Нырысетӥез азинлыко ортчиз

Балтась ёросысь делегацилэн составаз районмылэн главаез Рамиль Нутфуллин кивалтэм улсын пыризы Балтась районлэн исполнительной комитетэзлэн кивалтӥсез Рамиль Шакиров, Ципья черкысь отец Георгий но Галина Семовская, Покчи Лӧзя черкын службаосты нуись отец Рафаил но Биктеш гуртысь Валерий Михайлов. Озьы ик та бадӟым кенешонэ пыриськизы ТР-лэн Президентэз Р.Н.Минниханов, ТР-лэн Государственной Советэзлэн председателез Ф.Х.Мухаметшин, Казанской но Татарстанской митрополит Анастасий но мукетъёс. Огъя вераса, 500-лэсь трос адями люкаськиз та ужрадэ.

Форумез усьтӥз ТР-лэн Президентэз Рустам Минниханов. Со люкаськем калыкез ӟечкылаз, тау кариз лыктэмзы понна. Тӧро храмъёсты выльдон сярысь но кылпум поттӥз, Форумлэн Татарстанын православилы азинскыны выль импульс кылдытэмезлы оскемзэ вераз.

Собере вераськиз митрополит Анастасий. Национальной приходъёслэсь ужамзэс пусйиз - кемалась ӧвӧл удмурт но крашин кылэ берыктэм Библияослы презентация ортчытэмын вал.

Форуме Москваысь бадӟым куноос но вуизы. Ужрадэ пыриськемъёсты ӟечкылазы Москваысь патриархатлэн Черк но калык кусыпъёсъя Синодальной отделэзлэн председателез протоиерей В.А.Чаплин но РФ-лэн Президентэзлэн кунпуш политикая Управлениезлэн религиозной организациосын кусып возёнъя Департаментэзлэн начальникез Е.В.Ерёмин. Всеволод Чаплин пусйиз, Татарстанын пӧртэм калыкъёслэн но осконъёслэн тупаса улэмзы - со быдэс дунне понна уникальной опыт луэ шуыса. Со опытэз утёно но азинтоно, шуиз со.

Огъя вераса, ужрадын эскеремын но югдытэмын вал пӧртэм актуальной ужпумъёс. Экстремизмен, радикализмен, национализмен нюръяськон, сектантство сярысь но вераськонъёс луизы.

Йылпумъяськиз Форум резолюция кутонэн. Отын калыклэсь духовно-нравственной луонлыкъёссэ, лулпуш узырлыксэ, религиозной культуразэ азинтонлэн но утёнлэн, пӧртэм калыкъёслэн но религиослэн тупаса улэмзылэн кулэлыкез пусъемын вал.

Православной калыклэн таӵе паськыт форматын ортчытэм Форумез туала дырлэн куронъёсызлы тупа но солэн одно азинсконэз луыны кулэ шуэм малпанэн ужрад йылпумъяськиз.

P.S. 8 мае Казаньысь духовной семинариын удмурт кылын потэм Библиялы презентация лэсьтӥзы.