Ӧнерез — воргоронлэн бурдъёсыз

 Юрий Алексеевич улонэзлэсь 34 арзэ Смаиль шоръёзо школаын нылпиосты физкультураен дышетонлы сӥзем мурт.

1954 арын 4 феврале Вуж Турья гуртын вордске со. Собере Шор Кушкетысь 8 аръем школаын дышетске, Удмурт АССР-ысь Ярысь педагогикая училищеын тодон-валан басьтэ, 1972-1975-тӥ аръёсы армиын служить каре. Армиысь бертэм егит пиез Шор Кушкетысь школае физкультураен дышетӥсе тодмосто. Нош 1976 арысен Смаиль школае выжто.

Юрий Алексеевич ужан дыре котькуд классын кызь-куамын котыр дышетскись луиз, матысь гуртъёсысь лыктыса но дышетскизы. Ӵошатсконъёсы мыныны транспорт ӧй вал. Но со, ас ужаз усточи луэм дышетӥсь, дышетскисьёсыныз ӵош сю котыр грамотаос, кубокъёс, призъёс басьтыны быгатӥз. 1983-1984-тӥ аръёсы солэн дышетскисьёсыз Татарстанысь гурт районъёс пӧлын ортчем биатлонъя ӵошатсконъёсын вормизы. Гурт но город районъёс пӧлын ортчем футболъя ӵошатсконъёсы пыриськизы. Капчи атлетикая ӵошатсконъёсын дышетскисьёсыз, ёросмылэсь данзэ утьыса, Арча но Кукмор районъёсын умой выступлениос лэсьтӥзы. Хоккеистъёсыз Казань городын радъям шудонъёсы пыриськизы. Со сяна, районамы ортчылӥсь спорт ужрадъёсы пыриськыса, вормонъёсынызы школамес данъязы.

Ми Юрий Алексеевичлы, матын карыса, огшоры Шишкин агай шуыса вазиськом вал, нош со талы вожзэ чик но ӧз поттылы. Солэсь урокъёссэ, волейболэн, баскетболэн кружокъёссэ витиськом вал. Ми дышетскыку школалэн ас транспортэз ӧй вал, куронъёс но али кадь чурытэсь ӧз луэ, ӵошатсконъёсы ӵем дыръя «попуткаен» ветлылӥськиз.

Семьяеныз выжемезлэсь азьло Юрий Алексеевич Смаиль — Турья вискысь сюресэз толалтэ куасэн, лымы бырем бере — пыдын ортчылӥз. Но солэн ӝожтӥськемез ӧй вал. Ольга но Игорь нылпиосыз но ачиз кадь огшорыесь, шуо. Школаын ӵош дышетскисьёсынызы, дышетӥсьёсын ӝог огъя кыл шедьтӥзы. Светлана кузпалыз амбулаториын ужаз. Корказы амбулаторилы матын вал бере, трос учыре нырысетӥ эмъюрттэт гурт калыклы со сётӥз. Яратӥз соослэсь каньыл, эшлыко, адӟем карымон семьязэс Смаиль калык.

Туала юрт пуктыса, выльысь Турьяе выжыса гинэ кема улыны ӧз кылды Юрий Алексеевичлы. 2011-та арын ноябре, 57 аресэн шӧдтэк шорысь кошкиз со пӧлысьтымы. Та сярысь «Хезмэт» газетын 2012-тӥ  арын феврале потэм «Финишозь ӧз вуы» шуэм статьяысь люкетсэ ӵектӥсько. Гожтэмлэн авторез Юрий Алексеевичлэн сузэрез Римма:

«... Вашкалаос шонер вераллям. Адямилэн кин луэмез секыт дыръя яке кулэмез бере гинэ тодмо луэ. Тынэсьтыд макем дуно адями луэмдэ ми пумозяз валаськымтэмы. Адӟонлэсь уд пегӟы шол. Агаелэсь шайгузэ 60 гвоздика чеберӥз. Нош кема ик дыр ӧз ортчы, вылаз, марӟан пырыос кадь, тӧдь-тӧдь лымы пырыос усизы...»

2019-тӥ арын 4 мартэ, Юрий Алексеевич Шишкинэз буре вайыса, школаямы атайёс но дышетскись пиос куспын хоккей турнир ортчытӥзы. Ужрадэ дышетӥсьмылэн кузпалыз Светлана апай, нылпиосыз, ӵыжы-выжыосыз лыктӥзы. Ӵошатсконэз учкыны Ураысь, Шишинерысь калык но люкаськиз. Школа коллективен вылӥ уровенен ортчытэм турнир котькуд лыктэм муртлы «азинлыко мед луоз» шуэм мылкыд кельтэм, дыр.

Юрий Алексеевич аслаз ужан сюресэныз, тыршеменыз тросэзлы адӟем карымон мурт. Вань мылкыдын лэсьтэм уж адӟем каремын луоз шуыса юнме верамын ӧвӧл ук.

Гульфина Ахамадиева

Смаиль гурт