Нина Димитриева — Карек-Сермаысь арлыдо юбиляр

14-тӥ тулыспалэ Карек-Серма гуртысь гажамон песянай, Нина Васильевна Димитриева, бадӟым юбилейзэ — 90 арес тырмонзэ — пусйиз.

Балтась ёрослэн главаез Рамиль Нутфуллин, «Борнак» обществолэн кивалтӥсез Рафкат Назипов, Бурнак гурт поселенилэн главаез Шамиль Хабибуллин, Нина Васильевнаез ӟечкыласа, кузьымъёс сётӥзы, Рамиль Рашитович Россиысь Президентлэсь Владимир Путинлэсь ӟечкылан открытказэ, озьы ик таукарон гожтэт но сётӥз.

Нина Васильевна пичи дырысеныз секыт улонэз адӟем кышномурт. Вордскем со Карек-Серма гуртысь огшоры куанер семьяын. Соос вить кузя нылпиос луиллям. Анайзы вазь кулэм, Ниналы соку ваньзэ-ӧвӧлзэ арес но ӝыны гинэ луэм. Соин аслэсьтыз анайзэ со уг но тоды. Анайзы кулыку, самой бадӟым апаезлы 13 арес луэм. Ӵапак со апаез Ниналы но эшшо одӥг апаезлы анайзэс воштэ. Атайзы но вазь, 1948-тӥ арын, кулэ.

— Ӵужатаймы, висьыса улэмысьтыз, оже мынымтэ, но озьы ке но секыт ужъёсты быдэсъям — нюлэс кораны ветлэм. Анаймылэн агайёсыз Иван но Аркадий егитысен кулӥллям. Озьы соос, куинь нылъёс, апаен-сузэръёс, куиньназы улыны кылиллям. Бадӟым апайзы маин будэтэм, дыр, сузэръёссэ. Анай ачиз но пайме, кызьы апаймы милемыз будэтэм меда шуыса. Куиньназы озьы улӥллям. Тросэз кадь ик, сютэм улонэз адӟиллям. Удмуртъёслэн мар луэм ини азьло — каб шуккиллям. Соин но удмуртъёслэн ведь тросэзлэн коркаоссы улыно-вылыно луэм, каб шуккон понна. Улын ужаськод, вылын кӧлӥськод. Тани та юртын но 1981-тӥ арозь каб шуккемын. Тӥни озьы каллен-каллен куиньназы улӥллям, ӵабъяськиллям. Дышетскымтэ бере, анаймы егит дырысеныз колхозын со но та ужъёсты быдэсъяса ветлэм, — шуо юбиляр песянайлэн нылпиосыз.

Гумыраз Нина Васильевна колхозын тыршем. Дышетскыны луонлыкъёс ӧвӧл, кызьы ке но улыны кулэ, мар ке но сиыны. Нырысь со тросгес бусы ужъёсын тыршем ке, 19 аресысен фермае ужаны интыяськем ини. 18 ар ӵоже парсьёсты сюдэм, собере — ыжъёсты. Отын 15 ар ужам. Ошъёсты но тямыс ар ӵоже сюдэм. Макем секыт ӧз луы ке но, ваньзэ чидам кышномурт. Котьку азьмынӥсьёс пӧлын луэм Нина апай, Бурнак сельсоветлэн депутатэз но луэм. Кузпалэз кулэм бере, 54 аресэн, пенсие потэм.

Димитриевъёс ньыль нылпи вордо — Валентинэз, Анатолиез, Алевтинаез но Маргаритаез. Котькудӥз соос пӧлысь, ас семьязэ кылдытыса, пӧртэм интые улыны интыяське. Жаляса вераны кулэ, Анатолий пизы гинэ улэп ӧвӧл ини — кӧня ке ар талэсь азьло висьыса кулэм. Туннэ нуналэ юбилярлэн 8 внукез, 12 правнукез вань.

— Милям анаймылы туннэ 90 арес тырмиз. Анаймы туж секыт улон сюресэз ортчиз, туж вазь анайтэк кылиз, кык апайёсыныз будӥз. Ньыль классэз гинэ йылпумъяны быгатэм. Кызьы со ачиз тодаз вае, школае ветлыны дӥськутэз но луымтэ. Но вань шуг-секытъёсты со чидам, сётскымтэ. Вань улонзэ фермалы сӥзем, вань кужымзэ отчы кельтэм. Атаймы но гумыраз колхозын, фермаын тыршем. Кыкназы но ужасесь вал. Анаймы кема-кема аръёс ӵоже мед улоз али. Висе ке но, мед гинэ улоз. Анай котьку кулэ ведь. Анаймы луыку, милям котьку бертоно юртмы вань, котьку кенеш юаса вазиськоно адямимы вань. Мед улоз на анаймы, гуртамы но мед сое тазьы ик гажалозы, — шуэ Нина апайлэн Алевтина нылыз.

Нина апайлэн тазалыкез лябӟемын вылэм ини. Синъёсыз уг адӟо, но озьы ке но, песянай ачиз каллен-каллен ветлэ, ӧжыт ураме но потылэ. Туннэ нуналэ со Ираида кенэныз улэ. Нылпиосыз но внукъёсыз куное бертыло. Нина апай соослы котьку туж шумпотэ.