мунё лэсьтыны, «Писатель дорын куноын» асьсэос мильым лэсьтыса утизы, ческыт пӧраськемъёсын чай юизы. Школалэн «Даур куара» музееныз но тодматскизы.

Конференцилэн ужез секциослы люкиськыса азьланьтӥськиз. «Удмурт кылэз но литератураез дышетонын инновационной амалъёсты кутон», «Никифоровез лыдӟыны дыр», «Этнокультурной дышетон пространство — дышетскисьёслэсь шаерез гажан мылкыдзэс кылдытон понна луонлык» секциосъя ужъёс нуиськизы. Котькудаз дышетӥсьёс презентация возьматыса доклад лыдӟизы, выступлениос бере вакчияк огазеян лэсьтӥзы.

Йылпумъяськиз конференция котырес ӝӧкен. Татчы пыриськизы Татарстанысь удмуртъёслэн НКА-зылэн исполнительной директорез М.А. Иванова, Удмуртиысь писательёслэн огазеяськонзылэн тӧроез П.М. Захаров, филология наукаосъя кандидат, литературая тодосчи, доцент В.Л. Шибанов, удмурт кылбурчи, журналист, Россиысь гожъяськисьёслэн огазеяськонзылэн ёзчиез В.П. Михайлов.

Та сярысь пыр-почгес «Азьлане» газетысь лыдӟыны быгатоды.